Jisum Mokepé Émna Ruːsunam
(Mark 14ː1-2;Luk 22ː1-2; Jon 11ː45-53)
26
Jisubí édé appíːdém luyírambinam lédupé bí bíkkol luyírsunékídíːdém luto, 2 "Nolu kinnaiduːbo, Gíbo:la-donam Gíːdíːdé loːnyi lédupé aːdobo-odokké Taniːké Aoːmé kurusolo pítkedopé tolígyé."3 Odo abíné miríkídíːdéːla midumkídíːdé Kaipaské bottén-okumdo gíkumsuto, Kaipasbí abíngaryaːné mirídéːai, 4 odokké bulu Jisum léːsila sogabgeːla bím mokepé émna ruːsuto. 5 Bulu luto, "Émpigeːla gíːdí ayírsoːmang, émmamílo taniːkídíːdé urradyé."
Jisumé Betaniːdo Tulangki Írnam
(Mark 14ː3-9; Jon 12ː1-8)
6 Édílo Jisubí Betaniːdok ngero-ro:nam Simonké okumdo dungngan, 7 odo airu:pé arékan yonsunamko kamponéla tupunné ílíngki monam botolko bomaːla miméko gíaːdo, Jisubí doko tebuldo du:dagdo bí bík tukkudo édém pílígbito. 8 Édílo luyírsunékídíːdé édém kaːton, bulu aglíngkang. Odokké bulu luto,"Kapila sémpé moyagdun? 9 Séː yonsunamsém kola bojéko murkongém paːyai odokké murkoːdém opanném bilaːyai."
10 Édém ankingeːla, Jisubí bulum luto, "Kapila nolu séː mimésém lukiluaddun? Bí ngokképé botténé agerko ibitag. 11 Opannékídíːdé noluk lédílo loːdísém duːyaryé, émpigeːla nolu ngom loːdísém paːmaːyé.a 12 Édílo bí ngok amírso séː yonsunamsém pílíkton, bí édém yusíːnam légaːpé ngom inoːbitag. 13 Ngo nolum arodém lubidung, moːpísok okoloi séː tatpon lutatsém lugoːbiyéji, bím méːpaːla duːdopé, bí okkom ikan édémsin lugoːbitéyé."
Judabí Jisumé Yadla-Kopé Émna Togésuto
(Mark 14ː10-11; Luk 22ː3-6)
14 Odo yí:laːnyídok aːko-séːkom Juda Iskortia émtagan- abín miríkídíːdoːpé gíkang 15 odokké tauto, "Ngo bím noluk alaglo tolígmílo nolu ngom okkarém bipé méːdun?" Édémpila bulu bík légaːpé yíngumko murkonglok anír murkongém sablenbito. 16 Édé ayírdokké Judaːbí bím buluk alaglo tolígbipé émna solo:ko angoːto.
Jisubí Luyírsunékídíːdok Lédílo Gíbo:la Donamdém Dojonsuto
(Mark 14ː12-21; Luk 22ː7-13;21-23;Jon 13ː21-30)
17 Kaːr lígmaːpé Pitang donam gíːdíːdok anggotpo:né longédo, luyírsunékídíːdé Jisukodoːpé gígeːla tauto, "Gíbo:la donamdém dopé nok légaːpé okolo no ngolum moninsumolíːdang?"
18 Bí lulatsuto, "Nogordoːpé gíaːla édé taniːardém lulang, "Luyírnébí ludag, ngom tolígnam ayírdé aninkaːbo. Ngokkol luyírsunékídíːdok lédílo ngo Gíboːla donam gíːdíːdém nok okumso doyé.'"
19 Édémpila luyírsunékídíːdé bulum Jisubí lukamardémpé ibito odokké Gíbo:la donamdém moninsuto.
20 Édílo yummayírkan, Jisubíːla Yí:laːnyidé dopé émna tedangkang. 21 Dola duːdodo Jisubí luto, "Ngo nolum arodém lubidung, nolukkolok aːko ngom yadla-kopagyé."
22 Bulu airuːpé méːdíramkang odokké ako akopé bím tauropto, "Ruːtuma, aroruːpé édé ngoːma."
23 Jisubí lulatsuto, "Séːkobí ngok lédílo pitaːdém batiːdo jíːbudyéji bí ngom yadla-kopagyé. 24 Taniːké Aoːbí édémpéi siyé kapé bík tayéːlo Ruːnék-gomugdo adla léːtagji. Émpigeːla méːdíré édé taniːdokkoloːpé séːko bím yadla-kopagyéjiǃ Bím omanamka:mílo bíkképé aiyadaggai."
25 Odo Judaːbí, séːko bím yadla-kopagyéji, luto, "Rabbi, édé aroruːpé ngoːma?"
Jisubí lulatsuto, "Noːmín lusudun."
