LUK 22

Jisumé Mokepé Émna Ruːsunam

(Moti 26.1-5; Mark 14.1-2; Jon 11.45-53)

Odo kar lígmaːpé pitang donam gíːdí okodém Gíbo:la donam gíːdí émdoji édé píngadaggaboi. 2 Abíné miríkídíːdéːla luro luyírnékídíːdé Jisumé kapé mokelaːyén émna lambéko mago:to, émgom bulu taniːkídíːdém pésodaggai.

Judaːbí Miru Alaglo Jisumé Tolíkpé Émna Togésunam

(Moti 26.14-16; Mark 14.10-11)

3 Odo yíːla:nyídok Judakolo, séːkom Iskortia émdon, Uiːbí durangkang. 4 Édémpila Judabí abíné mirí odokké kumli:dém kangabné opisarkídíːdo:pé gíla bí Jisumé sogabla kapé buluk alaglo biyéji édém ruːsuto. 5 Bulu méːyumsula bím murkongém bipé émto. 6 Édémpila Judabí togésuto odokké taniyé rongngamdodo bí Jisumé sogabogeːla buluk alaglo tolíkpé émna lambéko magola duːto.

Jisubí Gíboːla-donam Gí:díːdoːpé Moninsunam

(Moti 26.17-25; Mark 14.12-21;Jon 13.21-30)

7 Kar lígmaːpé pitang donam longédé, oko longédo gíbo:la-donamdok meːr-aoːdém palígdoji édé pínganammé, 8 Jisubí Jonmélaː Pitormé, sémpé lula mélíkto, "Nolu gíkang odokké ngoluk légaːpé Gíbo:la-donamdok donam-tí:namdém moninsunoːta."

9 Bulu tauto, "No okolo ngolum édém moninsunodopé méːdang?"

10 Bí lulatsutoku, "Kangkí, nolu nogordoːpé gíaːdodo, asi ki:língko joːbomkuné taniːko ríksuːyé. Bík gíangkoku okumdoːpé nolu gímínnang, 11 odokké okum-ruːtumdém lulang, 'Luyír-abubí lulíktagː Ngo ngokkol luyírsunékídíːdok lédílo Gíbo:la-donamdok donam-tíːnamdém dojonsupéko mibo dungko soyardé okolon?' 12 Odo bí nolum okodém léːnoːbituji, tayéngké-moːola:to botténé soyarko léngkanbiyé, nolu odo moninsulang."

13 Bulu gíla Jisubí bulum lunamardémpé appíːdém paːto. Édémpila bulu Gíbo:la-donamdok donamdém moninsuto.

Ruːtumké Dobonam

(Moti 26.26-30; Mark 14.22-26; 1 Kor 11.23-25)

14 Édílo ayírdé angkaːji, Jisubí:laː mélígnamkídíːdé doko tebuldo nírasula tetto. 15 Odokké bí bulum luto, "Ngo simangoːdapé séː Gíbo:la-donam gíːdí:sok donamsém noluk lédílo dojonsupé émna airu:pé méːyarra dungngai. 16 Odokké ngo nolum lubidung, "Édíloːpé Ruːnék migomdokodo sok agerdém ilet-gíledmaːyeji odoloːpé ngo lékoda sém dopongkuma:bo."

17 Odo bí batiːko tísato, odokké édílo bí aipai bitoji odo luto, "Sém langgeːla noluk araːlo orpansuto. 18 Ngo nolum lubidung édíloːpé Ruːnék migomdokodé aːmaːyéji odoloːpé ngo lékoda séː tí:namsém tí:maːyé."

19 Odokké bí pitangko laːsato, aipai bigeːla édém pentuːto, odokké édém bulum bito. Odok lédupé sémpé luto, "Séː ngok adiné okodém noluk légaːpé bitag; ngom méːpa:la duːnam légaːpé sém iyartílang." 20 Édémíːpé, donam lédupé, bí batiːdém tísanggeːla luto, 'Séː batiːsé ngok íːilok anupé luségnamdé, okodém noluk légaːpé pílenbitag.

21 Émpigeːla kangkítok, ngom yadla-kopagpénédok alagdéːsin ngok lédílo séː doko tebul tayéːsé dung. 22 Taniːké Aoːmé ruːlígnamdémpei iye-gíyé, émpigeːla méːdírré édé taniːdoːpé séːkobí bím yadla-kopagyéji."

