Midang Dobonamko Luyisula Lubinam
(Luk 14ː15-24)
22
Jisubí lékoda bulum luyisula lubinamki, sémpé lubitoː 2 "Tayéng-among migomdokodé sémpé idag. Longékoném migomkoné bík aoːdok légaːpé midang dobonamko moninsuto. 3 Bí bík pagbokídíːdém gognam mibokídíːdém dobokodoːpé bulum goglatsudokupé mélíkto, émpigeːla bulu gílaːmaːbo émpaksuto. 4 Odo bí pagbo ékkém mésedlíggeːla luto, 'Séːkobulum goktagan bulum lubita, ngok dobopénamdém moninsutagbo; ngok so:bomna jíːputpudné soːbo-ao:om baːtung, odokké appíngé obokaːbo. Midang dobokodoːpé gítobo.' 5 Émpigeːla bulu gognamdém tattoima odokké oːkolaipé gípagamkang-aːko bík aríkpé, akondé bík agerro. 6 Odokké akedé bík pagbokídíːdém sogabgeːla bulum díːto odokké moketo. 7 Migomdé kínggíp aglíngkang; édémpila bí bík maglíngém mélígla mokenékídíːdém mokegeːla buluk dungkom rompakto. 8 Odo bí bík pagbokídíːdém goggeːla luto, 'Midang dobonamséː obola dung, émpigeːla ngo séːkobulum gokkagji bulu gíkannékídíːdémangai. 9 Lambé sungkenkídíːdoːpé gíkang odokké nolu séːkoméi paːyéji bímméi dobokosoːpé gokta.' 10 Édémpila pagbokídíːdé lambékídíːdoːpé gílenna buluk paːlaːnam taniːappíːdém gíkumsumoto, ainém aimaːném appíngém, odokké midaːmoko okumdé mibolo bingkang.11 "Émpigeːla édílo migomdé mibokídíːdém kaːríksukolo gíaːton, odo bí midaːlok génam galug géman taniːko ka:paːsuto. 12 Bí tauto, 'Ajon, midaːlok génam galuk gémaːpé no kapé soːpé gíaːton? Taniːdé agom lulamaːpé dungkang. 13 Odo migomdé pagbokídíːdém luto, "Bík alé alagdok oggaptok, odokké bím ruːyoloːpé, kémokodoːpé gélenníkto, okolo kabnaméla iːpang rékkérépsunamé duːyé.'"
14 Kapéné bojéruːngém goktag, émpigeːla ajjikonémpag balentag.
Urnam-murkongém Binam Tayéːlo Taunam
(Mark 12ː13-17; Luk 20ː20-26)
15 Odo Parosikídíːdé gílenna bím kapé bík agom lumurro sogappé émna ruːsuto. 16 Bulu buluk gímínnékídíːdém Erodia tani:kídíːdok lédílo mélíkto. Bulu luto, "Luyír-abu, ngolu kindag no aroné taniːko odokké arodok lédílo no Ruːnék lambém luyírbidag. Nom amme éngunmola:mang, kapilaːné bulu séːkon édém no sabgomang. 17 Émpém Kaisarmé urnam-murkongém bipaːdoye bipaːmaːye? No okko émna méːdang ngolum lukítei? "
18 Émpigeːla, Jisubí buluk aiman asin méːnamdém kingeːla luto, "Nolu séumonékídínga, kapila nolu ngom luyetpé méngkídun? 19 urnam-murko:pé binam anír murkoːdém ngom léngkankítei."
Bulu bím murkong anírnéko bomabito, 20 odokké bí bulum tauto, "Séː sék moimangén? Odokké sék abígén?"
21 Bulu lulatsutoku, "Kaisarké."
Odo bí bulum luto, "Okodé Kaisarkén Kaisarmé bilang, odokké okodé Ruːnékén Ruːnémé bilang."
22 Édílo bulu édém tatton, bulu tadngaksukang. Édémpila bulu bím mépagla gíngapkangku.
