Surano
Petrus
da meri'ou
Salamu
1
1 Die surangku i Petrus, rasulu ntinenano Yesus Kristus, nta lako hai miano ntinindahakono Apu Alla da mentekamburako hai wonua Pontus, Galatia, Kapadokia, Asia, ronga hai Bitinia kana miano sumoo. 2 Comiumo miano da nirurukino Apu Alla Tamanto tewali umatino, nunu'o patuduno. Da tindahakokomiu yahoo Sangkoleono Apu, kami nunu'o po'eheno Yesus Kristus, ronga inuwohiako reano.Kahioomo Apu Alla kai e'elengua peehawakomiu ronga mapuhiakomiu'o barakati.
Pomperahi-rahia da morodo
3 Kahioomo kato poko'owose'o Apu Alla Tamano Apunto Yesus Kristus tendenomo pololarono da owose, kai pokompewanguo mbule koie i Yesus Kristus mebinta hai matea, kato po'awa toraa da tonia, ronga pomperahi-rahia da sai mo'otu, 4 nta montarima tilari da ari pinasadia hai suruga, da sai to'ori nta lono, nahina tekebaakoano, ronga nahina moleuno. 5 Luwuo koie barakati nta taromiu, tendenomo himina parasaeaho Apu Alla, da daga'akomiu'o kuasano, dungku kami awaa salama'a hi daa nta pokomentoda'akomiu'o ki dungkumo oleo kiama'a.
6 Nangkuamo koie, moicoomo kami mohende, mau kimi daapo mo'awa karasai diekana tendenomo posoba da me'alu da awakomiu. 7 Koie karasai dahoo nta awakomiu kai mentee kimi daasi to'u-to'u parasaea. Parasaeamiu koie kolalo montoe anggano ka'iaa wulaa. Kana'umpe wulaa dahoo nta hancuru, sawali ki nilono'ako api, dahomo nta mentee kicuasi wulaa to'u. Nangkuamo koie, paraluu'o na'amiu kami ni'udi, kami nireree, inangga, ronga sai hina tekebaakoamiu, ki leu mpendua Yesus Kristus. 8 Mau ki sami mpaisapo ontoo, dakomiumo lou'o, deenapo dungku diekana, mau ki sami da'apo ontoo, dakomiumo parasaeaho, ronga memohende tendenomo sanaa da sai tekira-kira. 9 Kana'umpe mi'awaamo da inu'ungkeno parasaeamiu, yahoo salama'ano sangkoleomiu.
10 Dadaano die salama'a yahomo da inu'ungkendo ronga da pinetutukanaakondo raro nabii, da ari tuluraa nta pompeehawano Apu Alla comiu. 11 Yahomo kando u'ungkee, ki kana'umpe ronga impia nta kadadiahano, da patuduno Sangkoleono Kristus da hai bolo mpelaroando. Koie tempo, Sangkoleono mo'awaakondo dadaano karasai danta inawano Kristus ronga hi daa nta pinoko'owose mperumbuino. 12 Kai po'awaakondo Apu Alla ko'ira nabii, hi hapa da nigaudo na'iaa nta tarondo pantado, sawali nta taromiu, yahomo koie Lele Mohende mekona hai Yesus Kristus da pinodea mentodamiu diekana, da nileleakondo miano da tinenano Sangkoleono Alata'ala da mebinta hai suruga. Deenapo ko'ira mala'ekati mokeahira na'anda to'orio ihino koie lele.
Tora mekalolaro
13 Nangkuamo koie, kahioomo kami mpasadia'o pinehawamiu kai molinyaa pekirimiu, ronga momperahi-rahi'ea hai pompeehawano Apu Alla comiu, ki leuho wotu nta leuhano i Yesus Kristus. 14 Mintora nunu'o po'eheno Apu Alla, osie tora nunu'o po'ehe mpantamiu kana iponoha, daamiupo sai to'orio Apu Alla. 15 Deenapo, kahioomo kai molinyaa pelaroamiu hai laro pera da niweweumiu, kana molinyaano pelaroano Apu Alla da boboicomiu. 16 Kana'umpe dahoo teburi hai Boku Haratiano Apu Alla, « Kahioomo kai molinyaa pelaroamiu, kana'umpe namolinyaa pelaroangku. »a
17 Apu Alla dahamiu mpeki'ama himi amala, koiemo Apu Alla da sai meruruki danta otuhio kara-karano tee-tee'asa miano nunu'o da ari niweweundo. Nangkuamo koie, kami momeetako Iaa, himi daapo tora die hai wita'ea. 18 Minto'oriomo himi ntehudamo mebinta hai tora-toramiu da sa'ia-iaa da ari tinarimamiu mebinta hai ira pembue'amiu. Koie pohudano comiu nai da'a nta lono kana pera atawa wulaa. 19 Deenapo koie pohudano comiu kolalo ko'angga, yahoo rea wotoluno Kristus da tewali pesomba, kowati ana domba da sai hina tekebaakoano ronga pinosala'iano. 20 Kai ari Apu Alla rurukio Yesus Kristus, nai paisapo niweweu wita'ea. Sawali tendenomo comiu, yahomo kai pokomentoda'o wotoluno oleo mperumbui. 21 Iaamo penteteano kami mparasaeaho Apu Alla da ari potoraa mbule mebinta hai matea, kai poko'owose'o. Yahomo kaicua Apu Alla da pinarasaeamiu ronga da pinerahi-rahimiu.
22 Hina molinyaamo pelaroamiu tendenomo himi nunu'o pompotisu da menona, dungku kai santo'u-to'umiu lolarohira petila mpe'asa imanimiu, kahioomo kami laronto'umiu mpekalola-lolaro. 23 Toniahomo toraamiu, kana'umpe na'iaa mebinta hai manusia danta mate, sawali mebinta hai Apu Alla da sai da'a nta mate, mentete hai haratiano da sai hina puraano, pu'uno toraaha. 24 Kana'umpe dahoo teburi,
« Luwu to manusia kana daano ewo,
ronga luwu anggano kanasi anggano bunga ewo.
Moleuhomo ewo, ronga tetenteemo bungano,
25 sawali haratiano Apu nai teboli'i samengka-mengkauno. »b
Koie haratia yahoo Lele Mohende da dungkukomiumo.