Mímbír Íyíngkoném Luyisula Lubinam
25
"Odo ayírdo tayéng-among migomdokodé sémpé iyé. Longékoném mímbír íyíngkoné séːkobulu buluk serakiém bomna midaːmagbodém ríksukolo gílendo. 2 Bulukkolok angngoko makkoriːdaggai odokké angngoko méːjoːdaggai. 3 Makkoriːné angngodé buluk serakikídíːdém bomna gíto émpigeːla ajjikosin tulangém buluk lédílo bomsetomang. 4 Émpigeːla méːjoːnékídíːdé, buluk serakikídíːdok légaːpé pígéngkolo biːdopé tulangém bomtéːtag. 5 Midaːmagbodé gígortokuma, édémpila bulu appíngéi todírra yubngaksukang.6 Yuméyo:raːdo jéːropkangː 'Midaːmagbodé sidéí gídokuboǃ Gílenna bím ríksutaǃ' 7 Odo mímbír appíːdé kinsula buluk serakikídíːdok olita:dém gadyinsuto. 8 Makkoriːnékídíːdé méːjoːnékídíːdém luto, 'Ngoluk serakikídíːsé midyébo; nolukkolok tulang ajjiko ngolumsin bisuipén.' 9 Bulu lulatsutoku, 'Ma, ngolu bisula:maːyé, nolukképéla ngolukképé tula:séː píːma:yé. Édémpila, tulang kokoloːpé gíla nolukképé résetpoːta.' 10 Édémpila makkoriːnékídíːdé tulangém rékolopé gíkang, odokké édílo bulu gíkan mida:magbodé gípíːdo. Mímbír angngodé séːkobulu lenno:la bím toya:la dungngaji bík lédílo dobokodoːpé gíamínkang. Odokké yabgodém síkkapto.
11 Lédípé akonkídíːdé gípíːdo odokké kabla luto, 'Ruːtuméi, Ruːtumaǃ Ngolukképé yabgodém síggeteiǃ' 12 Émpigeːla midaːmagbodé lulatsutoku, 'Ngo nolum arodém lubidung, ngo nolum kinmang.'
13 Odok-légaːpé ansulang, kapilaːné nolu longédémna aːdídém kinmang.
Pagbo Aumkoném Luyisula Lubinam
(Luke 19ː11-27)
14 Odo ayírdo tayéng-among migomdokodé sémpé iyé. Longékoném taniːkoné gígongkolo lendung; bí bík pagbokídíːdém goggeːla bík ompotikídíːdém ka:sídopé lulíkto. 15 Akoném bí líːyíng angngoko, akondém líːyíng annyiko odokké akondém líːyíng ako murkongém bito, bulum appíngém buluk kaːsílaːnamdémpé bito. Odokké bík gípékodoːpé bí gíkang. 16 Líːyíng angngoko murkongém binam taniːdé oddar gílenna murkoːdém agerro líkto odokké líːyíng angngokoda paːsetto. 17 Édémíːpé, líːyíng annyiko paːnédé líːyíng annyikoda paːsetto. 18 Émpigeːla líːyíng ako toríksunédé gígeːla, amoːdo arungko ngunto odokké bík ruːtumké murkoːdém tagrumna léːto.
19 Arai araipé duːnam lédupé longéko édé pagbokídíːdok ru:tumdé gíladdoku odokké bulum tolígnamkídíːdém buluk lédílo saptoku. 20 Pagbodé séːko líːyíng angngoko murkongém toríksukan gíala paːsednam líːyíng angngodém bito. Odokké bí luto, 'Ruːtuma, no ngom líːyíng angngoko murkongém tolíkka. Kangkítok, ngo líːyíng angngokoda paːsetto.' 21 Bík ruːtumdé lulatsutoku, 'Airuːpé aidag, ainéla aroné pagbonoǃ No ajjinélok tayéːlo arola duːyarto, ngo nom bojéruːngkolok tayéːlo migompé tolígyé. Odokké gígeːla nok ruːtumké méːponamso méːpomíntaǃ' 22 Líːyíng annyiko murkongém toríksuné pagbodé gíaːla luto, 'Ruːtuma, no ngom líːyíng annyiko murkongém tolíkka; kangkíto, ngo líːyíng annyikoda paːsetto.' 23 Bík ruːtumdé lulatsutoku,'Airuːpé aidag, ainéla aroné pagbonoǃ No ajjinélok tayéːlo arola duːyarto, ngo nom bojéruːngkolok tayéːlo migompé tolígyé. Odokké gíla nok ruːtumké méːponamso méːpomíntaǃ' 24 Odo pagbodé séːko líːyíng ako toríksukan bí gíaːla luto, 'Ruːtuma, ngo kindag no makkeresiyané taniːko, no lemangkodok gaddakku odokké no amni pidmangkodok langkumsudakku. 25 Ngo pésokang, édémpila ngo gíla nok murkoːdém amoːbo yusíːla léngka. Kangkítok, sidé nok binam murkoːdé.' 26 Bík ruːtumdé luto, 'No aiman, loːbagné pagbonoǃ No kindagai ngo okolo lema:ji odok gaddoku odokké okolo amni pidlígma:ji odok langkumsudoku émna. 27 No ngok murkoːdém murkong méko okumkolo mépénammai, odo ngok gíladdokuso murkong appíːdém paːlangkula odok lédílo ngo léːrédém paːtéyai. 28 Bíkkolok murkoːdém laːpaggeːla séːkké líːyíng íyíngko murkongé duːji édém bím bitok. 29 Kapéné séːkké duːji bím abako bisedyé, odo bí kasekayela kayé. Séːkké kamaji, odokké bíkké okko duːji édémsin bíkkolokkém laːpagyé. 30 Odokké édé aré kaman pagbodém ruːyolop kémokodoːpé gélenníktok, okolo kabnam riːnaméla iːpang rékkérépsunamé duːyé.'
