Jisumé Pilatkodoːpé Gíbonam
(Moti 27.1-2,11-14; Mark 15.1-5; Jon 18.28-38)
23
Kébaːdoːpé gíkumsuné appíːdé odo dagrobgeːla bím Ruman amoːruːtum Pilatkodoːpé gíbokang. 2 Odo bulu bím lujémropto, "Séː taniːsé ngoluk réngamsém gíyodbodopé ngolu paːto. Bí Ruman migom Kaisarmésin urnam-murkongém bimadoːpé lutumdag odokké bí Kiristo, migombí émsudag."3 Piladbí Jisumé tauto, "No Jiudikídíːdok migomdé:yé?"
Jisubí lulatsutoku, " Éí, nok lukamíːdémpé."
4 Odo Piladbí abíné miríkídíːdémnaː gíkumsunékídíːdém lubito, "Séː taniːsok kébangko bangkanané imur okkomsin ngo paːmang."
5 Émpigeːla bulu luyartíto, "Judiaːdok taniːappiːdém bí bík luyírnamki luːurramníktag. Bí Galiliːdo luːurpoːto odokké olokké soːpé luːurkolo gídung."
Jisumé Erotkodoːpé Mélíkto
6 Édém tatpaːsula Piladbí tauto, "Séː taniːsé Galiliːdokkei? 7 Jisubí Erotké migomdoko amoːdokké émna édílo bí kintoji, bí bím Erotkodoːpé mélíkto, kapéné Erodbí odo ayírdo Jerusalemdo dungngai. 8 Édílo Erodbí Jisumé kaːpaːsuton, bí airuːpé méːpokang. Kapéné bí édílailoːkkébo bím kaːlí:la dungngai. Kapilaːné bí bík agerém tatílai dung odokké bíkkolok méːpílaːmaːnam agerko kaːpaːpé émna méːto. 9 Édémpila Erodbí bím bojéru:ngko taupénammém tauto, émpigeːla bí okkomsin lulasutomang. 10 Abíné miríkídíːdé:la luro luyírnékídíːdé odo dagla dunggeːla bím kinggíːpé lujémto. 11 Odo Erodbíːlaː bík maglíngkídíːdé bím yirkaːto. Bulu bím migom-galugém molíggeːla Pilatkoloːpé méladlíktoku. 12 Odo longédokké Erodbíːlaː Piladbí ajonpé ikang-émmamílo bínyi annyidé akon akonké miruai.
Jisumé Mokedopé Lugígnam
(Moti 27.15-26; Mark 15.6-15; Jon 18.39-19.16)
13 Piladbí abíné miríkídíːdém, midumkídíːdém odokké taniːkídíːdém lékkopé gíkumsumoto, 14 odokké bulum luto, "Séː taniːsém noluk taniːyém luːurra gíyodboné taniːko émna ngokkosoːpé gíbotag. Noluk kanggaːlo ngo bím ankangka émpigeːla noluk lukamdémpin okkomsin ngo bíkkolok paːtomang. 15 Erodbíːsin okkomsin paːtomang, édémpila bí bím ngolukkosoːpé méladlíktakku; édém nolusin kaːsula dung, sinam paːnam légaːpé bí oko imurkosin imang. 16 Odok-légaːpé ngo bím díːmogeːla mélíkkupé."
18 Émpigeːla bulu lékkopé jéːla luto, "Séː taniːsém gípagbokangǃ Barabbasmé ngolum mélenníkteikui." 19 Barabbasmé nogordo migom-kekonpé dagrobbonam légaːpélaː taniːmokenam légaːpé makanaːlo tumna léːtag.
20 Jisumé mélenníkkupé mé:la, Piladbí lékoda taniːkídíːdém kumna luto. 21 Émpigeːla bulu jéːyartíkang, "Bím kuruslo píttokǃ kuruslo píttokǃ"
22 Léumnanékopé bí bulum lutoː "Kapila? Oko imurém séː taniːsé iton? Bím mokedopé ngo lulígnan oko imurémsin bíkkolok paːmang. Odok-légaːpé ngo bím díːmogeːla mélíkkupé."
23 Émpigeːla bottépé jéːyarra bulu luyartíkang bím kurusdo píttorungka, odokké bulu jéːnggéisutomang. 24 Édémpila Piladbí buluk manamdém ibipé émna méːsékto. 25 Migom-kekonpé dagrobnam légaːpélaː taniːmokenam légaːpé makanaːlo tumna léːnam taniːdém bí mélenníktoku, séːkom bulu kolangkula dungngan, odokké Jisumé buluk alaglo tolíkto.
Jisumé Kurusdo Pítkenam
(Moti 27.32-44 Mark 15.21-32; Jon 19.17-27)
26 Bulu bím gílenbola gíla duːdodo, doːluːlokké gílangkula duːné Sirinidok Simonmé sogapto, odokké bík tayéːdo kurusdém joːlíggeːla bím Jisuké lédu-lédupé édém joːbommoto.
