Mépakkaːmínsunam
(Mark 10ː1-12)
19
Édílo Jisubí édémbulum lungapton, bí Galilidokké gípagla Jordan abuːdok kekonké moːtag Judiaːpé gíkang. 2 Bottén kéréngkopé taniyé bík lédulo gímíndo, odokké odo bí bulum kaːpídbito.3 Parosi ékké bíkkodoːpé gíla bím luyetpé méːla bím tauto, "Ngoluk Luroːdé taniːkoné bík aísuampé méːsula bí yamnédém mépaglaːdopé bím ilang-gílangém bitagnei?"
4 Bí lulatsutoku, "Nolu Ruːnék-gomugdo popasukímaːnei? Lendo-aːdodo Ruːnébí taniːyém néːpéla milboːpé ruːtag émnamdém? 5 Odokké Ruːnébí luto, 'Kapéné sidok légaːpé taniːkoné bík ané-abbom mépagyé odokké bí yamnédok lédílo lékkopagyé, odokké annyidé atér amíroːngkopé iyé.'a 6 Édémpila binyi annyipé iyarra duːmaːbo, émpigeːla akongkopé iyé. Odok-légaːpé okodém Ruːnébí ruːpumsutagji, taniyé édém mopansupé lagimang."
7 Bulu tauto, "Émpém, kapila taniːkoné adnamko bík yamnédém bigeːla bím mélíktoku émna Musiːbí lulíktang?"b
8 Jisubí lulatsutoku, "Musiːbí nolum noluk yamnékídíːdém mépaglaːyé émníktag kapilaːné noluk asinkídíːdé aipé tordag. Émpigeːla édé lendo-aːdodokké édémpé imangai. 9 Ngo nolum lubidung, séːkai bík yamnédém aiman-agergernamdok ruːyiːpé, mépaggeːla yamnéko langkumílo bí benggon agerém gerdag."
10 Luyírsunékídíːdé bím luto, "Néːmilboːlog pongkolo sémpé idumílo, midaːmoma:namdé aiyaːdag."
11 Jisubí bulum lulatsutoku, "Appíngé édé agomdém tolígla:mang, émpigeːla bullong tolíglaːdag séːkom Ruːnébí édém bitang. 12 Kapéné akke magmaːdag kapilaːné bulum édémpéi otag; akkem édémpé taniyé imotag; akke tayéng-among migomdokodok légangé midaːmogema émna lupaksutag. Séːko édém tolíksula:dagji bí édém toríksupé lagidag."
Jisubí Ajjin Koːkangém Peyubinam
(Mark 10ː13-16; Luk 18ː15-17)
13 Odo tani:ékké ajjin koːkangém Jisukodoːpé bí bulum bík alakki ri:yidbila buluk légaːpé kumbidoːpé émna gíabodo. Émpigeːla luyírsunékídíːdé taniːkídíːdém lutumto. 14 Jisubí luto, "Koːkangkídíːdém ngokkosoːpé gíaːmoto, odokké bulum duːriyo; kapéné tayéng-among migomdokodé sémbulumpé inélokképag."
15 Odokké bí bík alakki ri:yidbigeːla odokké gípakkang.
Mirémné Yaːmedé
(Mark 10ː17-31; Luk 18ː18-30)
16 Odokké kangkítok, taniːko Jisukodoːpé gísaːla tauto, "Luyír-abu, turyarné turnamdém paːnam légaːpé ngo oko ainé agerko gerpé lagiyén?"
17 Jisubí lulatsutoku, "Kapila no okodé ainé ageré émna ngom taudun? Sidé akkongko dung séːkobí aidagji. No turnamnoːpé gíaːlíːdumílo, lulígnamkídíːdém ibomnang."
18 Bí tauto, "Oko lulígnamkídíːdém?"
Jisubí lulatsutoku, "Mokeyok, benggo:yok, dopsoyok, séːkomsin aromap lujémyok,c 19 nok ané-abbom ménggésulang, odokké nok kumrém nok aíém aipé-méːngkamdémpé aipé-méːlang.'"d
20 Yaːmedé luto, "Édé appíːdém ngo ibomna dung. Okko suːpag ngokké píːramna dun?"
21 Jisubí bím lulatsuto, "No lugénamko kamaːnépé ilíːdagmílo, gíkang, nok kanam appíːdém kopageːla murkoːdém opanném bita, odo nokké tayéng-amoːto murkong kumsungé kayé. Odokké gíla ngok lédílo gímíntok."
22 Édílo yaːmedé édém tatton, bí méːdírra gíkangku, kapilaːné bí airuːpé mirémnékkai.
23 Odo Jisubí bíkkol luyírsunékídíːdém luto, "Ngo nolum arodém lubidung, mirémné taniːko tayéng-among migomdokodoːpé gíaːnamdé airuːpé tordag. 24 Lékoda ngo nolum lubidung, uːtko pési amigdok durkonamdéi émmumé mirémné taniːkolok Ruːnék migomdokodok gíaːnamdémyang."
25 Édílo luyírsunékídíːdé édém tatton, bulu kínggíːpé méngaksula bím tauto, "Émpém séːkobí moturbinamém paːlaːyén?"
26 Jisubí bulum ngeːríksugeːla luto, "Édé taniːképé ilaːnammang, émpigeːla Ruːnéképé ilaːngoːnammé."e
27 Odo Pitorbí bím lulatsuto, "Kangkítok, ngolu appíngém mépaggeːla nok lédílo gímíntag. Émpém ngolukké okko kayén?"
28 Jisubí bulum luto, "Ngo nolum arodém lubidung, takamém anumodokudodo, édílo Taniːké Aoːbí bík unjígné migom-tetkodo tedyen, nolu séːkobulu ngok lédílo gímínkan nolusin yí:laːnyí migom-tetkodo tedgeːla Israeldok yíːlaːnyí opíndém kébangém baːbiyé. 29 Odokké séːkoi okumém, bírrangém, bírmom, abbom, anném, ommangém, arígém ngok légaːpé mépakkan bí língko ayírkopé bojéyaːngko paːyéku odokké turyarné turnamém paːyé. 30 Émpigeːla su:pakké gígépoːné bojéko léduyé, odokké suːpakké léduné bojéko gígéyéku.