Jisum Pilatkodoːpé Gíbonam
(Mark 15ː1; Luk 23ː1-2; Jon 18ː28-32)
27
Roːrokomdo, abín mirí appíːdéːla midumkídíːdé Jisum mokeruːpaːyé émna ruːsékto. 2 Bulu bím ríngabgeːla gílenbodo, odokké Ruman amoːruːtum, Pilatké alaglo tolíkto.Judaːké Sinam
(Ager 1ː18-19)
3 Édílo bím yadla-kopagné, Judaːbí Jisum sidopé lupagnamdém kaːton, bí méːlatsulangkula yíngum murkong anírdém abín miríkídíːdémna midumkídíːdém bilattoku. 4 Odokké bí luto, "Ngo paːbém ito, kapéné imur-kaman taniːkoném ngo yadla-kopakto."
Bulu lulatsuto, "Édé ngolukképé okkon? Édé nok agerépag."
5 Édémpila Judaːbí murkoːdém kumli:do gélíggeːla gíkangku. Odokké bí gíla aíém okkesuto.
6 Abín miríkídíːdé murkoːdém laːsanggeːla luto, "Sém murko-kumsudo lénganamdé luroːdok kekonpé inam ageré, kapéné séː íːilok murkongé."a 7 Édémpila bulu kiːlíngmonédok amoːdém régeːla bidekikídíːdok golu:pé mopé émna ru:sékto. 8 Édémpila siloké longésoːpé édém Íːilok Arígé émdag.
9 Odo okodém lungor-luné Jirimiaki lutaga:ji édém ilet-gílettoː "Israel taniːkídíːdok bík légaːpé bipé émna ruːségnam murkoːdém, bulu yíngumko murkong anírém laːto,b 10 odokké kapé Ruːtumbí ngom lulíktagji, bulu édém kiːlíngmonédok arígdém rénato."
Piladbí Jisum Taunam
(Mark 15ː2-5; Luk 23ː3-5; Jon 18ː33-38)
11 Jisumé Ruman amoːruːtumdok kanggaːdo dagmoto, odo amoːruːtumdé bím tauto, "No Jiudikídíːdok migomdéi?"
Jisubí lulatsutoku, "Édémpé no ludung." 12 Édílo abín miríkídíːdéːla midumkídíːdé bím lujémton, bí okkomsin lulatsutomang.
13 Odo Piladbí bím tauto, "No tadbegmaːnei nok kekonpé bulu okkom lujémdun?"
14 Émpigeːla Jisubí okkomsin lulatsutomang, lujémnamdok aːkomsin lulatsutomang, édém kaːla amoːruːtumdé méngaksukang.
Jisum Mokedoːpé Lulígnam
( Mark 15ː6-15; Luk 23ː13-15; Jon 18ː39-19ː16)
15 Gíboːla donam gíːdí doːddom Ruman amoːruːtumnok ilotko dungngai, taniːkéréːdok balennamdém makanaːlokké mélenbidoku. 16 Odo ayírdo Barabbas, émnam airuːpé magraminé taniːko makanaːdo dungngai. 17 Édémpila édílo taniːkídíːdé gíkumsutoji, Piladbí bulum tauto, "Séːkom ngo nolukkoloːpé mélennígbidokupé nolu méːdangː Barabbasméyé, Jisuméyé séːkom Kiristo émdon?" 18 Bulu Jisumé néla bík alagdo tolíktag émnamdém bí kinto.
19 Édílo Piladbí kébaːbangko kungkedo tedla dungngan, bík yamnédé bíkkodo:pé séː lutatsém lulíktagː "Édé imur-kaman taniːdok lédílo nokké okkomsin ipénam kamang, bík légangé ngo méyum aimaːrun maːnyingko maːto."
20 Émpigeːla abín miríkídíːdéːla midumkídíːdé taniːkídíːdém Barabbasmé kodokupé odokké Jisumé mokedopé lutílutíla duːto. 21 Amoːruːtumdé tauto, "Annyisok séːkom nolukkoloːpé ngom mélennígbidokupé nolu mé:dang?"
Bulu lulatsuto, "Barabbasmé."
