Tumbo-néːngkonémnaː Gamkoném Luyisula Lubinam
18
Odo Jisubí bíkkol luyírsunékídíːdém loːdém bulu kumna duːpé lagidag odokké édíloːsin méːdírmaːdopé luyisula lubinamko lubito. 2 Bí luto, "Taonkolo Ruːnémé pésomanggemaːnéla tani:yémsin taniːkopé kímané gamko dungngai. 3 Odokké édé taoníːdo tumbo-néːngkosin dungngai séːko bíkkodoːpé gíyartíla gíla kumna ludagai, 'Ngom ikisiyadnékídíːdok kekonpé ngom aro-kébangko baːpoːtei.' 4 Bí tadmaːpé duːyarpo:to; émpigeːla léddarpé bí aíém lusuto, 'Ngo Ruːnémé pésomanggom, taniːyém taniːpé kímanggom, 5 séː néːsé ngom ikisiyattíla duːnam légaːpé, bím aro-kébang baːnamko paːdopé ngo kaːbipoːpé, émmamílo bí ngokkoso:pé gítí gítíla duːla ngom ikisiyattíyéǃ"6 Odo Ruːtumbí luto, "Arolok-duːman gamdé okko émna luton édém tattok. 7 Suːpag Ruːnébí bík balenamkídíːdém aro-kébangém baːbimaːyenei séːkobulu longgé yummém bím kabbisuːla duːji? Bí bulum kaːdumsubima:yénei? 8 Ngo nolum lubidung, bí bulum aro-kébang baːnamko paːdopé émna lomdanna tadbiyé. Émgom, édílo Taniːké Ao:bí gíyékuji, bí mo:píso méːjígla duːné taniːyém pa:yélang?"
Parosiémnaː Murkong Urném Luyisula Lubinam
9 Séːkobulu aíém arolok-duːné émna méːsugeːla ammem méːtiddagji bulum séː luyisula lunambinamsém Jisubí lubito. 10 "Taniːannyikoné kumli:doːpé kumkolo gísangkang, aːko Parosikai odokké akondé murkong urnékai. 11 Parosidé dagge:la bík aísuampé kumtoː "Ruːné, ngo nom aipai bidung kapilaːné ngo angu-taniːémpé aimaːné, rodgoné, benggonémanggom séː murkong urné tani sémpé ruːmanam légaːpé. 12 Loːnídlo ngo loːnyiko menna kumdo odokké ngok panganam appíːdok íyíngkopé bipénamdém ngo bido.' 13 Émpigeːla murkong urnédé daggénoːla dakto.a Bíkké tayéːto:pé ngesanan angéːsin katomang, émpigeːla aíké angké:dém kíksuge:lab luto, 'Ruːnéno ngom ayaːtei, ngo imurnéko.' 14 Ngo nolum lubidung séː taniːsé akondémyaːsin Ruːnéké kanggaːlo arolok-duːné taniːko émnamdém paːla okumpé gíkangku. Kapilaːné séːkobí aíém bottépé méːsuyéji bím ajjiːné taniːpé imoyé, odokké séːkobí aíém ajji:suyéji bím botténé taniːpé imoyé."
Jisubí Ajjiné Koːkangkídíːdém Peyubinam
(Moti 19.13-15; Mark 10.13-16)
15 Longékoném taniːkídíːdé koːkangém Jisubí ri:yidbidopé émna bíkkodoːpé gíaːbodo. Odokké édílo luyírsunékídíːdé édém kaːtoji, bulu bulum morítto. 16 Émpigeːla Jisubí koːkangkídíːdém bíkkodoːpé gogge:la luto, "Koːkangkídíːdém ngokkosoːpé gíaːmoto, odokké bulum duːriyo, kapilaːné Ruːnék migomdokodé sémpin kídíːdokképag. 17 Ngo nolum arodém lubidung, séːkobí Ruːnék migomdokodém ajjiné ko:kang kísapé toríksuma:yéji bí odo édíloːsin gíabegma:yé."
