Lékod-Turkunamdé
(Moti 28.1-10; Mark 16.1-8; Jon 20.1-10)
24
Loːníddok anggotpoːné longédo, roːrokompé, mimékídíːdé buluk moninsula léːnam nampon yonsunamkídíːdém bomna agodo:pé gíkang. 2 Agodoːpé gíangkodém pérkabnan ílíːdém pérpagla léːdopé bulu kaːto, 3 émpigeːla édílo bulu araːdoːpé gíaːtoji, bulu Ruːtum Jisuké simaːdém paːtomang. 4 Édílo bulu édém méngaksula dungngan, kampoti:tiné galug géné tani annyiko bagémpé buluk kéraːdo dakkansuto. 5 Bulum pésola mimékídíːdé amoːbo:pé pogbumkang, émpigeːla taniːkídíːdé bulum luto, "Kapila nolu turnédém sinékídíːdok araːdo magodun? 6 Bí sidé kamang; Ruːnébí bím turmotokuǃ Édílo bí Galili:do noluk lédílo dungngan; odo bí nolum okko émkan, édém mé:pangkítokː 7 'Taniːké Aoːmé kurusdo pítkedopé imurné taniːkídíːdok alaglo tolígyé, odokké loumné longédo bí turyéku.'"8 Odo bulu bík lunam agomkídíːdém méːpaːtoku. 9 Agodokké gílangkula édé appíːdém bulu Yí:la:ngko luyírsunékídíːdémna akon asagémsin lubitoku. 10 Édébulu Meri Magdoloniːbí, Juanabí, Jemské ané Meri:bí; odokké buluk lédílo gímmíné akon mimékídíːdé séːkobulu mélígnamkídíːdém lubitoku. 11 Émpigeːla bulu mimékídíːdém méngkésutomang, kapilaːné buluk lubikunam agomkídíːdé émmumémpé idagai. 12 Émgom, Pitorbí darobgeːla aggoloːpé dukkang. Tungkuːla kaːnamé simaːdém yednan asong-onno gayindé aísuːampé yetsumna dung, okko kapikan émna bí aíé méngaksula odokké gílentoku.
Emaspé Gínam
(Mark 16.12-13)
13 Odokké odo longíːdo bulukkolok annyiko Jerusalemdokké kínít mailkopé moːténgko Emas émnam doːluːdoːpé gíla dungngai. 14 Bínyi annyidé Jerusalemdo oko okko kapé iladuːji édémíng luposula gíla dungngai. 15 Bínyi annyidé édémíːbulum luposula taumínsula duːdodo, Jisubí aídé odoːpé gíaːla bínyikkolo lékkopé gímínto; 16 bínyi bím kaːto, émgom bínyi bím kangkintomang. 17 Bí bínyim tauto, "Nolu gítung gítuːla okom kíbosudun?"
Bínyim méːdírra dagrasudoːpé kaːto. 18 Bínyikkodok Kiliopas émnam taniːdé bím tauto, "Jerusalemso:pé gíné mibokídíːdok araːdo no atéroːdéːyé séːko sido símsíːro okko kapila dun édém kinmaːnédé?"
19 Bí tauto, "Okko kapidun?"
Bulu bím lulatsuto, "Najareddok Jisuké do:yi:déːna, séːko Ruːnékélaː appíng taniːké kanggaːlo agomno:laː agerro kínggíːné lungor-lunékai." 20 Abíné miríkídíːdé:la ngoluk migomkídíːdé bím mokedopé tolíkto, odokké bulu bím kurusdo pítketo; 21 émpigeːla séːkobí Israel taniːyém buluk mirulok alaglokké répídbiyékuji, édé bí émna ngolu méːla dungngai. Odokké éddomang odok appíːdok tayéːpé sé: do:yiːsé konnoké longédoːbo ikangai. 22 Odok tayéːlo, ngoluk mimé ékké ngolum méngkaksumoto. Bulu síːro ro:rokompé agodo:pé gíka 23 émpigeːla bík simaːdém odo paːtomang. Bulu gílangkula ngolum lubitag, bulu tayéng-ya:meyém kaːto, séːkobulu Jisubí turkangku émna lubito. 24 Édémpila ngoluk ajonékké agodo:pé gíla kaːnamé mimékídíːdok lukamíːdémpé bulu bím odo kaːbektomang."
25 Jisubí bínyim luto, "Nolu, makkornélaː asin tébégné taniːkídínga, kapila nolu lungor-lunékídíːdok lunam appíːdém méngkésutomangǃ 26 Kiristobí édémbulumpin duːgém dogeːla bík unjíkkodoːpé gíapénammangnganei? 27 Odokké bí Musiːkodokké luaːbomna takam lungor-lunékídíːdémnaː Ruːnék-gomugdo bík légaːpé okkom adla léːtang édémbulum bulum lusarbito.