22 Piladbí tauto, "Émpém ngo Jisuk lédílo okkom iyén, séːkom Kiristo émdon?"
Bulu appíːdé lulatsuto, "Bím kurusdo pítketokǃ"
23 Piladbí tauto, "Kapila, bí oko imurém itang?"
Émpigeːla bulu appíːdé bottéruːpé jéːto, "Bím kurusdo pítketokǃ"
24 Édílo Piladbí kaːton lutíladunggom agerkamaːyébo odokké kapiné urmuré lenyé émna kinton, bí asi batiko langgeːla buluk kanggaːlo bík alagém supusuto. Odokké bí luto, "Séː taniːsok íːi bidanamdo ngo katémang, édé noluk tayéːloːpag kayéǃ"
25 Taniː appíːdé lulatsuto,"Bík iːdé ngoluk tayé:loːla noluk ommang tayéːlo dungkaːlangkaǃ"
26 Odo bí bulukkoloːpé Barabbasmé mélennígbitoku. Odokké bí Jisumé díːmoge:la kurusdo pítkedopé buluk alaglo tolíkto.
Jisum Maglíngkídíːdé Yirkaːnam
(Mark 15ː16-20; Jon 19ː2-3)
27 Odo amoːruːtumdok maglíngkídíːdé Jisum rajbobondoːpé gíbokang odokké maglíng ope appíːdé gíkumsugeːla bím dagyetto. 28 Bulu bík génamdém bupakto odokké ba:yomné migom génamém bím molíkto, 29 odokké bulu tanglok dumlupko pogeːla édém bík tukkudo kublíkto. Bulu bík lagbík alagdo tukunko laglíggeːla bík kanggaːdo lébíːtumto odokké bím lukaːto. Odokké bulu luto, "Jiudilok migommé, kumtokǃ" 30 Bulu bím takírsukkato, odokké tukuném langgeːla bík tukkudok ranmo ranmola ranto. 31 Bulu bím lukaːnam lédupé, baːyomné génamdém pítpaggeːla bík aíké galugdém molíktoku. Odokké bulu bím kurusdo pítkekolo gíbokang.
Jisum Kurusdo Pítkenam
(Mark 15ː21-32; Luk 23ː26-43; Jon 19ː17-27)
32 Buluk gíladuːdodo bulu Simon émnam Sirenidok taniːko ríksuto, odokké bím bolbodapé bulu kurusdém joːmoto. 33 Bulu Golgota émkodoːpé gípíːto (okodok légíːdé kulong dungko). 34 Odo bulu Jisumé konéki molusunam apongém tíːdopé bito, émpigeːla tíngkaːnam lédupé, bí édém tínggémang émna ípaksuto.
35 Bulu bím kurusdo pítketo odokké bulu buluk araːdo bík galugdém amin kuːla orpansuto.c 36 Odok lédupé bulu odo tedla bím kanggabla duːto. 37 Bík tayéːdo bím lujémnamdém bulu adgeːla tamníktoː SÉː JISUBÍ, JIUDIKÍDÍːDOK MIGOMDÉ. 38 Dopson annyikoném bík lédílo kuruslo pítketéːto, aːkom bík lagbíkpé odokké akondém bík lakkepé.
39 Séːkobulu gípattoji bulu buluk tukku íkí-íkíla bím lukaːto,d 40 "Kumli:dém mopenpénéno odokké édém loumno mopínkunéno, aíé mopítsukítokǃ No Ruːnék Aoːdéːmílo, sa: kurusdokké gíikítokukǃ"
41 Édémíːpé abín miríkídíːdé, luro luyírnékídíːdéːla midumkídíːdé bím lukaːto. 42 Bulu luto, "Bí ammem moturdaggai, émpigeːla bí aíém motursulaːmangǃ Bí Israelsok migomdémaːnei? Sa suːpag bím kurusdokké gíimotoku, odo ngolu bím méngkésupéǃ 43 Bí Ruːnémé méːtinsudag, Ruːnébí bím aipé-méːmílo, sa suːpag bí bím mopítkítok, kapéné bí lusudaggai, "Ngo Ruːnék Aoːdéǃ'"
44 Édémíːpé bík lédílo kuruslo pítkenam dopsongkídíːdé bím lukaːmínto.