Mité Mirémné Tani:dé
(Moti 19.16-30; Mark 10.17-31)
18 Longékoném mirémné mirokoné Jisumé tauto,"Ainé luyír-abu, turyarné turnamdém pa:nam légaːpé ngo okkom ipaːyen?"
19 Jisubí lulatsuto, "No kapila ngom ainé émdung? Ainé séːkosin kamang, Ruːnébí atérodéːmín ainén. 20 No Ruːnéké lulígnamkídíːdém kindagː 'Benggoyok, mokegoyok, dopsoyok, aroman lukaném lubiyok, ané-abbom ménggésulang.c'"
21 Bí luto, "Ngo koːkadokkébo séː appíːsém ibomna dung."
22 Édílo Jisubí édém tatton, bí bím luto, "Nokké suːpésin ipénam abangkoda dung. Nokké oko okko duːji appíːdém kopaggeːla opanném bitok. Odo tayéng-amoːto no paːpomko ompotiemd paːyéku; odokké gíla ngok lédulo gímíntok." 23 Émpigeːla édílo bí édém tattoji, bí airuːpé méːdírkang, kapilaːné bí mirémné taniːkai.
24 Jisubí bím kangge:la luto, "Ruːnék migomdokodo mirémné taniːké gíaːlanamdé émmuné agommangǃ 25 Kapéné uːtkonée pési amikkolok durkonamdéi émmumé, mirémné taniːkolok Ruːnék migomdokodok gíaːlaːnamdémyaːsin."
26 Séːkobulu édé lunamdém tattoji bulu tauto, "Émpémílo séːkobulum moturbiyén?"
27 Jisubí lulatsutoku, "Okkom taniyé ilaːdanmaːji édém Ruːnébí ilaːdag."
28 Pitorbí bím luto, "Kangkítok, ngolu ngoluk appíngém mépaggeːla nok lédulo gímíndungǃ"
29 Jisubí bulum luto, "Ngo nolum arodém lubidung, Ruːnék migomdokodok légaːpé séːkosin okumém, yamném, bírrangém, ané-abbom, ommangém mépagmang, 30 odokké suk turra duːdakso édémyang bojéyangko paːladyeku, odokké aːpéné ayírdo turyarné turnamdém paːyé."
Jisubí Lékoda Bík Sinamdém Lubisunam
(Moti 20.17-19; Mark 10.32-34)
31 Odok lédupé Jisubí yí:la:nyídém gíyodbogeːla bulum luto, "Kangkítok, ngolu Jerusalempé gísa:yé, odokké Taniːké Ao:dok légaːpé lungor-lunékídíːdé okkom adnoːla léːtuːji édé appíːdei arramyé. 32 Kapéné bím Jiudiman taniːlok alaglo tolígyé. Bulu bím lureyé, anyisumoyé, odokké bím takírém sugrumyé. 33 Bulu bím sabukki dínggeːla mokeyé, émpigeːla loumné longédo bí lékoda turyéku."
34 Émpigeːla édé okkan édém bulu okkomsin tatkintomang; édém bulukkolokkém kupsila léːtagai, odokké okkom luton édém bulu tatkineitomang.
Jisubí Migluné Kogonéko Ésaːmokunam
(Moti 20.29-34; Mark 10.46-52)
35 Jisubí Jerikodoːpé gípíngkíramdodo, lambé ruːyido migluné taniːko tedla kogola dungngai. 36 Édílo bí bojé:ko taniyém gípaddopé tatpaːsutoji, odo bí okko kapidun émna tauto.
37 "Najareddok Jisubí gípadla gídag," bulu bím lubito.
38 Odo bí kabla jéːto, "Debitké Ao Jisu, ngom ayaːteiǃ"
39 Séːkobulu gígébola dungngaji, bulu bím asoːpé duːdopé lurítto; émpigeːla bí jéːyangokang, "Debitké Ao:a, ngom aya:teiǃ"
40 Jisubí dakkang odokké taniːdém bíkkodoːpé gíbodoːpé lulíkto. Bí édílo kéraːdoːpé píngangkaːji, Jisubí bím tauto, 41 "Nok légaːpé ngom okkom iteika émna no méːdang?"
Bí lulatsutoku,"Ruːtuma, ngo kaːbeglíːdag."
42 Jisubí bím luto, "Émpém kaːbektokuk; nok méːjíksunamdé nom kaːbegmotoku."
43 Oddar bí kaːbekkangku, odokké bí Ruːnémé luyitsula bík lédulo gímínkang. Odokké édílo taniː appíːdé édém ka:toji, bulu appíːdé Ruːnémé luyitsuto.