Paːb
(Moti 18.6,7,21,22; Mark 9.42)
17
Jisubí bíkkol luyírsunékídíːdém lutoː "Taniːyém paːb imonédé gíyérung; émpigeːla méːdíré édé taniːdokkoloːpé séːkokki bulu gíyéji. 2 Sé: ajjinékídíːsok akoném bíkkoki paːbém imomílo; bík líːpoːdo pítan jatako raglígge:la gaːnékolo bím géjílígnamdé bíkképé aiyadaggai. 3 Édémpila nolu aíé totsulang. Nok bírokoné paːbém imílo, bím geːyirrang, odokké bí méngkutsukumílo, bím méːyinsulang. 4 Odokké longé araːdo bí nok kekonpé kínítkopé imur igeːla, nokkodoːpé kínítkopé bí gílatsugeːla, 'Ngo méngkutsudungku' émsumílo no bím méːyinsulang."Méːjíg
5 Mélígnamkídíːdé Ruːtummé luto, "Ngoluk méːjígnamsém abamoteiǃ"
6 Ruːtumbí lulatsutoku, "Nolukké ajjiné pétu ammokíddíko méːjíksunamé kamílo, séː nuni amí:sém ngursaːsula gaːnélo saːta émmílo, édé nuni amíːdé noluk lunamardémpé iyé.
Ager-Gernékolok Gerpénam
7 Méngkangkítok, noluk séːkkaiké aluangkomanggom meːrkaːsíːné pagboko dung. Édílo bí aríglokké gíaːdokuji, odo bí bím bík lédílo tedmíngeːla domínto émna ludonei?' 8 Bí édémpé luma:pé, 'Ngok légaːpé kéːporéppotei, odokké ngo dongab-tíngabmaːdopé ígíng yeːréksula ngom orposaːpolang odokké no dola-tíːlang.' 9 Pagbodé bík lulígnamkídíːdém itag émna bí bím aipai biyelang? 10 Édémíːpé nolukkolosin lékodag, édílo nolum ilangka émna lulígnam agerkídíːdém idoji, odokké ludag, 'Ngolu aré kamaːné pagbo; ngolu ngoluk gerpoːnammém gertag.'"
Jisubí Íyíngko Taniːyém Ésaːmokunam
11 Longékoném Jisubí Jerusalempé gíla duːdodo, Somoriakélang Galiliké pongkok rísudok gípatto. 12 Bí doːlungkoloːpé gíaːdodo, moːténgoupé dagla duːné ngero-roːnam tani íyíngko bím ríksuto. 13 Bulu bottépé kabla luto, "Ruːtum, Jisu, ngoluk tayéːlo ayaːteiǃ"
14 Édílo bí bulum ka:suton, bí bulum luto, "Nolu gíla aíém miríkídíːdéma léngkansuta.b"
Odokké buluk gíla du:dodém bulu naréngkangku. 15 Odo buluk ara:dok aːko, édílo bí bík aikunamdém ka:suton, bí bottépé jéːla Ruːnémé luyitsula gíladdoku. 16 Bí Jisuké lépodo éksorra kumge:la bím aipai bito. Édé taniːdé Somoria taniːkai. 17 Odo Jisubí tauto, "Nolu íyíːdéi naréngkumangalang? Émpémílo konangko okolan? 18 Séː bideki taniːsok ru:yipé aːkosin Ruːnémé aipai bikakupé gílatkunéko paːtomang?" 19 Odo Jisubí bím luto, "Dagrobge:la no gíkangku; nok méːtinsunamdé nom ésaːmotakku."
Migomdokodok Gíkunamdé
(Moti 24.23-28;37-41)
20 Parosikídíːdé Ruːnék migomdokodé édílo giyékuji émna taunammé, Jisubí lulatsutoku, "Ruːnék migomdokodé kanggod kaːpanamno gíkumaːyé. 21 Séːkosin lumaːyé, kangkítok, édé sidé dungǃ émmamílo élé dungǃ' kapila:né, Ruːnéké migomdokodé noluk asin arangíːdo dung.c"
22 Odokké bí bíkkol luyírsunékídíːdém luto, "Ayírdé píngadobo édílo nolu Taniːké Ao:ké longékídíːdok longéko kaːlíːyéji, émpigeːla nolu édém kaːbegmaːyé. 23 Taniyé nolum lubiyé, 'Bí sidé dung, bí élé dung émnaǃ' Émpigeːla nolu buluk lédulo gímínyok. 24 Yariyé kapé doːmírtok kekondo argeːla kekondémsin píaːmodang, Taniːké Ao:ké longédéːsin édémíːpé iyé. 25 Émpigeːla bí bojéru:ngko duːgém dopoːruːyé odokké séː taniːopeséː bím topaksupoyé. 26 Noaké longékídíːdé kapé idagaːji, édémarpé Taniːké Ao:ké longékídíːdéːsin iye.d 27 Noaké bottén olluːdoːpé sangamaːdodopé taniːkídíːdé dodu-tí:dungai, midaːmodungai, odokké amilo bidungai. Pumi asidé pungaːla bulum appíngém bidyudamto.e 28 Lutké longékídíːdé:sin édémíːpé idagai. Taniːkídíːdé dodungai, tí:dungai, kodungai, rédungai, ledungai, okumém modungai.f 29 Émpigeːla oko longédo Ludbí Sodom nogordokké gílenkaːji, doːmírtokké ummélaː dorné metpé podong opé ola bulum appíngém okkeyamto. 30 Taniːké Ao:mé léngkando longédoːsin édémarpé iye.
31 Odo longédo séːkobí bík okum selab tayéːdo duːyéji, bík attaré okum ara:do du:daggom, bí édémbulum langkolo gíiyokuk. Édémíːpé séːkai aríglo duːmílo bíːsin okkomsin langkakupé gíladyoku. 32 Lutké yamné:démg méːpaːlangǃh 33 Séːkobí bík turra duːnamdém turyarmopé méːyéji, bí édém yogmoyé. Émpigeːla séːkobí turra duːnamdém yogmoyéji bí édém moturyé. 34 Ngo nolum lubidung, odo yumédo taniːannyiko lékkopé asupkolo yubbosula du:dodém, aːkom gípagboyéku odokké akondém mépagyé. 35 Mimé annyikoné lékkopé donam íla duːdodo; aːkom gípagboyéku odokké akondém mépagyé."
37 Luyírsunékídíːdé bím tauto, "Okolo, Ruːtuma?" Bí lulatsutoku, "Okolo simangé duːji, odo sogumé déngkumsuyé."