Jikigeːla Gíangkunam
(Mark 11ː1-11; Luk 19ː28-40; Jon 12ː12-19)
21
Bulu Jerusalempé gípíngkíramdodo Olib adi tayéngké Betpajdoːpé bulu gíangkang, Jisubí luyírsunékídíːdok annyiko ménoːlíkto, 2 odokké bí sémpé luto, "Noluk kaːpa:nam doːlungoloːpé gíkang, gíaːdannai oddar nolu bík aoːdok lédílo rínna léːnam gadongko paːyé. Bulum ta:la ngokkosoːpé sobomnangku. 3 Séːkai nolum oːkaiko lumílo, Ruːtumbí bulum lagidag émna bím lulang, odo bí bulum mélígyé."4 Okkom lungor-lunédé luno:la léːtagan édém ilet-gílednam légaːpé édémpé ikangː
5 "Jayonké omékídíːdém lubitok,
'Kaːtok, noluk migombí nolukkoloːpé,
ajjisula gadongkolo saːla,
gadong aoːkolok tayéːlo saːla gído.'"a
6 Jisuké lukamardémpé luyírsunékídíːdé gígeːla ito. 7 Bulu gado:démna gadong aoːdém sobomtoku, buluk tayéːdo buluk gasorém uːlíkto, odokké Jisubí odok tayéːdo sa:to. 8 Botténé kéréngkopé taniyé buluk génam gasorkídíːdém lambédo pulíkto, odokké akke kejur réngkéngém pageːla lambédo uːlíkto.b 9 Séːkobulu bím gígél-gídagan odokké bík lamkupé gímíndagan bulu jéːropkang, " Osanna Debitké Aoːdoːpéǃ Ruːtumké aminnok gínédé ayang-paːnékoǃ Tayéngarto Osannaǃ"c
10 Édílo Jisubí Jerusalempé gíaːton, nogordok appíːlo urmurra taniːkídíːdé tauto, "Séːkon bíː?"
11 Taniːkéréːdé lulatsuto, "Jisubíːna, Galiliːdok Najaret doːluːdok lungor-lunédé."
Jisubí Kumli:pé Gínam
(Mark 11ː15-19;Luk19ː45-48; Jon 2ː13-22)
12 Jisubí kumli lottadoːpé gíaːla odok réla-kola du:né appíːdém ménto. Bí murkong anírmobinékídíːdogla parong konékídíːdok tebulémna tedgéngém níngkulubamto. 13 Bí bulum luto, "Sémpé adla léːtag, ngok okumdém kumko okumko émna luyé,' émpigeːla nolu édém 'rodgoːnélok diːrumkopé imodung.'"d
14 Miglunéla lébené bíkkodoːpé kumli:do gído, odokké bí bulum ésaːmotoku. 15 Émpigeːla édílo abín miríkídíːdéːla luro luyírnékídíːdé bík inam méːpíla:maːnam agerkídíːdémna kumli lottaːdo, "Debitké Aoːkoloːpé Osanna,' émna koːkaːlok jéːnamdém tatton, bulu airuːpé aglíngkang. 16 Bulu bím tauto, "Séː koːkangkídíːsé okko émna jéːdung édém no tadbedang?"
Jisubí lulatsutoku, "Éí, nolu édíloːsin pobeksukímaːnei, koːkangéla ojíngkídíːdé nom luyitsudopé no luyírtag?"e
17 Odokké bí bulum mépagla nogordokké gílenna Betaniːpé gíkang, okolo bí yumédo duːyupsuto.
Tajíg Amíːdém Jisuké Pelígnam
(Mark 11ː12-14; 20-24)
18 Roːrokomdo, nogordoːpé gíladdokudodo, bí kénongkang. 19 Lambé kéraːdo tajíg amíngko ka:paːla, bí odoːpé gíto, émpigeːla amíːdé annéyayaːla dungngai, bí odok okkomsin paːtomang. Édémpila bí amíːdém luto, "No édíloːsin lékoda aːyém eːmaːyéǃ" Odo bagémpé amíːdé sanpagkang.
20 Luyírsunékídíːdé édém kaːla kangaksuto. Odokké bulu tauto, "Kapé siddík lomna tajíg amíːdé sankan?"
21 Jisubí lulatsutoku, "Ngo nolum arodém lubidung, nolukké méːjíksunamé kamílo odokké méːmomaːmílo, okkom tajíg amíːdém imoton édémoːmang, émpigeːla nolu séː adisémsin 'Gíkang, aíé gaːnélo géjíːsuta,' émna lumílo, édé édémíːpé iyé. 22 No méngkésumílo, oko légaːpé no kumtagji édém no paːyérung."
Jisuké Ilang-Gílang Tayéːlo Taunam
(Mark 11ː27-33; Luk 20ː1-8)
23 Jisubí kumli lottaːdoːpé gíaːla édílo bí luyírra dungngan, abín miríkídíːdéːla midumkídíːdé bíkkodoːpé gíla tauto, "Oko ilang-gílangki no sémbulum idun? Odokké séːko nom séː ilang-gílanamsém bitang?"
