Séːkarbí Bottéryaːnédén?
(Mark 9.33-37; Luk 9.46-48)
18
Odo ayírdo luyírsunékídíːdé Jisukodoːpé gígeːla tauto, "Tayéng-among migomdokodo séːkarbí bottéyaːnédén?"2 Bí ajjioːuné koːko goggeːla bím buluk kanggaːdo dagmoto. 3 Odokké bí luto, "Ngo nolum arodém lubidung, édíloːpé nolu angulangkula koːkangémpé ikumaːyéji, nolu tayéng-among migomdokodoːpé gíamaːyé. 4 Odok-légaːpé, séːkobíi aíé séː koːsémpé ajjisuyéji bí tayéng-among migomdokodo bottéryaːnédé. 5 Odokké séːkobíi séː ajjiné koː sémpinném ngok aminno boríksudagji, édé ngom boríksunamé.
Pa:bém Aːdopé Ankanam
(Mark 9.42-48; Luk 17.1-2)
6 Émpigeːla séːkai ngom méngkésuné séː ajjinékídíːsok aːkom pa:bém imomílo, bíkképé bík líːpo:do pítané jatako raglíksugeːla gaːnédok oːríngaryaːngkodo géjíːlíkkosunamdé aiyaːyé. 7 Okko taniyém paːbém imodagji odogbuluk légaːpé moːpísoːpé méːdíréǃ Édémpinné aːpayéruːng, émpigeːla méːdíré édé taniːdoːpé séːkkokki édébulu aːyéjiǃ
8 Nok alagdéːmanggom alédé nom pa:bém imomílo, édém papaggeːla érpaktok. Alag soːnyikolaː alé soːnyiko kage:la dorngasuman umíbo érríkkosutayingém, alag asongkomanggom alé asongko kama:pé turkodoːpé gíaːnamdé aiyaːdag, . 9 Odokké nok amigdé nom pa:bém imomílo, édém karrenge:la érpaktok. Amig pirnyiko dungge:la umí uiːamoboːpé érríkosutayingém, amig apirki turkodoːpé gíaːnamdé aiyaːdag ."
Yogné Meːrdém Luyisula Lubinam
10 "Kaːsulang nolu séː ajjinékídíːsok séːkomsin kaːtidyok. Ngo nolum lubidung bulum kaːsíné tayéng-yaːmekídíːdé ngok tayéng Abuké kanggaːdo loːdísém duːdag. 11 Kapéné séːko yokkaji, bím magakolo Taniːké Aoːbí gídung.
12 Nolu okko émna méːdang? Taniːkolokké meːré língkoko dung, odokké odok adorko yogmílo, bí naːyíngkolaː konaːdém adi tayéːdo mépaggeːla yogné adordém magapkolo gímaːyénei? 13 Ngo nolum arodém lubidung, édílo bí édém magabyeji, bí édé yogné meːrdok tayéːlo yogman naːyíngkolaː konang meːrkídíːdémyang méːpoyaːyé. 14 Édémarpé noluk tayéng Abubí séː ajjinékídíːso ara:lokké séːkosin yokpé lagimang émna méːdag."
Bírokoné Nok Kekonpé Paːb Imílo
15 "Nok bírodé nok kekonpé paːbém imílo, gígeːla bík paːbdém léngkanbilang, édém noyik annyiké arangoːlo ilang. Bí nok agomém tadmílo, no nok bírodém paːlattoku. 16 Émpigeːla bí tadmaːmílo, ako- annyiko taniːyém nok lédílo gíbolang, odo annyi aum lubikupénélok kanggaːlo agomdé arro émna léngkannayé. 17 Bí buluk agomém tadmaːmílo, doːyiːdém kumgolo lupalang; odokké bí kumgodok agomémsin tadmaːmílo, bím uiːkumné kísapéla murkong urné kísapé sappaglang."
Etkabnammélang Edgenam
18 "Ngo nolum arodém lubidung, nolu oko okkoméi mo:píso etkabyéji tayéng-amoːto:sin édém etkabiyé, odokké oko okkoméi nolu mo:píso edgeyéji tayéng-amoːtoːsin édém edgebiyé.
19 Lékoda ngo nolum lubidung nolu annyikoné mo:píso okkoméi koyéji odo asiné lékomílo, nolukképé édém ngok tayéng Abubí ibiyé. 20 Kapéné okolo ngok aminno annyi aumko gíkumsudon, ngo odo buluk lédílo duːmíndo."
Méːyinsumaːné Agergernékídíng
21 Odo Pitorbí Jisukodoːpé gígeːla tauto, "Ruːtuma, ngok bírodé ngok kekonpé imurém itílduːmílo, ngo éddí ayírkopé bím méːyinsubiyén? Kínít ayírdoːpéi?"
22 Jisubí lulatsuto, "Ngo nolum lubidung, kínít ayírkopémang, émpigeːla yíːlaːnítkolaː kínít ayírkopé. 23 Odok-légaːpé tayéng-among migomdokodé sémpé idag. Longékoném migomkoné bík agergernékídíːdok sabgabnamkídíːdém kangkapé méːsékto. 24 Bí édémpé kaːrobnammé, taniːkoném bíkkodoːpé gíabodoku séːko líːyínga líːyíngko murkongém bím bikupénammé dungngai. 25 Bí biladlangkumaːpé inamé, migomdé bím bík yamnédém, bík ommang odokké bík kanam appíːdém dorkunam légaːpé kopagdopé lulíkto. 26 Agergernédé bík kanggaːdo lébíːtumna kumna luto, 'Ajjaoːkoda ngom kaːpoːtei, odo ngo nom appíːdém bilatkupé.' 27 Migomdé bím ayaːpé-méːto, édémpila bí bím méːyinsula bím gímotoku.
28 Émpigeːla édílo édé agergernédé gílenkangkun, bí bík agergerjonko ríksuto séːko bím língkokopé murkongém bikupénamé dungngai. Bí bím líːpodok yumgabge:la luto, 'No nom okkom bikupénamén édém su:pag biːkuiǃ' 29 Bík agergerjondé lébíːtumna bím kumna luto, 'Ajjaoːkoda ngom kaːpoːtei, odokké ngo appíːdém nom bilatkupé.' 30 Émpigeːla bí tattomang. Tadmaːpé igeːla bí taniːdém sobomna édíloːpé bí biladlangkumaːji odoloːpé makanaːlo tumto. 31 Édílo akon agergernékídíːdé okko kapikaːji édém kaːton, bulu airuːpé méːdírkang odokké gíla okko kapikaːji édé appíːdém buluk migomdém lubitoku. 32 Édémpila bí agergernédém goganggeːla luto, 'No aiman pagbono, ngo nok appíngém méːyinsubitag, kapilaːné no ngom kumna lubisuka. 33 Nok agergerjondém no ayaːpénamai, kapé ngo nom ayaːtoji.' 34 Migomdé airuːpé aglíngkang, odokké bí agergernédém édíloːpé bí bík narponam appíːdém bilatkumaːyéji, odoloːpé mokemoramdopé makanaːpé mélíkto.
35 Noluk asindokki édíloːpé noluk bírrom nolu méːyinsumaːyéji ngoluk tayéng Abubí nolum appíngém édémarpé iyé."