23 Buluk araːdok édémpé ipéné taniːdé séːkobín émna bulu akoné akoném buluk araːdo taumínsuto.

Bottéyaːnédok Tayé:lo Lumínsunam

24 Séːkarmé bottéya:né émna ménggésuyéji odok tayéːlo buluk araːdo lumínsunamko lenkang. 25 Jisubí bulum luto, " Sé: mo:píso migomkídíːdéːlang ilang-gílangkané taniːkídíːdé buluk taniːkídíːdok tayéːlo ruːtumpé idag; odokké bulu bulum kaːdumsudo émna lusudag. 26 Émpige:la nolu bulukkémpé iyok. Noluk araːlok bottaryaːnédé ajji:yaryaːné kísapé ilang, odokké mirodé pagbo kísapé ager gerrang. 27 Séːkobín botténédén, tebuldok tednédé:yé, orra duːnédén? Édé tebuldok tedla duːnédéma:lang? Émgom ngo noluk lédílo ager-gerné kísapé dung.

28 Ngok ngasod ayír appíːdo ngok lédílo duːmínna duːnékídíːdé nolu. 29 Ngok Abubí ngom migomdoko aːko binam kísapé, ngoːsin nolum migomdokoko bidung, 30 édémpila nolu ngok migomdokodo ngok tebuldo domín-tíːmínyé, odokké migom-tetkokídíːdo tedla Israeldok yíːla:nyí opíndém kébangém baːyé.

Pitorké Lupaksunamdém Jisubí Luno:bito

(Moti 26.31-35; Mark 14.27-31; Jon 13.36-38)

31 Simonéí, Simona, kangkítok, Uiːbí nolum bíkképé imolí:dung, odo bí nolum aːmém rengkampé reːyé. 32 Émpigeːla nok méːjíksunamdé yogmadoːpé, ngo nok légaːpé kumbika. Odokké no méngkutsulangkula nok ajonkídíːdém kínggí:molangku."

33 Odo Pitorbí lulatsutoku, "Ruːtuma, ngo nok lédílo makanaːloːpélaː sikoloːpé gímínpé lenna dung."

34 Jisubí lulatsuto, "Ngo nom lubidung, Pitora, siyum porogé kogmango:dapé, no ngom kinmang émna léumkopé lupaksuyé."

Murkong Payég, Sogén odokké Yoksa

35 Odo Jisubí bulum tauto, "Édílo ngo nolum murkong payég, sogén odokké létaggém bilígma:pé mélíkka, odo nolukké o:kai pí:ramkanei?"

Bulu lulatsuto, "Ma, okkosin pí:ramangngai."

36 Bí bulum luto, "Émpigeːla suːpag nolukké murkong payégé duːmílo, édém bomnang, odokké sogénkosin duːmílo bomtélang; odokké nolukké yoksé kama:mílo, noluk gétémnam galugdém kopaggeːla asongko rélang. 37 Kapilaːné okkom adla léːtuːjiː 'Odokké bím imurnékídíːdok lédílo sapté:to, odokké ngo nolum lubidung, séː ngokkolo ilet-gíledyé.' Arro, okkom ngok léga:lo adla léːtuːji édém ilet-gílednan ayírdé píngangí:ka:bo."

38 Luyírsunékídíːdé luto, "Ruːtuma kangkíto, séː yoksa soːnyiko dung."

Bí lulatsuto, "Édé pí:dagbo."

Olib Adiːdo Jisuké Kumnam

(Moti 26.36-46; Mark 14.32-42)

39 Lo:díːsém gíyarra du:namíːdémpé Jisubí Olib aditoːpé gísangkang, odokké luyírsunékídíːdé bík lédílo gímínto. 40 Odoːpé gípínggeːla, bí bulum luto, "Anka:lo opaglema:dopé nolu kumnang."

41 Ílíng apíko érpíng kíramkopé bulukkolokké bí gíyodoːula lébíːtumna kumto, 42 "Abu, no mé:dumílo séː duːgdopénam bati:sém ngokkolokké langértei, émgom ngok méngkampémang, nok méngkampépag ipé lagidag." 43 Tayéng-amo:tokké tayéng-ya:meko dakkansugeːla bím kínggí:moto. 44 Asiné rébugédopé kila bí kínggí:yaːpé kumto, odokké bík angkiré íːyempé abug abukpé amoːboːpé díletkang.

45 Édílo bí kumkodokké darobla luyírsunékídíːdo:pé gílattokuji, bulum méːdír-méːsola yubngaksuːla duːdopé paːto. 46 Bí bulum tauto, "Kapila nolu yubngasula dun? Darobgeːla kumto odopag nolu anka:lo opagledma:yé."

