Jisubíːlang Sokiyobí
19
Jisubí Jerikoːpé gíaːla odok gípatto. 2 Jerikoːdo Sokiyo émnam taniːko dungngai; bí abíngaryaːné murkong urnékai odokké bí mirémdagai. 3 Jisubí séːkon édém bí kaːlíla dungngai, émpigeːla bí koːdolanammé, taniyé bojébatsula Jisumé ka:beglaːtoma. 4 Édémpila bí kéréːdém dugnoːla gíla Jisumé kaːpé émna tajíg amíngkolo barsaːto, kapilaːné Jisubí édé lambí:dok gíla dungngai. 5 Édílo Jisubí odoːpé gípíːtoji, bí bérsaːla kanggeːla bím luto, "Sokiyo, lomna baryitoku; kapéné silo ngo nok okumdo duːyuppaːyé."6 Édémpila bí lomdanna baryitoku odokké méːpodanna bím boríksuto. 7 Édílo bulu édém kaːtoji bulu appíːdé bínbínaila luto, " Bí imurnéa taniːkolok okumno mibopé ila gídag."
8 Émpigeːla Sokiyobí dagrobge:la Ruːtummé luto, "Kangkítok, Ruːtumaǃ Ngok ompotidok orpongko ngo suːpag opaném bipé; odokké séːkaikolok ngo oːkai yadla laːtungamílo, ngo édémyang léːppikopé bibadla bilatkupé."
9 Jisubí bím luto, "Siloké longéso sé: okumsoːpé moturbinamé gía:do, kapéné sé: taniːséːsin Abraamké aoːko. 10 Kapéné yogla duːném magapkoloːlang moturbikolo Taniːké Ao:bí gítag."
Aín Anír Murkongém Luyisula Lubinam
(Moti 25.14-30)
11 Bulu Jerusalem kéraːpé píngadungaboi, odokké Jisuk lédílo gímínné taniːkídíːdé séːkobulu bík lunamkídíːdém tadla dungngaji odo Jisubí luyisula lunamko luto, odokké taniːkídíːdé Jisubí Jerusalempé gípíːdannai buluk migompé iyé émna méːto. 12 Odo bí luto, "Ainé éraːlok taniːkoné migompé tolíkkosugeːla gílatkunam légaːpé moːté:né mimongkoloːpé gíkang. 13 Bík gímangoːdapé bí bík pagbo íyíngko goggeːla aín anír murkong íyíngko bulum bito. Odokké bí luto, "Ngok kamadoːso nolu sé: murkoːsém agerro líglang.' 14 Émpigeːla bík moːtagdok taniːkídíːdé bím aipé-méːmaːla bík lédudo barígém sémpé lubidopé mélíkto, 'Sé: taniːsém ngoluk tayéːlo migompé dodopé ngolum lagimang.' 15 Bím migompé tolígnam lédupé bí okumpé gílattoku, odokké bík murko bipoːnam pagbokídíːdém murkongém éddíkko paːsettoji édém kinnam légaːpé bulum gogdopé mélíkto. 16 Gíangarpoːnédé gíanggeːla luto, 'Ruːtuma, nok anír murkong akodé íyíngkopé murkongém paːsetto.' 17 Bík ruːtumdé bím luto, 'Airuːpé aidag, aroné pagbonoǃ Kapilaːné ajji:ouné agerro nom méːtinsulaːnamko, édémpila no nogor íyíngkolok tayéːlo ruːtumpé iye.' 18 Odokké akondé gíanggeːla luto, 'Ruːtuma, nok anír murkong akodé angngkopé murkongém paːsetto.' 19 Bík ruːtumdé luto, 'No nogor angngokolok tayéːlo ruːtumpé iye.' 20 Odokké pagbo akoda gíanggːla luto, 'Ruːtuma, sidé nok anír murkoːdé; okodém ngo dumérro yegla léngka. 21 Ngo nom pésokang, kapilaːné no makkeresiyaːné taniːko. No okkom léngama:ji édém la:lendakku odokké nok pidlígma:namém no gaddakku.' 22 Bík ruːtumdé lulatsutoku, 'Nok aíké agom lukamdémpé ngo nom kébangém baːyé, no aiman pagbonoǃ No kindagamaːlang ngo makkeresiyaːné taniːko émnamdém, ngo okkom léngamaːji édém la:lendoku, odokké okkom pidlígmaːngaji édém gaddoku émna?' 23 Émpém kapila no ngok murkoːdém murkong méko-okumkolo méːtoman, méːnamka:mílo ngok gíladdokudoso odok léːrédém ngo paːmayaːlang?' 24 Odo bí odok dagla duːnékídíːdém luto, 'Bíkkolokkém anír murkoːdém laːpaggeːla íyíngko anír murkong kanédém bita.' 25 Bulu bím luto, 'Ruːtuma, bíkké anír murkongé íyíngko duːbo.' 26 Bí lulatsuto, 'Ngo nolum lubidung, séːko aipé geryéji, bím bojéko bisedyé, émpigeːla séːko aipé germaːyéji, odokké bík kanamoudémsin bíkkolokkém la:pagbiyé. 27 Odokké édébulu ngok mirukídíːdé séːko ngom buluk tayé:lo migom domolíːmaːji, bulum soːpé gíaːbogeːla mokkeyamtok.'"