Ru:tumké Dobonam
(Mark 14ː22-26; Luk 22ː14-20; 1 Kor 11ː23-25)
26 Édílo bulu dola dungngan, Jisubí pitangko laːto, aipai bigeːla édém pentu:to, odokké édém bíkkol luyírsunékídíːdém bige:la luto, "Sém laːtok odokké dotok; sidé ngok adiné."
27 Odokké bí batiːdém langgeːla aipai bito odokké édém bulukkoloːpé bigeːla luto, "Nolu appíngé sidok tíːtok. 28 Sidé luségdok ngok íːyé, okodém bojéruːngkolok légaːpé paːbém méːyinsubidopé pílenbitag.b 29 Ngo nolum lubidung, ngo séː aposém édé longédoːpé lékoda tíːmaːyé, édíloːpé ngo noluk lédílo anu apongém ngok Baːbuké migomdokodo tíngkumaːyéji."
30 Odokké bulu kumnam-niːtomko mogeːla Olib adidoːpé gílenkang.
Pitorbí Jisumé Lupaksunam
(Mark 14ː27-31; Luk 22ː31-34;Jon 13ː36-38)
31 Odo Jisubí bulum luto, "Siyumké yuméso nolu appíngé ngom mépagamyé, kapéné édém adla léːtagː 'Ngo meːrkaːsínédém díːtabyé, odokké meːr kéré:dém dukpitsumoyé.'c 32 Émpigeːla ngok turkunam lédupé, nolum gípoːyaːla ngo Galiliːpé gíyé."
33 Pitorbí lulatsutoku, "Nom appíngé mépaggom, ngo nom édílo:sin mépagma:yé."
34 Jisubí lulatsuto, "Ngo nom arodém lubidung, siyumké yummarso, porogé kogmangoːdapé, no ngom léumkopé lupaksuyé."
35 Émpigeːla Pitorbí lusuto, "Nok lédílo ngo simínpénampé igom, ngo nom édílo:sin lupagmaːyé."
Odokké akon luyírsuné appíːdé édémíːpé luto.
Getsemoniːdo Jisuké Kumnam
(Mark 14ː32-42; Luk 22ː39-46)
36 Odo Jisubí bíkkol luyírsunékídíːdok lédílo Getsemoni émkodoːpé gíkang, odokké bí bulum luto, "Ngo oloːpé gíla édílo kumyeji odo nolu sido tedla duːpoːlang." 37 Bí Pitorméla Jibediké aoːannyidém bík lédílo gíboto. Méːdírréla ngasodé bíkkolo angkang, 38 odokké bí bulum luto, "Ngok asinséː betkékírampé kidung. Sido duːla ngok lédílo darmínto."
39 Ajjiko gíéroːugeːla, bí amoboːpé pogbumge:la kumto,"Ngok Abu, sém no ilaːmílo, séː batisok ngasotsém ngokkolokkém laːpaktei. Émgom ngok méngkampémang, émpigeːla nok méngkampépag."
40 Odo bí bíkkol luyírsunékídíːdoːpé gílattoku odokké bulum yubngaksulduːdopé paːto. Bí Pitormé tauto, "Nolu taniːkídínga ngok légaːpé ajjoukosinei darra duːla:man?" 41 Darra kumtok odo nolu ankaːlo opaglemaːyé. Yaloséː méːdag, émpigeːla amírséː siperedag."
42 Bí lékoda gílenna kumtoku, "Ngok Abu, ngo édíloːpé séː ngasodné batisém tíːmaːyéji odoloːpé laːpagbilaːmamílo, nok méːnamdémpé ibitok." 43 Édílo bí gílattokun, lékoda bí bulum yubngaksulduːdopé paːto, kapilaːné buluk amigé iːdla dungngai.
44 Édémpila bí bulum mépagla lékoda gílenna kumto, bí édé kumnamíːdém kumtoku. 45 Odo bí luyírsunékídíːdoːpé gílattoku odokké bulum luto, "Nolu suːpésinéi yubngaksula duːrasuladun? Kaːtok, aːdídé aninkaːbo, Taniːké Aoːmé imurnékídíːdok alaglo yadla-kopaktobo. 46 Daropto, odokké kajé ngolu gílaːboiǃ Ngom yadla-kopagnédé sén gíadobonǃ"
Jisum Sogabnam
(Mark 14ː43-50; Luk 22ː47-53; Jon 18ː3-12)
47 Édílo bí lulangí dungngan, yí:laːnyídok aːko, Judaːbí gípíːdo. Bík lédílo bottén kéréngkopé taniyé alaglo yoksémna tukuném bomna gído, séːkobulum abín miríkídíːdéːla midumkídíːdé mélíktaggai. 48 Yadla-kopanédé bulum kanggotko lubikaː "Séːkom ngo dosugyén bíːéi édé taniːdé; bím sogablang."
