Jisumé Méːmola Taukaːnam
(Moti 21.23-27; Mark 11.27-33)
20
Longékoném édílo Jisubí kumli lotta:do luyírémnaː tatpon lutaddém taniːkídíːdém lubila dungngan, abín miríkídíːdéːla luro luyírnékídíːdé lékkopé midumkídíːdok lédílo bíkkodoːpé gído. 2 Odokké bulu luto,"Ngolum lukítei no oko ilang-gílangki sémbulum kumliːdo ikan odokké séːko nom séː ilang-gílanamsém bitang?"3 Bí lulatsutoku, "Ngoːsin nolum oːkaiko tauyé; ngom lukítei, 4 Jonké baptis binamdé Ruːnékolokaːnei taniːlokkan?"
5 Édé agomdém bulu buluk aíké arangíːdo luposuto, "Ngolu Ruːnékotokké émmílo, bí tauyé, émpém nolu kapila bím méngkésutoman?' 6 Émpigeːla ngolu taniːlokké émmílo, taniːappíːsé ngolum ílíngki géye, kapilaːné Jonbí lungor-lunékai émna bulu aroruːpé méːdagai." 7 Édémpila bulu lulatsuto, "Édé okolokkaːsong édém ngolu kinmang."
8 Jisubí bulum luto, "Émpém ngoːsin nolum lubigeːmang ngo oko ilang-gílangki sémbulum idoji."
Angur Ba:ri Inékoném Luyisula Lubinam
(Moti 21.33-46; Mark 12.1-12)
9 Bí luyarra lula séː luyisula lunamsém taniːkídíːdém lubitoː "Taniːkoné angur ba:riko ika odokké édém aríg-iné ékkém bondokpé bigeːla arai araipé okolaipé gíkang.a 10 Édílo angur aːyem pírkanan ayírdé angkan odo bí bík paːpénam aːyém pírdokupé pagboːko aríg-inékídíːdo:pé mélíkto. Émpigeːla aríg-inékídíːdé bím démgeːla alag angaraːpé mélíktoku. 11 Bí pagbo aːkoda mélíkto, bímsin bulu démgeːla anyisumoto odokké alag angngaraːpé mélíktoku. 12 Su:sin bí akoda mélíkto, bulu bím démmígdangeːla baːri ruːyidoːpé gélenníkto. 13 Odo angur baːridok ru:tumdé luto, 'Ngo kapé iyyan? Ngo ngok méːbomsunam atér aoːsém mélíkpé; bulu bím ménggésulaːdo.' 14 Émpigeːla édílo aríg-inékídíːdé bím ka:ton, bulu akoné akoném luto. 'Séːpagmín yamporoːké ruːtumdén, édémpila kajé bím mokelai, odo séː baːrisé ngolukképé iye.' 15 Édémpila bulu bím baːri ruːyidoːpé gélennígge:la bím mokepakto.
Odo angur baːridok ruːtumdé bulum kappar iyen? 16 Bí gíge:la aríg-inékídíːdém mokkeyé odokké angur baːridém séːkai akoném bipagyé."
Édílo bulu édém tattoji, bulu luto, "Édémpé édíloːsin ipélagimangǃ"
17 Jisubí bulum kanggeːla tauto, "Émpémílo séː adla léːnamsok légíːdé okkon?
'Oko ílíːdém okum-monékídíːdé ager kamang émna típakkaji
éddar tígodlíkpoːnamb ílíːpé ikang.c
18 Édé ílíːdo ogabné appíngéi omíg-osígyé, odokké édé séːkom ogabyéji bím pitaːpé imodanyé."
Migomém Séur Bipénamdém Taunam
(Moti 22.15-22; Mark 12.13-17)
19 Luro luyírnékídíːdéːlang abíné miríkídíːdé odo ayírardo bím sogappé méːla lambéko mago:to, kapilaːné bulu kinto édé luyisula lunamdém bulumrung lunatag émna. Émpigeːla bulu taniːkídíːdém pésokang. 20 Bulu solko magola duːto odokké angoːla duːdopé taniːyém mélíkto, séːkobulu arolok-duːné taniːyémpé bík lédulo gímínto. Bulu Jisuké agomdok lumurnamko sogabgeːla bím amoːruːtumnoglaː ilang-gílangkaːnélok alaglo tolíkpé émna. 21 Édémpila bulu bím tauto, "Luyír-abu, ngolu kindag no arrom ludag odokké édém luyírsindag, odokké no séːkaimé anguruːpé kéyamang, émpigeːla Ruːnéké lambédém arodok lédílo luyírdag. 22 Suːpag ngolum lukítei ngolu Kaisarmé urnam-murkongém bipadoyé bipama:yé?"