Jisuk Sinam
(Mark 15ː33-41; Luk 23ː44-49; Jon 19ː28-30)
45 Longé loːtungdokké yummayír aumné a:dídoːpé mo:písok appíːlo kémokang. 46 Yummayír aum kíramdo Jisubí bottépé kabla luto, "Eloi, Eloi, lama sabaktani?" -okodok légí:dé, "Ngok Ruːné, ngok Ruːné, kapila no ngom mépakton?"e
47 Édílo odok dagla duːné ékké édém tattoji, bulu luto, "Bí Elijaːmé gogdung." 48 Bulukkolok aːko bagémpé duggeːla síːpakko laːto. Bí édém bakserené apoːlo jíːlíkto, odokké édém maːrikolo níggabgeːla Jisubí tíːdopé níksaːlígbito.f
49 Akedé luto, "Suːpag bím atéroːpé mépaktok. Odokké kaːpolai Elijaːbí bím moturkolo gíyen gímanǃ"
50 Jisubí lékoda bottépé kapto odokké bí ngatérsukang.
51 Odo ayírraːdo kumli:dok sorkomnam gayindé tuːyitokké kéígboːpé tagnyikopé serkekang. Mo:písé rébukang odokké torné-ílíngkídíːdé oporkang. 52 Agokídíːdé betkekang odokké bojéko angunné taniyé séːkobulu sikangabon bulum turkunamno dagrobmotoku. 53 Bulu agodokké gílenkang, odokké Jisuk lékod-turkunam lédupé bulu angunné nogordoːpé gíkang, odokké bojéko taniːyém léngkansuto.
54 Édílo língko opisardéːla bík lédílo séːkobulu Jisum kanggabla dungngan taromoton tonnamdémna okko kapikan édé appíːdém kaːton, bulu pésola jéːto, "Aroruːpé bí Ruːnék Aoːdéǃ"
55 Odo bojéko mimmé moːtélokké kaːla dungngai. Bulu Galilidokké Jisuk laginammém bipé émna gímíndung. 56 Buluk araːdo Meri Magdolonibí, Jemskéla Joseské ané Meribí, odokké Jibediké yamnédé dungngai.
Jisum Yusínam
( Mark 15ː42-47; Luk 23ː50-56; Jon 19ː38-42)
57 Yummayírdé aːdodo, Arimatiadok duːné mirémné taniːko odoːpé gípíːdo, bík aminém Jusep émtagai, odokké bíːsin Jisukkol luyírsunékai. 58 Bí Pilatkodoːpé gígeːla Jisuk simaːdém kotoku, odokké édém bím bidopé Piladbí lulíkto. 59 Jusebbí simaːdém laːtoku, odokké édém asong-onno gayinki yetto, 60 odokké édém bík aíké anu agodo léːto okodém bí torné ílíːlo pakurra léːtagai. Bí pítaruːné ílíngko agodok gíangkodo pérkapto odokké gíkangku. 61 Meri Magodolonibíːla akon Meribí agodok kekondo tedla dungngai.
Agodém Kanggabnékídíng
62 Longkondo, okodé Yoddí longngan, abín miríkídíːdéːla Parosikídíːdé Piladmé ríksuto 63 odokké luto, "Ruːtuma, ngolu méːpaːdung édílo bí turra dungngaji édé yadgoːnédé ludagai, 'Loum lédupé ngo lékoda turyéku.' 64 Édémpila loum longé masissém agodém kanggabla duːdopé lulíktok. Émmaːmílo, bíkkol luyírsunékídíːdé gíla bík simaːdém dopsolaːdo odokké bí sikolokké turkangku émna taniːyém lugoːbilaːdo. Léddarké yadnamsé poːpékédémyaːsin aiyyamaːyé."
65 Piladbí lulatsuto, "Kanggabnéko gíbokang, odokké gíla noluk kinkamdémpé agodém kanggabmota."
66 Édémpila bulu gíla agodém atílaːmaːdopé ílíng tayéːdo muorki tubjedgeːla kanggabném léːlíkto.