24 Jisubí lulatsuto, "Ngo:sin nolum taupénamko tauyé. Nolu ngom lulatsubikumílo, ngo nolum lubipé oko ilang-gílangki ngo sémbulum idon. 25 Jonké baptis binamdém okolokké lennan? Édé tayéng-amoːtokkaːnei, taniːlokkan?"
Bulu buluk araːdo édém luposula luto, "Tayéng-amoːtokkai émna ngolu lumílo, bí tauyé, 'Émpém nolu kapila méngkésutoman? 26 Émpigeːla taniːlokkai émna ngolu lumílo-ngolu taniːkídíːsém pésodag bulu oːkai ilaːdo, kapéné bulu Jonmé lungor-lunéko émna sabdag." 27 Édémpila bulu luto, "Ngolu kinmang."
Odo bí luto, "Ngo:sin lubimaːyé oko ilang-gílangki ngo sémbulum idon."
Aoːannyíkoném Luyisula Lubinam
28 "Nolu okko émna méːdang? Taniːkolokké ao annyik dungngai. Bí abín aoːdoːpé gíla luto, 'Aoːa silo gíla angurbaːriolo agergerta.' 29 Bí lulatsuto, "Ngo gíma," émpigeːla léddoupé bí asiném méːlatsugeːla ager gerkolo gíkang. 30 Odo abudé akon aoːdoːpé gígeːla abínédém lunamíːdém luto. Aoːdé lulatsuto, 'Baːba, ngo gíyé,' émpigeːla bí gítomang. 31 Annyidok séːkobí bík abudok méːnamdém iton?"
Bulu lulatsuto, "Abínédé."
Jisubí bulum luto, "Ngo nolum arodém lubidung, murkong urnékídíːdéːla bengkosunékídíːdé nolumyang gípola Ruːnék migomdokodo gíadung. 32 Kapéné Jonbí nolukkoloːpé arolok-duːnam lambédém léngkanbikolo gíka, odokké nolu bím méngkésutomang, émpigeːla murkong urnékídíːdéːla bengkosunékídíːdé méngkésuto. Odokké édém kaːnam lédupésin nolu méngkutsugeːla bím méngkésutomang."
Angurbaːriːlok Agergerném Luyisula Lubinam
( Mark 12ː1-12; Luk 20ː9-19)
33 "Luyisula lubinam akoda tattokː Mirémné taniːko dungngai séːko angurbaːriːko ito. Baːriːdém bí bareyém pedyetsuto, alang mannennapé arungém ngungeːla bí oudné kangapkoko moto. Odo bí baːriːdém aríg-inném bondokpé biggeːla gígongkolo gíkang. 34 Édílo aːyé pírnan ayíré aːngkan, bí bík pagbokídíːdém aríg-inékídíːdoːpé bík aːyém pírdokupé mélíkto. 35 Aríg-inékídíːdé bík pagbokídíːdém sogapto; bulu aːkom díːto, akondém démketo, odokké aːkom ílíngki géto. 36 Odo bí mépolígnamkídíːdémyang bojéyaːngko pagbom bulukkoloːpé mélíkto, odokké aríg-inékídíːdé poːpék ikamíːdémpé bulumsin ito. 37 Léddarpé, bí bík aoːdém bulukkoloːpé mélíkto. Bí luto, 'Bulu ngok aoːsém ménggésuyépé.' 38 Émpigeːla édílo aríg-inékídíːdé aoːdém kaːton, bulu akoné akoném luto, 'Séː ruːtumdok aoːdé. Gítok, kajé bím mokelai odokké bík aríksém laːpaglai.' 39 Édémpila bulu bím sogabgeːla angurbaːriːdokké gélenníkto odokké bím moketo.
40 Suːpag, édílo angurbaːriːdok ruːtumdé gíyén, édé aríg-inékídíːdém bí kapiyén?"
41 Bulu lulatsutoku, "Bí édé aiman taniːkídíːdém mokeyé, odokké angurbaːriːdém akoném biyé séːko bím pírdoku ayírdo bík paːpénam aːyém biyékuji."
42 Jisubí bulum luto, "Nolu édíloːsin Ruːnék-gomugdo pobeksukímaːneiː
Okummonékídíːdok típagnam ílíːdé
tíggotpoːnam ílíːpé ikang;
édém Ruːtumbí ito,
odokké édé ngoluk amikso kangaksunamkopé ikang.f
43 Odok-légaːpé ngo nolum lubidung Ruːnék migomdokodém nolukkolokkém laːpagyé odokké taniːopekoném biye séːko édém aːyém eːmoyéji. 44 Séːkobí édé ílíː tayéːto ogabyéji bí omígyé, odokké sék tayéːlo édé ílíːdé ogabyéji bím okeyé."