Jisumé Sogabnam

(Moti 26.47-56; Mark 14.43-50;Jon 18.3-11)

47 Bík agom lula duːdí:do bojéko taniyé gíaːdo; yíːla:nyídok a:ko séːkom Juda émtang bí bulum gígéboːla gído. Bí Jisumé dosukpé émna bík kéra:pé gíangkang, 48 émpigeːla Jisubí bím tauto, "Juda, Taniːké Aoːmé no dosugnamki yadla-kopagdun?"

49 Odo okko kapiduːji édém édílo Jisuké gíjonkídíːdé kaːtoji, bulu luto, "Ruːtuma, ngolu ngoluk yoksaki pabompei?" 50 Odokké buluk araːdok aːko abíngaryan mirídok pagbodok lagbíkké yeruːdém papagbito.

51 Émpigeːla Jisubí lulatsuto, "Lékoda sémpé iyokǃ" Odokké bí taniːdok yeruːdém gakkibigeːla aimotoku.

52 Odo Jisubí abíné miríkídíːdém, kumli:dém kangabnékídíːdok opisarkídíːdém, odokké midumkídíːdém séːkobulu bím mala gídoji bulum luto, "Ngo rodgonéi, nolu yoksém tukuném alaglo bomna ngokkosoːpé gídun? 53 Ngo noluk lédílo loːdéméi kumli lottaːdo duːmíndungai, émgom nolu ngom alakko laglíkkítoma. Émpigeːla séː noluk ayíré édílo kémoké tornamdé agerém gerdun."

Pitorbí Jisumé Lupaksunam

(Moti 26.57-58; 69-75; Mark 14.53-54; Jon 18.12-18,25-27)

54 Odo bulu bím sogabgeːla abíngaryan mirídok okumdo:pé gíbotoku. Pitorbí moːténgoːupé gímínto. 55 Émpigeːla édílo bulu kéːbaːbangko lottaːdok pongkogdo umí parra lékkopé tedla amsuton, Pitorbí buluk lédílo amsumínto. 56 Bík tedla umí amsula du:namdém pagnékoné kaːto. Bí bím kaːmila kanggeːla luto, "Séː taniːsé bík lédílo dungngai."

57 Émpigeːla bí édém lupaksuto. Bí luto, "Koːnénga, ngo bím kinmang."

58 Odok ajjiouko léddoːupé séːkai akonkoné bím kanggeːla luto, "Noːsin bulukkolok aːko."

Pitorbí lulatsutoku, "Ngoːmangkéí aminoǃ"

59 Odok asudoːuko lédupé taniːko aro-aropé kindanna luto, "Aroruːpé séː amisé bík lédílo dungngai, kapilaːné bí Galili taniːko."

60 Pitorbí lulatsutoku, "Ai amiya, no okkoméi ludusong édém ngo kinmangkéíǃ"

Bík lula duːdardo, porogé kokkang. 61 Ruːtumbí ngelatsula Pitormé kaːnamé. "Siyum porogé kogmangoːdapé, no ngom léumko lupaksuyé." Odo Pitorbí Ruːtumké bím lunam agomdém mé:paːtoku. 62 Odokké bí ruːyipé gílenna asinang kigosudopé kapto.

Jisumé Luregeːla Díːnam

(Moti 26.67-68; Mark 14.65)

63 Jisumé kanggabla duːné taniːkídíːdé bím luregeːla díːbomkang. 64 Bulu bík amigém yengkabgeːla, bím dínggeːla, tadmo tadmola tauto, "Lukíto séːko nom díːton?" 65 Odokké bulu bím bojéru:ngko aima:síːmaném anyisudopé luto.

Jisumé Kébaːbaːnam

(Moti 26.59-66; Mark 14.55-64; Jon 18.19-24)

66 Píangé pínamé, abíné miríkídíːdé, luro luyírnékídíːdéːla midumkídíːdé lékkopé gíkumsuto, odokké Jisumé buluk kébaːdoːpé gíabodo. 67 Bulu luto, "No Kiristo bíːmílo, ngolum lutei."

Jisubí lulatsuto, "Ngo nolum lubimíloːsin, nolu ngom méngkésumaːyé, 68 odokké ngo nolum oːkai taumílo, nolu lulatsukumang. 69 Émpigeːla suːpakkolokké Taniːké Aoːbí kínggíːtaríné Ruːnéké lagbík alagdo tedyé."

70 Bulu appíngé bím tauto, "Émpémílo noːíi Ruːnéké Aoːdén?"

Bí lulatsutoku, "Arro noluk lunamdé, Ngoːíng bí."

71 Odo bulu luto, "Ngolu aíké bík nappaːdok édém lusunamém tatsudung. Ngolum sémyang oko lubikunamém lagiyaːdang?"