Yesus Kristus watu mpompu'ui
2
1 Nangkuamo koie, osie moweweu hapa da mosa'o, osie me'akala mosa'o, osie mompe'anu-anuto'u, osie singgira, osie mososa'o miano. 2 Kahioomo kami ngkana ana'ate da tinapuno tehina, sadia mokokondo'uako susu da sai hina pohela'ino, yahoo haratiano Apu Alla. Kanamo koie, kami daa nta tora ronga mo'awa salama, 3 kana'umpe dahoo teburi hai Boku Haratiano Apu Alla, « Minto'oriomo hi taperano kolaro koie Apu. »a4 Nangkuamo koie, kami okudahio koie watu ntora, watu da sai ineheno to manusia, sawali da teruruki ronga da te'angga hai ra'ino Apu Alla. 5 Comiu na'amiu kahioomo kami ngkana ko'ira watu ntora, da pinake tewali raha mpesombaa da niwanguno Sangkoleono Apu. Kanamo koie, kami ntewali raro mpua'ima ntinindahakono Apu Alla da montompa pesomba kana pompotisuno Sangkoleono Apu. Ko'ira pesomba te'ehe hai Apu Alla tendenomo Yesus Kristus. 6 Kana'umpe dahoo teburi hai Boku Haratiano Apu Alla kanahi,
« Ariaku moruruki watu mpompu'ui da te'angga kaku podio hai Sion,b
ronga inai da parasaeaho nai da'a nta mesosoori. »c
7 Koie watu ntaperano te'angga hai comiu da memparasaea, sawali ko'ira da sai parasaea, tekonaanomo ayatino hai Boku Haratia da kanahi,
« Watu da sai inehendo tuka mpohedo,
da tewalimo watu mpompu'ui. »d
8 Dahoo na'ana teburi,
« Koiemo watu tesubeando miano,
ronga koiesi watu tuunaando miano. »e
Kando mentesube, nasando nunu'o haratiano Apu Alla, kana'umpe kanamo koie hi ari mompatantuakondo.
9 Sawali comiu yahoo suku da teruruki, pua'imano mokole, umati da tinindahako nta tarono Apu Alla, da boboicomiu meluarako mebinta hai rondomaa, mewiso hai molinyaahano da tinekangkaako, patuduno kami leleako dadaano pohedoano da owose.
10 Ponoha comiu na'iaa umatino Apu Alla,
sawali diekana tewalicomiumo umatino.
Iponoha nami awaa pololarono Apu Alla,
sawali diekana comiumo da awaa.f
Tora kana atano Apu Alla
11 Petilaku da telou, icomiu kanamo miano sumoo ronga miano leu. Nangkuamo koie, ku'oliwicomiu kami osie nunu'o pinokeahakono wotolumiu da kodosa, da sai ehe tepokonano pelaroamiu. 12 Kahioomo kai moico bangumiu hai tongano miano da sai da'apo to'orio Apu Alla. Ki daa miano da montumbu'akokomiu himi mosa'o, dahiramo nta ontoo hi moico niweweumiu, ronga nta poko'owose'o Apu Alla ki leu mperumbui.
13 Po'eheno Apu, kahioomo kami nunu'o po'ehendo pera miano da kuasa: mokole da monto-montoe, 14 maupo ko'ira gubernur da tinenano mokole nta hukumaa miano da tesala ronga haragai'o da moico niweweuno. 15 Apu Alla mokeaho kai moico bangumiu, kami nto'ori tutuwio ngangando miano mpore da sai hina da tino'orindo. 16 Kahioomo kami ntora kana miano da sai tepo'ata, sawali mi'osie lalesa moweweu da mosa'o, deenapo toramo kana atano Apu Alla. 17 Mi'angga'ira pera miano, milolarohira petila sa'imanimiu, mimomee hai Apu Alla, ronga mi'angga'o mokole.
Karasaino Kristus tewali pompotisu
18 Comiu ata, kahioomo kami nturu ronga momee to'u hai ponggawamiu, osie te'iaasi hai ponggawa da mengkolaro ronga moluu, sawali ronga da salabangu. 19 Himina nto'orio da po'eheno Apu Alla, kahioomo kami ntineiho, ki konakomiu karasai da sai pantasi. Kana'umpe kai daa nta barakaticomiu Apu Alla. 20 Hapa gunano kimi tineiho karasai ngkalangku tendenomo himi mpoweweu da tesala? Sawali kimi tineiho karasai tendenomo moweweu da menona, Apu Alla nta barakaticomiu. 21 Kai boboicomiu Apu Alla, kami mpoweweu kana koie. Kana'umpe Kristus ariomo marasaihakokomiu, kai poweekomiu pe'ontoa, kami nunu'o pinindano. 22 « Nahina dosano, ronga nahina te'asa miano da paisa modeaho ki daa ari mekulepi. »g 23 Tempono tinota'isala, nai powolohi; tempono pakaseaho miano, nai da'a metaapo, te'iaasi soroo kara-karano hai Apu Alla, po'otuhi da adili. 24 Wotolu mpantano koie Kristus da tineihomo dosanto hai keu mpinotalambe, kato tepulosi, ronga tora moweweu da tekona. Tendenomo rea belano kami ntido. 25 Iponoha dadaamiu kana domba molengu, sawali diekana pohulekomiumo mbule hai tumpu mpakani da dagaicomiu.