Lékod-Turkunamdé
(Mark 16ː1-10; Luk 24ː1-12; Jon 20ː1-10)
28
Yoddo longédok longkondo, loːníddok anggotpoːné longédok roːrokomdo, Meri Magdolonibíːla akon Meribí agodém kangkolo gíkang. 2 Odo bagémpé bottén taromotonko tonkang, Ruːtumké tayéng-yaːmeko tayéːtokké togyíːdo, bí ílíːdém pérpaggeːla odok tayéːdo tetkang. 3 Bím yariːkísapé kaːdagai, odokké bík génamkídíːdé kampotitidaggai. 4 Kanggabnékídíːdé airuːpé pésola bulu jinna siné taniːyémpé ingapkang.5 Tayéng-yaːmedé mimékídíːdém luto, "Pésoyok, ngo kindag nolu Jisumé madung, séːkom kurusdo pítkekan. 6 Bí soː kamang; bí kapé lukaji édémíːpé bím turmotoku. Okolo bím léngkaji gíla kaːta . 7 Suːpag lomna gíla bíkkol luyírsunékídíːdém lubitakuː 'Bím sikolokké turmotoku odokké nolum gípoyaːla bí Galiliːpé gídag. Nolu bím olo ka:begyé.' Méːpangkítok, nolum ngo okkom lubikan."
8 Édémpila mimékídíːdé agodokké lomdanna gíkangku, bulu pésokang émgom méːpolo pí:síngkang, odokké bíkkol luyírsunékídíːdém lubikol dukkangku.
9 Jisubí bulum bagémpé ríksugeːla luto, "Asin-ansíngé nolukkolo dungkaːlangka." Bulu bíkkodoːpé gígeːla bík alédok sogabla bím kumto. 10 Odo Jisubí bulum luto, "Nolu pésoyok odokké gíla ngok bírrangkídíːdém Galiliːpé gídopé lubita; bulu olo ngom kaːríksuyépé."
Kanggabnékídíːdok Lubikunam
11 Édílo mimékídíːdé buluk aíké lambédo gítokun, kanggabné ékké nogordoːpé gíla okko kapikaːji édé appíːdém abín miríkídíːdém lubitoku. 12 Abín miríkídíːdé midumkídíːdém ríksugeːla bulu lambéko mé:lento, bulu bojégamkopé murkongém maglíngkídíːdém bigeːla 13 bulum luto, "Nolu sémpé lupaːyé, 'Édílo ngolu yubngaksula dungngan yumédo bíkkol luyírsunékídíːdé gíla bím dopsobomkangku.' 14 Séː lubinamsém amoːruːtumdé tadmílo, nolu imurnémang émna ngolu bím kinmoruːyé odokké nolukké méːdírpénamé kamang."
15 Maglíngkídíːdé murkoːdém laːto odokké buluk luyírnamdémpé bulu ito. Odokké édé doːyiːdém Jiudikídíːdok araːdo siloké longésoːpé lugola dung.
Jisubí Bíkkol Luyírsunékídíːdém Léngkansuto
(Mark 16ː14-18; Luk 24ː36-49; Jon 20ː19-23; Ager 1ː6-8)
16 Odo yí:langko luyírsunékídíːdé Galiliːdok adidoːpé gíkang, okoloːpé Jisubí bulum gídoːpé lulíktag. 17 Édílo bulu bím kaːton, bulu bím kumto; émpigeːla akedé bím méːmoto. 18 Jisubí buluk kéraːpé gíningeːla luto, "Tayéng-amoːtogla moːpísok takam ilang-gílanamém ngom bitag. 19 Odok-légaːpé gíkang odokké takam réngamém luyírsunépé imota, Abu, Ao, odokké Angunné Yaloké aminno bulum baptisém bilang, 20 odokké ngok nolum lulígnam appíːdém tadla-ibomdopé bulum luyírrang. Odokké aroruːpé ngo noluk lédílo loːdísém du:mínyé, aːdíːsok gíngabnam ayírdoːpé."