Baːtérnam Kébaːdé
31 "Édílo Taniːké Aoːbí bík unjígdo gíyékuji, odokké tayéng-yaːme appíːdé bík lédílo gímínyéku, odo bí bík unjígné migom-tetkodo tedyé. 32 Takam réngamém bík kanggaːdo gíkumsumoyé, odokké bí taniːkídíːdém bapansuyé kapé meːr-kaːsíːnékoné meːrém sobenkídíːdokkém goːpansudoji.a 33 Bí meːrkídíːdém bík lagbíkpé odokké sobenkídíːdém bík lakkepé léːyé. 34 Odo Migomdé bík lagbíkkékídíːdém luyé, 'Nolum séːkom ngok Abubí ayangém bitang, gítok noluk panggom laːta; odokké moːpísém ruːlendokkéboi noluk légaːpé migomdokodém léːno:bitag. 35 Kapéné ngo kénola duːdodo nolu ngom donamém dodopé bika, ngo asi-tíːlíla duːdodo nolu ngom assém tíːdopé bika, ngo gígola duːdodo nolu ngom noluk okumno boríksuka,b 36 ngo pítsula duːdodo nolu génamém bika; ngo kila dungngai, nolu ngom mosíngka, ngo makanaːlo dungngai, nolu ngom gíkaːlakangka.' 37 Odo arolok-duːnékídíːdé bím lulatsuyé, 'Ruːtuma, édílo ngolu nom kénodopé kaːla nom dobokan, émmamílo asi-tíːlílduːdopé paːla assém tíːdopé bikan? 38 Édílo ngolu nom gígola duːdopé kaːla nom okumdo boríksukan, odokké pítsula duːdom génamém bikan? 39 Édílo ngolu nom kila duːdopémanggom makanaːlo duːdopé kaːla nom gíkaːlakangkan?' 40 Migomdé lulatsuyé, 'Ngo nolum arodém lubidung, nolu ngok séː bírrangkídíːsok ajjiyaːné aːkom okkomei ibikan, nolu ngok légaːpé ibito.'
41 Odo bí bík lakkepé duːnékídíːdém luyé, 'Nolu ngokkosokké géːrkang, séːko penamém paːnén. Ugngasuman umídoːpé gér okodém Uiːképéla bík baríkkídíːdok légaːpé romna léːtag. 42 Ngo kénola dungngai, nolu ngom okkomsin dodopé bitomang, ngo asi-tíːlíla dungngai, nolu ngom okkomsin tíːdopé bitomang, 43 ngo gígola dungngai, nolu ngom noluk okumdo boríksutomang, ngo pítsula dungngai, nolu ngom génamém bitomang, ngo kila dungngai, makanaːlo dungngai émpigeːla nolu ngom kaːtomang.' 44 Bulusin lulatsuyéku, 'Ruːtuma, ngolu édílo nom kénodopé, tíːlí:dopé émmamílo gígodopé pítsula duːdopé kila duːdopémanggom makanaːlo duːdopé kaːla nom kaːdumsutoman?' 45 Migomdé lulatsuyé, 'Ngo nolum arodém lubidung, nolu okkomei séː ajjinékídíːsok aːkom ibitoma:ji, nolu ngok légaːpé ibitomang.' 46 Odo bulum mokemoram paːyarpékodoːpé mélígyé, émpigeːla arolok-duːnékídíːdé turyarné turkodoːpé gíyé."c