Jisubí Parosilogla Luro Luyírnékídíːdok Kekonpé Lupang Lunam
23
Odo Jisubí taniːkéréːdémna bíkkol luyírsunékídíːdém lutoː 2 "Luro luyírnékídíːdéːla Parosikídíːdé Musiːké tetkodo teddag. 3 Édémpila nolu buluk lunamém tadla ibompé lagidag. Émpigeːla bulu okkom idang édém imínyok, kapéné bulu okkom lugoːbidagji édém bulu ikumang. 4 Bulu taniːlok amírro joːnamém raglígdag okodé tébégnammé joːlangéimang, émpigeːla bulu aíkídíːdé édémbulum bulum joːlígbipé buluk lagné asongkosin éngunmolíːmang. 5 Taniyé kaːyépé émna buluk inam ager appíːdém idag. Bulu Ruːnék-gomugém pítaruːné tabijlo gédag, odokké araipé bíkélé:dopé pariém gédag; 6 dokotíngkolo bulu ménggésuko tetkodo tedlíːdag odokké murong-okumnoːsin aiyangarkodém madag. 7 Bulu réko-kokokídíːdo kumríksunamém madag odokké taniyé bulum 'Rabbi' émna goktei émna méːdag. 8 Émpigeːla nolum 'Rabbi' émna gokpénammang, kapéné nolukké Luyírné akkongko dung odokké nolu appíngé bírrango:ngé. 9 Odokké mo:píso nolu sékomsin 'Abu' émna gogyok, kapéné nolukké Abbo akkongko dung, odokké bí tayéng-amoːté dung. 10 Nolum 'luyírné' émnaːsin gokpé lagimang, kapéné nolukké Luyírné akkongko dung, édé Kiristobí. 11 Noluk araːdok bottéryaːnédé noluk pagbopé ipélagiyé. 12 Kapéné séːkobíi bottépé méːsuyéji bím ajjimoyé, odokké séːkobíi ajjisuyéji bím bottémoyé.Jisubí Buluk Séumonamdém Lupagnam
13 Méːdíré nolukkoloːpé, luro luyírnéla Parosikídínga, nolu séumonékídíngaǃ Nolu taniːlok kanggaːdo tayéng-among migomdokodok yabgodém síkkabdag. Nolu aíkídíːdé gíaruːmang odokké gíaːpé émna inékídíːdémsin gíaːmomang.a
15 Méːdíré nolukkoloːpé, luro luyírnéla Parosikídínga, nolu séumonékídíngaǃ Nolu doːludoːluloːla abungém kongkola tani aːkom nolukkolo aːbodo, odokké édílo bí nolukkolo aːmíndagji, nolu bím nolumyang lémyikop aiyamaːnép imola noluk gíko uiːamopé gíbodag.
16 Méːdíré nolukkoloːpé, migluge:la gígébonékídíngaǃ Nolu luyírdo,'Séːkai kumli aminki pesumílo, édé atísinmang; émpigeːla séːkai kumli:dok aíndokki pesumílo, bí bík pesunamdém iparuːyé.' 17 Nolu miglun makkornékídíngaǃ Okodé bottéyaːdangː aíndé bottéyaːdagyé kumli:déyé okodé aíndém angunnmodang?b 18 Nolu luyírdo, 'Séːkai runggudokki pesumílo, édé atísinmang; émpigeːla séːkai odok tayéːdok duːné amandokki pesumílo, bí bík pesunamdém iparuːyé.' 19 Nolu miglun taniːyaǃ Okodé bottéyaːdangː amandé bottéyaːdagyé runggudéyé okodé amandém angunnmodang? 20 Odok-léga:pé, séːkobí runggudokki pesuyéji bí odokkilang odok duːné appíngki pesudag. 21 Odokké séːkobí kumli:dém pesunadang bí odokki pesunadag odokké séːko odo duːdagji odokki pesudag. 22 Odokké séːkobí tayéng-amongki pesudagji bí Ruːnék migom-tetkodokki pesunadag odokké séːko odo teddoji bíkkoki pesudag.