49 Jisukodoːpé gídanna, Judaːbí luto, " Rabbiǃ Asin-aséngé," odokké bím dosukto.
50 Jisubí lulatsutoku, "Ajona, oko légaːpé no gíduːji édém igorto."
Odo taniːkídíːdé gísaːla, Jisum laglígla sogapto. 51 Odo Jisuk duːjonkídíːdok aːko bík yoksadém sadlenna abíngaryan mirídok pagbodém paːlígla bík yerungém papakto. 52 Jisubí bím luto,"Nok yoksadém odok sobugdo líktokuk, kapilaːné séːko yoksém sadlenyéji bí yoksalo siyé. 53 Ngo ngok Baːbumé goktinsulaːmang émna nolu méːdang? Ngo lumílo bí lékkolo yíːlaːnyi lejionkod tayéng-ya:me maglíngém ngokkosoːpé mélígyé. 54 Émpigeːla kapé Ruːnék-gomugdok adnamdém ilet-gíledyén okodém sémmarpé ipélagiyé émna attang?"
55 Odo Jisubí kéréːdém luto, "Ngo abbugjoné taniyéi, nolu ngom sogapkolo yoksém tukuném bomna gídun? Loːdísém ngo kumli lotta:do tedla luyírdungngai, odo nolu ngom sogaptomang. 56 Émpigeːla lungor-lunékídíːdok adla léːnamdém ilet-gílednam légaːpé séː appíːsé ikang."
Odo luyírsuné appíːdé bím atéroːpé mépagla dukpagamkang.
Jisum Kébaːbaːnam
(Mark 14ː53-65; Luk 22ː54-55; 63-71; Jon 18ː13-14; 19-24)
57 Séːkobulu Jisum sogaptoji bulu bím abíngaryan mirí, Kaipaskodoːpé gíboto, okolo luro luyírnékídíːdéːla midumkídíːdé gíkumsuto. 58 Émpigeːla Pitorbí moːténgoːpé, édé abíngaryan mirídok lottadoːpé gímíndo. Odokké okko kapiyéji édém kaːpé émna bí gíaːla kanggabnékídíːdok lédílo tedmínto. 59 Abín miríkídíːdéːla Kiːnikébaːdok appíngé Jisumé mokepé émna bík kekonpé aroman lubikunném bulu mago:to. 60 Émpigeːla bulu aːkosin paːtomang, bojék taniyé gíaːla bík kekonpé aroman lukaném lubito. Léddarpé taniːannyiko gísaːdo 61 odokké luto, "Séː amisé luka, 'Ngo Ruːnék kumli:dém momíglaːdag odokké édém loumno mopínyeku.'"
62 Odo abíngaryan mirídé dagrobgeːla Jisumé luto, "No okkomsin lulatsukumaːnei? Séː kapin lukanbinamén séː taniːkídíːsé nok kekonpé luduːda?" 63 Émpigeːla Jisubí asoːpé dungkang. Abíngaryan mirídé bím luto, "Ngo turné Ruːnék aminno nom ludungː No Ruːnék Ao Messiabíːmílo, édém ngolum lutei."
64 Jisubí bím lulatsuto, "Édémpé no ludung. Émpigeːla ngo nolum appíngém lubidungː suːkkolokké Taniːké Aoːbí Kínggí-Taríːnék lagbígdo teddopéla tayéːtok mukkaːlo bím gídokupé nolu kaːbegyé."
65 Odo abíngaryan mirídé bík galugém bupetsugeːla luto, "Bí Ruːnémé lukaːdungǃ Ngolu kapila lubikunném akoda lagiseddang? Kaːtok, suːpag nolu Ruːném lukaːnamdém tatpaːsutag. 66 Nolu okko émna méːdang?"
Bulu lulatsuto, "Bí lumurtag, bí sipéruːnammé."
67 Odo bulu bík migmodo takírém sukkatto odokké kíkto. Akke bím pigeːla 68 luto, "Lungorko ngolum lukítei, Messianga, séːko nom piton?"
Pitorbí Jisum Lupagnam
(Mark 14ː66-72; Luk 22ː56-62; Jon 18ː15-18; 25-27)
69 Odo Pitorbí ruːyi:ké lotta:do tedla dungngai, odokké pagnéko bíkkodoːpé gído. Odokké bí luto, "No:sin Galiliːdok Jisuk lédílo dungngai."
70 Émpigeːla buluk appíngké kanggapé bí édém lupaksuto. Bí luto, "Ngo kinmang no okkom ludun." 71 Odokké bí séːturdoːpé gílenkang, okolo bím akon koːnéngko kanggeːla odok duːné taniːkídíːdém lubito, "Séː tani:séː Najareddok Jisuk lédílo dungngai."
72 Lékoda bí édém pesudanna lupaksutoː "Ngo édé taniːdém kinmangǃ"
73 Odok asudouko léddoupé, odok dagla duːnékídíːdé Pitorkodoːpé gísaːla luto, "Aroruːpé no bulukkolok aːko, kapéné nok íːnamdé nom lubisudag."
74 Odo bí aíké tayéːlo pelíksugeːla bulum pesubito, "Ngo édé taniːdém kinmangǃ"