23 Bí buluk asindém kangkurgeːla bulum luto, 24 "Ngom Ruman-murkong-apirko léngkankí. Sék moimangélaː abígém sok tayéːso bíktang? "
Bulu lulatsutoku,"Migom Kaisarké."
25 Bí bulum luto, "Émpémílo Kaisarmé bitopén, okodé Kaisarkén édém Kaisarmé bilang, odokké okodé Ruːnékén édém Ruːnémé bilang."
26 Odo taniːkanggapé bulu bík lunam agom tayéːdo okkomsin edgablaːtomang, édémpila bík lulatsukunamdém tadla tadngaksula bulu asoːpé dungkang.
Sikolokké Lékod-Turkunam Tayé:dok Taunam
(Moti 22.23-33; Mark 12.18-27)
27 Sodduki ékké séːkobulu lékod-turkunam kamang émdagji, Jisukodoːpé gíla tauto.d 28 Bulu luto, "Luyír-abu, Musiːbí ngolukképé adla léːbitag, taniːkolok bíroko ommang kamaːpé néːdém tumbopé sinomílo, taniːdé tumbodém midaːmogeːla bík bírodokképé ommangém obipé lagiyé.e 29 Suːpag bírrang kínítko dungngai, obopoːlumdé yamné:ko laːto, émpigeːla ommang kamaːpé sikang. 30 Bík lédíkédé tumbodém midaːmoto odokké bíːsin sikang, 31 odokké bík lédídokkédé bím yamné:pé laːto; odokké édémíːpé kíníddé ommangé kamaːpé singapkang. 32 Léddarpé, néːdéːsin sikang. 33 Suːpag, lékod-turdokudodo bí sék né:pé iyékun? Kapilaːné bírrang kíníddéi bím yamné:pé langka."
34 Jisubí bulum lulatsutoku, "Séː ayírsok taniyé midangém modag odokké amilo bidag. 35 Émpigeːla séːkobulum édé aːpéné ayírdo gíanan odokké sikodokké lékod-turkunan arré kadag émna saptuji, bulu midangémsin momang odokké amiloːsin bimang. 36 Odokké bulu lékoda silangkumaːbo; kapilaːné bulu tayéng-ya:me kísadag. Bulu lékod-turkunammé bulu Ruːnéké ommangé. 37 Émpigeːla suːpag sinné turkunam doːyíːdo, édém Musiːbí édílo míːmené ísíːdok doːyíːdém atkaːji odo léngkanbitag. Abraamké, Isakké, odokké Jakupké sinam bojérungko lédupé Ruːnébí Abraamké, Isakké odokké Jakupké Ruːné émna lukanbito.f 38 Bí turnélok Ruːné, sinélok Ruːnémang, kapilaːné bíkkolo appíngé turra dung."
39 Luro luyírné ékké luto, "Luyír-abuno, aipé lutodaǃ" 40 Odokké séːkosin lékoda bím oːkaiko tadnan angé katomang.
Kiristobí Sék Aoːon
(Moti 22.41-46; Mark 12.35-37)
41 Odo Jisubí bulum luto,"Édé kapé bulu Kiristobí migom Debitké aoː émna lukan? 42 Kapéné Debidbí aíːdéi Niːtom Potindo lutag,
'Ruːné Jiuabí ngok Ruːtummé lutoː
Ngok lagbíkpé tettokai,
43 édíloːpé ngo nok mirukídíːdém nok lépobok samtakpé imoma:yéji.'g
44 Debidbí bím Ruːtum émka; édémpimílo bí kapé Debitké ao:pé ila:yén?"
Luro Luyírnékídíːdok Kekonpé Ansudopé Lupang
(Moti 23.1-36; Mark 12.38-40)
45 Édílo taniːappíːdé tadla dungngan, Jisubí bíkkol luyírsunékídíːdém luto, 46 "Luro luyírnékídíːdém totsulang. Bulu pari kadopé gége:la gígolíːdag odokké réko-kokolo amme bulum kumríksutei émna méːdag odokké murong-okumno aiyapagné tetkolo tedlíːdag odokké doko-tíngokolo ménggésuko taniːlok tetkolo tedla dolíːdag. 47 Bulu tumbo-néːngkídíːdém mokagdag odokké amme tadyépé émna arai araipé kumdag. Édémpila bulum kínggíːyaːpé mokemomarém biyé."