Angur Baːrilok Agergernékídíng
20
"Kapéné tayéng-among migomdokodé sémpé idag. Longékoném taniːkoné roːrokompé bík angurbaːrido agergerdoːpé agergerném mala gílenkang. 2 Bí bulum longékolok gerrédém bipé émna lupídgeːla bulum bík angurbaːridoːpé mélíkto. 3 Konané ayírdo bí lékoda réko-kokodoːpé gílenkang odokké odo okkomsin imaːpé dagla duːné tani ékkém kaːto. 4 Bí bulum luto, 'Nolusin gíla ngok angurbaːrido agergerta, odokké ngo kaːla gerrédém kabodopé bipé.' Odo bulu gíkang. 5 Odokké lékoda yíːlaːnyiné ayírkíramdoːla aumné ayírkíramdo bí édémíːpé ito. 6 Angngoné ayírkíramdo bí gílenkang odokké odosin bí tani ékké dagla duːdopé paːto; odo bí bulum luto, 'Kapila nolu longéloːbuːso okkomsin imapé sido dagla dun?' 7 Bulu lulatsutoku, 'Ngolum séːkoːsin agerrop gogmang.' Bí bulum luto, 'Aiyé, nolusin gíla ngok angurbaːrido agergerta.'8 "Édílo yummayírkan, angurbaːridok ruːtumdé bík menejardém luto, 'Agergernékídíːdém goggeːla buluk gerrédém bito, léddarké gínékídíːdokké biːala gípongarnékídíːdédoːpé bilang.'a 9 Édílo angngoné ayírkíramdok gognam agergernékídíːdé gídon, bulum appíngém longélok gerrédém bito. 10 Édémpila édílo gerangarpoːnékídíːdé gíaːton, bulu bojéko paːya:pé émna méːsuto. Émpigeːla appíːdé longédok gerroːdém paːto. 11 Édílo bulu buluk gerrédém paːton, bulu aríg ruːtumdok kekonpé luropkang. 12 "Séː taniːkídíːsé séːkobulu léddarpé geratoji bulu aːdí akkongko gerto, émpigela ngolu séːko longéloːbuːdo bojéyaːngko agerdém doːnyipékapékapé geryaːton, no ngolum bikamíːpé bulumsin bitag.' 13 Émpigeːla bí bulukkolok akoném luto, 'Ajona, ngo nolum bimurmaːumpé. Nolum longélok gerrémdém bipé émna luségmaːlang? 14 Noluk gerrédém langgeːla gíkangku. Ngo nolum éddík bituːji odokkíddíngko léddarké gognam taniːdém bilíːdag. 15 Ngok aíké murkoː tayéːlo ngo okkom ilíːdagji édém ilanan ilang-gílang ngokké kamaːnei? Émmamílo ngok bibadla binamsém nolu dígduːnei?'
16 Édémpila léddarkédé gípongaryaːyé, odokké gípongaryaːnédé léddaryaːyé."
Jisubí Lékoda Bík Sinamdém Lunobinam
(Mark 10ː32-34; Luk 18ː31-34)
17 Jisubí Jerusalempé gísaːla du:dodo, bí yíːla:nyí luyírsunékídíːdém gíyodbogeːla bulum luto, 18 "Ngolu Jerusalempé gísaːdag, odokké Taniːké Aoːmé abíné miríkídíːdogla luro luyírnékídíːdok alaglo tolígyé, odokké bulu bím sidopé lupagyé, 19 odokké Jiudiman taniːkídíːdé bím lukaːdopé, díːdopé odokké kurusolo pítkedopé buluk alaglo tolígyé. Émpigeːla Loumné longédo bím turmoyékuǃ"
Anékolok Kumna-Lunam
(Mark 10ː35-45)
20 Odo Jebediké yamnédé bík aoː annyidok lédílo Jisukodoːpé gído, odokké bí lébíːtumna bíkkolok ayangko koto.
21 Jisubí bím tauto, "Nom okkom lagidang?"
Bí lulatsuto, "Ngok séː aoːannyisé aːko nok lagbíkpé odokké akondém nok lakkepé nok migomdokodo teddopé lulíktei."
22 Émpigeːla Jisubí lulatsutoku, "Okkom nolu koduːji édém nolu kinmang. Ngo okkom tíːyéji édém nolu tíːlaːyén?"
Bulu lulatsuto, "Ngolu tíːlaːdag."
23 Jisubí bulum luto, "Nolu ngok tíːnamdém tíːlaːyépé, émpigeːla ngok lagbíkpéla lakkepé tednamdém ngo bilamang, émpigeːla séːkobulum ngok Abubí balentang tetkokídíːdém bí bulukképé ménoːbitag."
24 Édílo íyíːdé édém tatton, bulu bírokumsu annyidok tayéːlo aglíːto. 25 Émpigeːla Jisubí bulum lékkopé gokkumsugeːla luto, "Nolu kindag Jiudiman taniːlok migomkídíːdé buluk tayéːlo ruːtumpé idag, odokké buluk bottén opisarkídíːdé bulum babodag. 26 Nolukkolo édémpé ipé lagimang; édémpimap séːko noluk ara:lo botténép ilíːdang bí noluk agergerbinépé ipé lagiyé, 27 odokké séːkobíi gígépoːlíːdang bí noluk pagboruːpé ipaːyé; 28 kapé Taniːké Aoːbí agergermokolo gímangai, émpigeːla ager gerbikolo gítag, odokké bojékolok légaːpé répídbikunan kísapé bík turnamdém bikolo gítag."
Jisubí Miglun Taniːanyikoném Kaːbegmokunam
(Mark 10ː46-53; Luk 18ː35-43)
29 Jisubíːla bíkkol luyírsunékídíːdé Jerikodokké gídokudodo, bojéːko taniyé bík lédulo gímínto. 30 Lambédo miglun taniːannyiko tedla dungngai odokké édílo Jisubí odok gípaddag émna bulu tatpaːsuton, bínyi jéːropkang, "Ruːtum, Debitké Aoːaǃ Ngolum ayaːteipénǃ"
31 Taniːkéréːdé bínyim morídla asoːpé duːdopé luto. Émpigeːla bínyi jéːyangoːla luto, "Ruːtum, Debitké Aoːaǃ Ngolum ayaːteipénǃ"
32 Jisubí daktetkang odokké bulum bíkkodoːpé goggeːla tauto, "Noluk légaːpé ngom okkom iteika émna nolu méːdang?"
33 Bulu luto, "Ruːtuma, ngolu kaːbeglíːdag."
34 Jisubí bulum ayaːpé-méːbito odokké bí buluk amikkídíːdok riːyidbito. Oddar bulu kaːpangkangku odokké bík lédulo gímínkang.