Kumliːdém Momígnamdém Jisubí Lunobinam
(Mark 13ː1-2; Luk 21ː5-6)
24
Jisubí kumli:dokké gílenna gíladuːdodo édílo bíkkol luyírsunékídíːdé bíkkodoːpé gísaːla bím bottén-okumkídíːdok kangkannamdém kaːmoton. 2 Odo bí tauto, "Nolu séː appíːsém kaːbegdoye? Ngo nolum arodém lubidung, sido ílíng apíko píkondok tayéːdo pangkumaːyé; ílíng appíːsém géledamnígyé."Ngasodéla Ipusire
(Mark 13ː3-13; Luk 21ː7-19)
3 Olib adi tayéːdo Jisubí tedla duːdodo, luyírsunékídíːdé ami kamango:pé bíkkodoːpé gísa:do. Odokké bulu luto, "Édílo édémpé iyén ngolum lukítei, odokké nok gíkunamdéːla ayírsok gíngabnam kanggodém okko émna léngkanyén?"
4 Jisubí lulatsutoː "Séːkosin nolum yadlamaːdopé, totsulang. 5 Kapéné bojéruːngko taniye ngok aminno gíyé, 'Ngo Kiristobí émna lusuyé,' odokké bojéru:ngkoném yadyé. 6 Nolu mimag monamémna mimag modung émna lunamém tadbeksuyé, émpigeːla édém nolu ansukaːsulang édémpinné nolum éngunmopé lagimang. Édémpinné iparuːyé, émpigeːla itérdé aːyomín. 7 Réngamé réngamnok kekonpé dagrobyé, migomdokko migomdokolok kekonpé moaːyé. Bangkí bangkílo angka:lé aːyé, taromotoné tonyé. 8 Séː appíːsé ommang odílok aki kirobnam kísapé kiye.
9 Odo nolum sogabgeːla mokemoramdopé tolígyé odokké nolum mokeyé. Ngok légaːpé appíngé nolum tayumyé. 10 Odo ayírdo bojéruːngko taniye buluk méːjíksunamnokké opagledyé; bulu akoné akoném yadla-kopagyé odokké akoné akoném tayumyé. 11 Odo bojéruːngko aroman lungor-lunné lenna bojék taniːyém yadyé. 12 Aimaːné bojébomnamé, abayang taniːlok ayangé ansíːpagyé. 13 Émpigeːla léduduridoːpé séːko duːyaryéji bím moturbiyé. 14 Odokké migomdokodok tayéːlo séː tatpon lutatsém moːpísok appíːlo takam taniːyém lubidokupé lugoːbiyé; odokké odo gíngabné ayírdé aːyé."
Míryadla Pésokannam
(Mark 13ː14-23; Luk 21ː20-24)
15 "Édémpila lungor-luné Danielké lunamdémpé, bélumkannamdé okodé momígmosígdagji, édílo nolu bím angunné kumliːdo dagla duːdopé kaːpaːyéji -ponném tatkinmotok,a 16 odo séːkobulu Judia:do duːji bulu diːtékídíːdoːpé dukpítsulang. 17 Séːkoi bík okum míːdumdo duːji bí okumdok oːkaiko laːlenkolo gíiyoku. 18 Séːkoi aríglo duːji bík galugém langkakupé gíladyoku. 19 Édé longékídíːdé amírrokané néːngkídíːdokképéla anyug sunné anékídíːdokképé éddíko míryadgéla pésokannépé iyéjiǃ 20 Noluk duggénamdé dígínnoːla Yoddo longélo aːmadopé kumtok. 21 Kapéné odo ruːlendokké siloloːpé angkíman kínggíné ngasodé aːyé-édémpinné lékoda angkumaːbo.b 22 Édé longékídíːdém andé moma:namkaːmílo, aːkosin turmaːyai, émpigeːla balennamkídíːdok légaːpé édé longékídíːdém andé:moyé.
23 Séːkai nolum lumílo odo ayírdo ,'Kangkítok, Kiristobí séː dungǃ' émmamílo 'Bí élé dungǃ' édém méngkésuyok. 24 Kapéné aroman Messiangélang lungor-lunné lenna botté botténé kanggodémna méːpílaːmaːnamém léngkanyé pagmílo balennamkídíːdémsin yatkaːyé. 25 Kangkí, ngo nolum longkobo lunobika.
26 Édémpila séːkai nolum, 'Bí élé sullipottélé dung,' émna lumílosin gílenyok; odokké 'Bí séː arangké soyarkídíːdo dung,' émna luggom édém méngkésuyok. 27 Kapéné sanggatok arné yaridém oːabokké kapé ka:begdoji, édémíːpé Taniːké Aoːké gíkunamdémsin kaːbegyé.