Jisuké Jerusalempé Migom Kísapé Gíangkunam
(Moti 21.1-11; Mark 11.1-11; Jon 12.12-19)
28 Jisubí édém lunam lédupé, bí bulum gípoːyaːla Jerusalempé gísangkang. 29 Édílo bí Olib adi kérangké Betpajpélaː Betaniːpé gípíngkíramtoji, bí bíkkol luyírsuné annyikoném ménoːlíkto, 30 Noluk kaːpangko élé doːlungoloːpé gíkang, odo gíaːdodo, édíloːsin taniː sangkimaːnam gadong-aoːko rínna léːdopé ka:beksuyé. Édém tanggeːla ngokkosoːpé sobomnangku. 31 Édém kapila nolu taːdun émna séːkai taumílo, Ruːtumbí sidém lagidung émna bím lubilang."
32 Séːkobulum ménoːlíktagaːji bulu gíla bí bulum lukamardémpé édém paːto. 33 Gadong-aoːdém bulu taːla duːdodo, odok ruːtumdé bulum tauto, "Kapila nolu gadong-aoːdém taːdun?"
34 Bulu lulatsutoku, "Ruːtumbí sém lagila dung." 35 Odokké bulu gadong-aoːdém Jisukodoːpé sobomdoku, buluk gétémnam galugém odok tayéːdo bulu uːlígge:la Jisumé odo saːmoto. 36 Bí saːbomna gídodém, taniːkídíːdé buluk gétémnam galugém lambédo pulíkto.
37 Olib adiːdokké gítokodok kéraːdoːpé édílo bí gípíːtoji, gímínné taniː appiːdé buluk kaːnam takam méːpílaːmaːnam agerkídíːdok légaːpé méːporobla bottépé jéːla Ruːnémé luyitsutoː 38 "Ruːtumké aminnok gíné migomdé ayang-paːné. Tayéng-amo:to asin-ansíngé odokké tayéngarya:pé írroiǃb"
39 Gíkumsunékídíːdok ara:lokké Parosi ékké Jisumé luto, "Luyír-abu, nokkol luyírsunékídíːsém moríttokaiǃ"
40 Bí lulatsutoku, "Ngo nolum lubidung, bulu aso:pé duːmílo, séː ílíngkídíːsé jéːrobbomyé."
Jerusalemké Légaːpé Jisuké Miksi Dínam
41 Jerusalemdoːpé gípíngkíramdodo bí nogordém kaːla odok légaːpé kapto, 42 odokké luto, "No ayi, no, siloké longésoi okko nom asin-ansíngém bilaːdang édém kinnamkaːmílo aidagai, émpigeːla édémbulum nok amiglokké léːsila léːtag. 43 Kapéné noluk tayé:lo sémpin longéko aːyé, édílo noluk mirukídíːdé nolum baːriːém pedyeddanna noluk lambém rakkabla nolum yadribomna du:yé, odokké appí:lokké nolum moaːbomyé. 44 Nomnaː nok ommangém nok yedrisula dungko arangíːdo momígyéc. Bulu ílíng apíko píkondok tayé:do duːmoma:yéd, kapilaːné no nok kéraːpé Ruːnéké gíkaːla kaːnamdém kintomang."
Kumli:doːpé Jisuké Gínam
(Moti 21.12-17; Mark 11.15-19; Jon 2.13-22)
45 Odo Jisubí kumli lottaːdoːpé gía:la attar kola duːnékídíːdém ménropto. 46 Odokké bí bulum luto, "Sémpé adla léːtag, 'Ngok okumsé kumko-okumpé iye,' émpigeːla nolu sém rodgoné tani:lok diːrumpé imoto.e"