1 Petrus i

Surano

Petrus

da meri'ou

Pobetekino Gau

Die sura niburino i Petrus, simbaudo ana guruno Yesus da hopulu orua, nta lako hai miano mparasaea da mpoo'ia hai lima propinsi hai wonua Asia (diekana wonua Turki). Poneeno i Petrus « ko'ira miano ntinindahakono Apu Alla » (1:1).

Patuduno kai poburi yahoo nta mompokomorodo pelaroando miano da pinakasea tendenomo parasaeaho Apu Yesus. Dahira da pinontumbu'ako, inanu ngkabaria, ronga pinoko'anu-anu (2:12, 3:16, 4:4). Dahira ata da pinokomarasaindo apundo (2:18-20). I Petrus pokompehawa'ira da mpobasa surano dadaano Lele Mohende mekona Yesus Kristus kando perahi-rahio. Kana'umpe Yesus Kristus mateemo, sawali toraamo mbule, ronga ario medandi nta leu mbule. I Petrus mo'awaakondo dadaano Kristus da ari marasai hai wita'ea (2:21-24). Ronga oliwihira kando mohende kindo marasai tendenomo hindo mpongkarasitee, kana'umpe hindona itai marasai meronga Kristus (4:13). Kanahino Petrus, patuduno kando marasai, kai mentee anggano parasaeando, kando nireree ki leu pendua Apu Yesus (1:7).

Oliwihira kando mpoweweu ngkaida'a da moico, ronga soroo wotolundo hai Apu Alla (4:19). Oliwihira kando tora mekalolaro ronga turu hai miano da kuasa. Ronga oliwihira miano da kosampora kando mpekahara-haragai (3:1-7).

Ihino sura

1. Salamu (1:1-2).

2. Salama'a da pinasadiano Apu Alla (1:3-12).

3. Tora mekalolaro kana miano da hinudano Kristus (1:13 – 2:10).

4. Oliwi kato turu hai miano da wawaicita (2:11 – 3:7).

5. Oliwi kito marasai tendenomo moweweu moico (3:8 – 4:19).

6. Oliwi hai kamotu'ano jema'a ronga miano mparasaea suere (5:1-11).

7. Salamu kompura-puraano (5:12-14).