28 Okoloi simangé duːji, odo sogumé déngkumsuyé.
Taniːké Aoːké Gíkunamdé
(Mark 13ː24-27; Luk 21ː25-28)
29 Édé ngasodné longékídíːdok léddardo, doːnyimé kémomoyé, poːlobí bík píangém pímayé; doːmírtokké takaré opagledyé; odokké doːmírtok duːnékídíːdém éngunmoyé.'c 30 Odo Taniːké Aoːké kanggoddé doːmírto lenyé, odokké mo:písok appíng réngamé méːdírra kabyé. Bulu Taniːké Aoːké gíkunamdém doːmírtok mukkangkídíːdo, tornamnoːla kínggíné unjíg lédílo ka:begyé.d 31 Odokké pítané tuːtogdém mudyé, odokké moːpísok suːpiːdoːpé bí bík tayéng-yaːmekídíːdém mélennígyé, odokké bulu moːpísok kekondokké kekon duːtérdoːpé bík balennam taniːkídíːdém gíkumsumoyé.
Tajíg Amídokkolok Kinpénam
(Mark 13ː2-31; Luk 21ː29-33)
32 Suːpag tajíg amíːsok sém kinnang. Édílo réngkéngkídíːdé geyomna rémagdon odokké odo otsuré nginnendag, nolu díyye aninkaːbo émna kindag. 33 Édémíːpé, édílo nolu édé appíːdém kaːbegyen, odo nolu kinyé ayírdé aninna édé yabgodoːpé píngadankaːbo émna. 34 Ngo nolum arodém lubidung, édíloːpé séː appíːsém imaːyéji odoloːpé séː opesé aroruːpé singabmaːyé . 35 Tayéng-amoːtéːla mo:písé yogyé, émpigeːla ngok agomkídíːsé yogmaːyé.
Longédémna Aːdíːdém Séːkosin Kinmang
(Mark 13ː32-37; Luk 17ː26-30;34-36)
36 Édé longédémna a:dídém séːkosin kinmang, tayéng-yaːmekídíːdéːla Aoːdéːsin kinmang, émpigeːla Abubí atéroːdé kindag. 37 Nuaːké longékídíːdé kapé idagaːji, édémarpé Taniːké Aoːké longékídíːdéːsin iyé.e 38 Pumi asi poːpé, Nuaːké ollung araːdoːpé gíamaːdo longédoːpé, taniːkídíːdé dodungai tíːdungai, yamném laːdungai, amilo bidungai; 39 odokké édílo pumi assé bulum bidyutton odoloːpé okko kapidagji édém bulu ankinsutomang. Édémíːpé Taniːké Aoːké gídokudodo iyé. 40 Taniːannyiko arígdo duːyé; aːkom gíboyéku odokké akondém mépagyé. 41 Mimé annyiko donam íbosula duːyé; aːkom gíboyéku odokké akondém mépagyé. 42 Odok-légaːpé totsulang, kapilaːné nolu kinmang oko longédo noluk Ruːtumbí gíladyékuji. 43 Émpigeːla sém kinnangː Okumdok ruːtumdé yumédok oko ayírdo dopsodé gíaːyéji édém kinnamkaːmílo, bí darra duːyai odokké bík okumdoːpé dopsongém gíaːmomaːyai. 44 Édémpila nolusin lennoːla duːlang, kapilaːné Taniːké Aoːbí ayírmumkolo gíladyéku édílo nolu bí gíyékupé émna méːmaːyéji odo gíyéku.
Aronéla Aroman Pagbo
(Luk 12ː41-48)
45 Émpém séːko aronéla méːjoːné pagbodén, séːkom ruːtumdé bík okum-éraːdok pagbokídíːdém buluk lagidodo bulum donamém bidopé bík alagdo tolíktang? 46 Édílo bík ruːtumdé gíladyékuji odo bím édémpé iladudoːpé paːmílo édé pagbodokképé aiyé. 47 Ngo nolum arodém lubidung, bí bím bík kanam appíːdok tayéːlo menejarpé tolígyé. 48 Émpigeːla bí aiman pagbokop igeːla aíém lusumílo, 'Ngok ruːtumdé arai araipé duːyarkang,' 49 odokké bí bík pagbo ajonkídíːdém díːrobla dola tíːla tíngursula duːmílo. 50 Édílo bí bím gíyékupé émna méːmaːyéji odokké bík kinsumanam ayírdo édé pagbodok ruːtumdé longéko gíladyéku. 51 Bí bím attung attuːpé gadréggeːla séumonékídíːdok lédílo duːmoyé, okolo kabnam riːnaméla iːpang rékkérépsunamé duːyé.