Tumbo-Néːdok Séur Binam
(Mark 12.41-44)
21
Jisubí ngeːsanammé mirémné taniyé kumli:dok murko-kumsudo buluk séurém lígdopé ka:to. 2 Odokké opanné tumbo-néːngkoné duːonangko odo lígdopésin bí kaːto.a 3 Odo bí luto, "Ngo nolum arodém lubidung, sé: opanné tumbo-néːsé: appíngkémyang bojéya:ngko líkto. 4 Kapéné sé: tani appíːsé buluk bojéruːngko kakodok lígdung, émpigeːla sé: néːsé bík opanpankurakkodok bíkké okko dungngan édé appíːdém líkto."Kumli Momígnamdém Lunonam
(Moti 24.1-2; Mark 13.1-2)
5 Jisukkol luyírsuné ékké kumli:dém éddík kangkanné ílíngkilaː Ruːnémé binam tosagnam amankídíːdokki tíbuːla léːtang édém luposula duːnamdém tatpaːla Jisubí luto. 6 "Okkom nolu suːpag kaːbegduːji, édílo ayírdé a:yéji; odo ílíng apíkolok tayé:lo ílíng apíko du:maːyé, appíːsém érpagamnígyé."
Méːdírélaː Ipusire
(Moti 24.3-14; Mark 3.3-13)
7 Odo bulu bím tauto, "Luyír-abu, édílo édémpé iyen, odokké édémpé ikanduːbo émnamdok kanggoddé kapé iyen?"
8 Bí lulatsutoku, "Amme nolum yadlamaːdopé, ansukaːsula duːlang. Kapilaːné bojéru:ngkoné ngok aminno gíla lusuyé, 'Ngouːíng bí, odokké 'ayírdé aninkaːbo.' Émpigeːla buluk lédulo gímínyok.b 9 Édílo nolu mimag monamémnaː migom kekonpé urradnammém tadbegyéji, odo pésoyok. Édémbulumpé ipopa:yé, émgom édé itér ayírdé émna méːyok."c
10 Odo bí bulum luto, "Taniːopíné taniːopínnok kekonpé, odokké migomdokko migomdokolok kekonpé dagrobyé. 11 Botténé taromotoné tonyé, mongké mongkélo angkaːlélaː sileːé aːye; odokké doːmírto míryadgédopé pésokannamélaː bangkí bangkíné kanggodém kaːbegyé. 12 Émpigeːla édémpé imangoːdapé bulu nolum alagém laglíggeːla ipusire:yé; murong-okumnoːlang makanaːlo tumyé, odokké ngok amin légaːpé nolum migomnoːpélang amoːruːtumkídíːdoːpé soaːbomyé.d 13 Nolu bulum lubikunépé inam lambéko paːnam légaːpé édémpé iye. 14 Émpigeːla kapé lurasuyyan émna noluk asinbo méːnoːla méːdírra duːyok. 15 Kapéné ngo nolum lupénamkídíːdém luyírbiyé odokké méːjoːnamém biyé odo noluk miru aːkosin nolum lurasin lama:yé, lukepsin laːma:yé. 16 Nolum ané-abbo, bírrangé, ope-négíngé odokké ajonésin yadyé, odokké bulu nolukkolok akkem mokemoyé. 17 Ngok légaːpé takam taniyé nolum tayumyé. 18 Émgom noluk tukkudok dumíd asongkosin orima:yé. 19 Noluk oijosula duːnamdokki nolu aíké turnamém paːyé.e
Jerusalemdém Momígnam
(Moti 24.15-21;Mark 13.14-19)
20 Édílo nolu Jerusalem nogordém maglíngé duːyedla duːdopé kaːyéji, odo nolu kinyé nogordém momígnam ayíré píngangkaːbo émna. 21 Odo séːkobulu Judiado duːji bulu diːtékídíːdoːpé dukpítsulang, nogordok duːnékídíːdé gílenyok odokké ruːyidok duːnékídíːdé nogordoːpé gíayokuk. 22 Kapéné édé mokemoramnan ayíré okkom adla léːtang édé appíːdém ilet-gílednan ayíré. 23 Amírrokala duːnéla: anyuksunna duːné anékídíːdokképé édé longékídíːdé éddíko pésokanyéjiǃ Kapéné moːpísok tayéːso kínggíːné ngasodé a:yé, odokké taniːlok tayéːlo Ruːnéké kínggíːné aglíngé aːye. 24 Bulu yoksalo siyé odokké kangkímaːnam mimong appíːloːpé bulum yébomyéku. Odokké édíloːpé buluk ayírdé gíngabmaːyéji odoloːpé Jerusalemmé Jiudiman taniyé buluk alé kéígbo sammígyé.
Taniːké Ao:ké Gíkunam
(Moti 24.29-31; Mark 13.24-27)
25 Odo doːnyito, poːloto odokké takarro kangkímaːnam kanggodém kaːbegyé. Mo:píso tani réngamé méːdíryé, kapilaːné bulu gaːnéloglaː seseralok ngomnamém tadla pésoyé. 26 Moːpíso okko kapikaːji émna taniyé pésola yallo kamapé ingabyé, kapilaːné doːmírtok duːnékídíːdém éngunmoyé. 27 Odo Taniːké Ao:mé mukkaːlo tornamki odokké kínggíːné unjíglo gídokupé bulu kaːbegyé. 28 Édílo sémbulum irobyéji, daksa:la kaːlang, kapilaːné nolum moturkunamdé kéraːpé píngangkaːbo."
Tajíg Ísiːdok Kinpénam Agom
(Moti 24.32-35; Mark 13.28-31)
29 Odo Jisubí bulum luyisula lunamko lubitoː "Tajíg amídémnaː akon amíngkídíːdém kangkítok. 30 Édílo buluk anné nginnédokuji, nolu aíkídíːdé kaːbeksula kindag díiyé aninduːbo émna. 31 Édémíːpé, édílo nolu édémbulum inamdém kaːbegyéji, odo nolu kinnang Ruːnék migomdokodé aninkaːbo émna.
32 Ngo nolum arodém lubidung, édíloːpé sémbulum idoːpé kaːbeksuma:yéji, odoloːpé sé: tani opesé: siporuːmaːyé. 33 Doːmírtéːlang mo:písé yogyépé, émpigeːla ngok agomé édíloːsin yogma:yé.f
Ansukaːsupé Lagidag
34 Ansulang, émmamílo noluk asiné turnam légaːpé méːla, tíngur dongursula odokké turnam légangé méːdírra tébégbatsuːpéké odokké édé longédé noluk kéraːpé bagémpé aːla nolum ketelep kísapé togappéké.g 35 Kapilaːné mo:písok duːné appíngkolo édé ayírdé aːye. 36 Émpigeːla édé aːpéné ngasoddokké gípítsulanan tornam kanam légaːpé odokké Taniːké Aoːké kangga:lo dakkansunan arré kadopé, loːdísém totsula kumyarra duːlang."