28 Bínyik gíko doːluːdoːpé gípíːnammé, Jisubí gíbadla gípénémpé séumoto. 29 Émpigeːla bínyi bím kekerépé goksuto, "Ngoluk lédílo duːlaboi, kapilaːné yummayírkaːbo." Édémpila bí bínyik lédílo duːmínnam légaːpé gíamínkang. 30 Édílo bí bínyík lédílo doko tebuldo tetton, bí pitangko laːsanggeːla aipai bigeːla édém pentuːto odokké bulum bito. 31 Odo bínyik amigé darra bínyi bím kangkinto, odo bí odokké yokkang. 32 Bínyi akoné akoném luposuto, "Lambédo gíla duːdodo bí édílo ngoyik lédílo luposuton odokké Ruːnék-gomugdok agomém lusarbiton, odo ngoyik asiné airuːpé méːpomanggalang?"
33 Bínyí darobla oddung Jerusalempé gílattoku. Odokké bínyí Yíːlangkodémnaː buluk lédílo lékkopé gíkumsula duːnékídíːdém ríksuto 34 odokké luto, "Édé arroǃ Ruːtumbí turkangku odokké Simonmé bí léngkansuto."
35 Odokké gíla duːdodo lambédo okko kapikaji édémbulu, odokké édílo bí pitaːdém pentuːtoji, odo kapé bím bínyi kangkintokuji édémbulum annyiːdé lubisutoku.
Jisubí Luyírsunékídíːdém Léngkansunam
(Moti 28.16-20; Mark 16.14-18; Jon 20.19-23; Ager 1.6-8)
36 Édílo bulu édé agomíːdém lula dungngan, Jisubí aíé buluk kéraːdo dakkansugeːla bulum luto, "Nolukkolo asin-ansíngé dungkaːlangka."
37 Émpigeːla bulu uiːyém kaːto émna yallo gíla péssamkang. 38 Bí bulum luto, "Kapila nolu pésodun, odokké kapila noluk asinkídíːdé méːmodun? 39 Ngok alé alaksém kangkítok. Séː ngomínǃ Ngom gakkígeːla kangkíta; uiːlokké adin-amírélaː alongé kamang, kangkíta ngokké dung."
40 Édém lugeːla bí bík alagdémnaː alédém bulum léngkanto. 41 Bulu méːpílaːmaːpé méːpobatsula suːpésin arro émna méːmala, bí bulum tauto, "Nolukké sidé oːkai dopénammé kadunei?" 42 Odo bulu bím baːnam ongo apirko bito, 43 odokké bí édém laːríksugeːla buluk kaːpíng doto.
44 Odokké bí bulum luto, "Musiːké Luroːdo, lungor-lunékídíːdok adnamkídíːdo odokké Niːtom potinkídíːdo ngok légaːpé oko okkom adla léːtuːji, édé appíːdé ilet-gíledruːpaːyé émna noluk lédílo duːdodoi, oko okkom ngo lukaji, ngok lunam agomdé sidé."
45 Odo bí Ruːnék-gomugdok agomkídíːdém bulu kinnadopé buluk asiném mogebito. 46 Bí bulum lubito, "Sémpé sidé attakː Kiristobí duːgém dogeːla loumné longédo sikodokké turyéku, 47 odokké Jerusalemdokké lurobomna bík aminno takam réngamso méngkutsunamémnaː imurém méːyinsubinamém lugoːbiyé. 48 Nolu appíngéi sémbulum lubikupénékídíːdé. 49 Odokké kangkítok, ngok Abuké mélígbipé émna lusula léːnamdém ngo nolukkoloːpé mélígbipé; émpigeːla tayéːtokké édíloːpé tornamém bimaːyéji odoloːpé nolu nogordo toyaːla duːpoːlang."
Jisumé Tayéng-amoːpé Gísabokunam
(Mark 16.19-20; Ager 1.9-11)
50 Édílo Jisubí bulum Betani émko doːluːdok kéraːdoːpé gíbotoji, odo bí bík alagém laksaːla bulum peyubito. 51 Édílo bí bulum peyubila dungngan, odo bím bulukolokké tayéng-amoːpé gísabokangku. 52 Odokké bulu bím tungala kumnam lédupé airuːpé méːpoménganna Jerusalempé gílattoku. 53 Odokké bulu loːdém kumli:doːpé gíyarra Ruːnémé luyitsula kumyarto.