23 Méːdíré nolukkoloːpé, luro luyírnéla Parosikídínga, nolu séumonékídíngaǃ Nolu noluk baːri oyiːlok-oːri, podina, jira odogbuluk bipénam íyíːdém bido. Émpigeːla nolu luroːdok lagipagyaːnamdém méːyamésapakto-aro kébangém, ayangém, odokké aronamdém. Nolu poːpékédém méːyaméːsamaːpé lédíkédém ipénammai.c 24 Nolu miglugeːla gígébonékídíngaǃ Nolu tamigém darpagdo émpigeːla uːtkoném medlígdo.
25 Méːdíré nolukkoloːpé luro luyírnéla Parosikídínga, nolu séumonékídíngaǃ Nolu arém batilok ruːyidém béːpuːdo, émpigeːla araːdé agroyangéla aíongkép méːsunammé biːpogla dung. 26 Miglun Parosikídíngaǃ Arém batidok arangkédém béːpupoːto, odokké odo ruːyidéːsin naréːtéyépé.
27 Méːdíré nolukkoloːpé, luro luyírnéla Parosikídínga, nolu séumonékídíngaǃ Nolu kampola duːné agokídíːdémpé idag, okodé ruːyido aipé kangkandag émpigeːla araːdo siné taniːlok alongé bi:la dung odokké okkosin naréːmang.d 28 Édémarpé, taniːlok kanggaːlo nolu arolok-duːné kísapé léngkansudag émpigeːla ara:bo séuolang aimangoːné."
Jisubí Buluk Paːpénam Mokemoramém Lunobito
(Luk 11ː47-51)
29 "Méːdíré nolukkoloːpé luro luyírnéla Parosikídínga, nolu séumonékídíngaǃ Nolu lungor-lunékídíːdok léga:pé aggom agnoːto odokké arolok-duːnékídíːdok aggom nolu tíbuːlígbitag. 30 Odokké nolu ludo, 'Ngolu ngoluk abukídíːdok longékídíːdo turnamkaːmílo, ngolu lungor-lunékídíːdém íːi bidmonamdo katéma:yai.' 31 Édémpé nolu noluk aíké kekonpé lusudung nollung lungor-lunékídíːdém mokenékídíːdok ommangé. 32 Noluk abukídíːdok inam imuríːdém nolusin idungǃ 33 Nolu tabíkídíngaǃ Nolu tabílok ommangkídíngaǃ Kapé nolu uiːamoːboːpé lupagnamdokké dukpítsuyén? 34 Odok-léga:pé ngo nolukkoloːpé lungor-lunném, méːjoːném odokké luyírném mélígyé. Bulukkolok akkem nolu mokeyé odokké kuruslo biyé; akonkídíːdém noluk murong-okumkídíːdo díːyé odokké nogor nogorroːpé nolu ménmínyé. 35 Odokké noluk tayéːlo mo:píso arolok-duːnékídíːdém bidmonam iːdok ajéːdé aːyé, arolok-duːné Ebelké iːdokké Berikiaké aoː Jakariyaké iːdoːpé, séːkobulum nolu kumli:dogla runggudok pongkogdo mokekan.e 36 Ngo nolum arodém lubidung, bulu appíːdém mokenam ajéːdé séː opeːsok tayéːlo a:yé."
Jerusalemké Légaːpé Jisuk Ayang
(Luk 13ː34-35)
37 "Jerusaleméí, Jerusalema, nolu lungor-lunékídíːdém mokkeyamto odokké nolukkoloːpé mélígnamkídíːdém nolu ílíngki gékkeyamtoǃ Noluk ommangém lékkopé gíkumsumopé émna ngo airuːpé méngkíto, kapé rogoné porokkoné bík ommangém bík alap kéígdo gíkumsumodagji, émpigeːla nolu gíkumsulíːmang. 38 Kaːtok, noluk okumé nolum atéroːpé mépagyé.f 39 Kapéné ngo nolum lubidung, 'ayang-paːnédé bí séːko Ruːtumké aminno gíduji,' émna édíloːpé nolu lumaːyéji, lékoda ngom nolu ka:pa:ngkumaːyé."g