27 Bojéru:ngko taniyé bík lédílo gímínto; buluk araːdo mimé ékké angkéng kíksula kabla bík lédulo gímíndo. 28 Jisubí bérratsugeːla bulum luto, "Jerusalemké omékídínga, ngok légaːpé kabyok, noluk aíké légaːpélaː noluk ommangkídíːdok légaːpé kaptok. 29 Kapéné ayírdé aːyé édílo bulu luyéji, 'Banjiné mimékídíːdé, ommang kamaːné akikídíːdéːla édíloːsin anyuk sunkíma:né anyukkídíːdé ayang-paːnéǃ' 30 Odo bulu diːtékídíːdém luyé, "Ngoluk tayéːso oleteiǃ" odokké adikídíːdém luyé, "Ngolum orumteiǃ" 31 Kapéné bulu leːné ísíngémméi sémpé imílo, sanné ísíngém kapé iyen?"
32 Kínggín-aiman taniːannyiko bík lédílo mokekolo bulu gílenbodo. 33 Édílo bulu Kulong émkodoːpé gípíːtoji, odo bulu bím édé kínggín-aiman taniːannyiːdok lédílo ako bík lagbíkpé odokké akondém bík lakkepé kurusdo pítto. 34 Odo Jisubí luto, a"Abu, bulum méːyinsubilang, kapilaːné bulu okkom iduji édém bulu kinmang."
Odokké bík génamkídíːdém bulu aminém kunggeːla orpansuto. 35 Taniːkídíːdé dagla kaːla du:dodo, mirokídíːdé bím yirkaːto. Odokké bulu luto, "Bí ammem moturka; bí Ruːnéké balennam Atér Kiristobímílo, saː aíém motursukítok."
36 Maglíngkídíːdéːsin gígeːla bím yirkaːto. Bulu bím marné apongém sunnígeːla 37 luto, "No Jiudikídíːsok migomdémílo, saː aíé motursukítok."
38 Bík tayéːdo odo sémpé adnam lutatko dungngaiː SIDÉ JIUDIKÍDÍːDOK MIGOMDÉ.
39 Pídla léːnam kínggín-aiman taniːdok aːko bím luretoː "No Kiristo bímaːnei? No aíé motursutok odokké ngolumsin moturteiǃ"
40 Émpigeːla akon kínggín-aimandé bím morídla luto, "Bík lédílo lékkoné sinam-paːnamsém panggelaːsin no Ruːnémé pésomaːnei?" 41 Sém ngonyim bigaptag, ngolu sinamsém paːpaːdo, émpigeːla séː taniːsé oko imurémsin imang." 42 Odo bí luto, "Jisu, édílo no nok migomdokodo:pé gíaːyekuji ngom méːpaːlang."
43 Jisubí bím lulatsuto, "Ngo nom arodém lubidung, siloké longéso no ngok lédílo témoːto duːmínyéku."
Jisuké Sinam
(Moti 27.45-56; Mark 15.33-41;Jon 19.28-30)
44 Odo longé loːtung ayírai, odokké moːpísok appíːlo kémojíjíːla yummayírdop dungkang, 45 kapilaːné doːnyidé kangasukang. Odokké kumli:do sorkomnam gayindé tagnyikopé serkekang. 46 Odo Jisubí bottéruːpé jéːla luto, "Abu, nok alaglo ngok yalosém tolígdung." Édílo bí édémpé lutoji, odo bí ngatérsukang.
47 Língko opisardé, okko kapikaji édém kaːpasugeːla Ruːnémé luyitsula luto, "Aroruːpé bí arolok-duːné taniːkai."
48 Édém kangkolo séːkobulu gítoji, bulu appíːdé édé agerdém kaːpasugeːla buluk angkéngém kíksugeːla okumpé gílatkangku. 49 Émpigeːla séːkobulu bím kindagaːji, odok araːdo Galilidokké gímínné mimékídíːdé, moːténgoːupé dagla édémbulum kaːla duːto.
Jisumé Yusíːnam
(Moti 27.57-61; Mark 15.42-47; Jon 19.38-42)
50 Odo Jusep émnam taniːko dungngai, séːko Jiudi-kébaːlok kébang ajonkai, bí ainékolaː arolok-duːné taniːkai, 51 séːkobí buluk ruːségnamdémnaː inam agerdém tolígmangngai. Bí Judiadok Arimotia taondokkai odokké bí Ruːnék migomdokodém toyaːla dungngai. 52 Bí Pilatkodoːpé gíla Jisuké simaːdém kotoku. 53 Odo bí simaːdém layiːgekula asong-onno gayinki yetto odokké torné-ílíːlo pakurra léːnam agokolo léːto, okodo simangém léngkímangngai.b 54 Édé moninsunamc longgai, odokké Yoddo longédéːsin aːdungaboi.
55 Galilidokké Jisuké lédílo gímínné mimékídíːdé Jusepké lédílo gímínna bík simaːdém kapé odo léːtuːji édém kaːto. 56 Odok lédupé bulu okumpé gílangkula namponé yunsunammé moninsuto.
Yoddo longédo Luroːdok lukampé bulu duːrasula duːto.