Sikolokké Lékod-Turkunam Tayéːlo Taunam
(Mark 12ː18-27; Luk 20ː27-40)
23 Odo loːngíːdo Soddukikídíːdé, séːkobulu ludang lékod-turkunammé kamang émna, bíkkodoːpé taupénamko kala gído. 24 Bulu luto, "Luyír-abu, Musiːbí ngolum lubitag taniːko ommang kamaːpé simílo, bík bírodé tumbonéːdém midaːmopaːruːyé odokké bíkképé ommang obipaːyé.a 25 Suːpag ngoluk araːlo bírrang kínítko dungngai. Abíngarnédé yamné langgeːla sikang, bíkké ommangé katomang, bí bík yamnédém bík bírodokképé mébito. 26 Édémíːpé akon bírodé sikang, odokké bík lédukédé, édémíːpé kíníddé singapkang. 27 Léddarpé, néːdé sikang. 28 Émpém suːpag, lékod-turdokudo:do, kíníddok sék yamnépé bí iyén, kapilaːné bulu appíngéi bím midaːmoka?"
29 Jisubí lulatsutoku, "Nolu méːmursula dung kapilaːné nolu Ruːnék-gomugdémna Ruːnék tornamdém kinmang. 30 Lékod-turdokudod taniyé yamnémsin laːmaːyé odokké amiloːsin gímaːyé; bulu tayéng-amongké tayéng-yaːme kísayé. 31 Émpigeːla sinékídíːdok lékod-turkunam tayéːlo-Ruːnébí okko émna nolum lutang édém nolu pokímaːnei, 32 'Ngo Abraamké Ruːnébí, Isakké Ruːnébí odokké Jakupké Ruːnébí?' Bí sinélok Ruːnémang émpigeːla bí turnélok Ruːné."b
33 Édílo taniːkéréːdé édém tatton, bulu bík luyírnamdém tadngaksuto.
Botténé Lulígnam
(Mark 12ː28-34; Luk 10ː25-28)
34 Soddukikídíːdém Jisubí ngak émdopé lumandém tatpaːla, Parosikídíːdé lékkopé gíkumsukang. 35 Buluk araːdok aːko, luroːém aigampé kinnéko, séː taunamsokki bím ankaːtoː 36 "Luyír-abu, Ruːnék Luroːdo bottéryaːné lulígnamdé okodén?"
37 Jisubí lulatsutokuː "'Nok Ruːné, Ruːtummé nok appíng asinki, nok appíng iji-yaloki odokké nok appíng méːlotki aipé-méːlang.'c 38 Séː lupoːnamdéːla bottaryaːné lulígnamdé. 39 Odokké akon lulígnamdé sémpé idagː 'Nok kumrém nok aíkémpé aipé-méːlang.'d 40 Séː lulígnam baːnyiso Ruːnék Luroːéla Lungor-lunam appíːdé bigabla dung."
Mesiaːké Tayéːlo Taunam
(Mark 12ː35-37;Luk 20ː41-44)
41 Édílo Parosikídíːdé lékop gíkumsuton, Jisubí bulum tauto, 42 "Séːko Mesiaːbí émna nolu méːdon? Bí sék aoːon?"
Bulu lulatsutoku, "Debitké aoːo."
43 Bí bulum luto, "Émpém Yaloki lula kapé Debidbí bím sémpé lukan, 'ngok Ruːtum' ? Kapéné Debidbí luto,
44 'Jiuabí ngok Ruːtummé lutoː
Ngok lagbukpé tettokai
édíloːpé ngo nok miruém nok alé kéígbo mémaːyéji.'e
45 Debidbí bím 'Ruːtum' émna luduːmílo, kapé bí bík aoːpé ilaːyén?"
46 Séːko:sin agom apírko lulatsulaːtokumang, odokké édé longédokké séːkosin bím okkomsin taunan angé katomang.