Torano miano ngkosampora
3
1 Comiu na'amiu tina da kosamporamo, minunu'o po'eheno samporamiu. Kana'umpe ki daa da sai parasaeaho haratiano Apu Alla, dahiramo nta parasaea tendenomo bangumiu. Ronga nai da'amo paraluu kami mpo'awaakondo, 2 hindona ontoomo toramiu da sai tekebaako ronga momee hai Apu Alla. 3 Osie parewano wotoluu te'iaasi da inonto hai luara, kanano wuu da pinii, bunga-bunga wulaa, ronga pakea da mohali. 4 Sawali da kolalo te'angga yahoo, parewa da mebinta hai pelaroa, kami mpebunga-bungaako pelaroa moluu ronga montundu. Koiemo parewa da sai nta lono ronga da taperano te'angga hai ra'ino Apu Alla. 5 Kanamo koie iponoha parewando tina mparasaea da momperahi-rahi hai Apu Alla, ronga nunu'o po'eheno samporando. 6 Kanamo na'ana koie i Sarah meki'apua hai Ibrahim, ronga nunu'o po'eheno. Comiu na'amiu tewalio nineehako anano i Sarah, kimi mpoweweusi da tekona, ronga ki sahinamo da pinomeetakomiu.7 Kanapo na'amiu tama da kosamotu'amo, kahioomo kami nto'orio dadaano samotu'amiu hai larono toraahamiu meronga-ronga, kami mpaha'o hicua wotolu modengke ko'ira tina. Miharagai'o samotu'amiu, kana'umpe dakomiu nta meronga mo'awa tilari toraaha mebinta hai Apu Alla. Kicanamo koie, nahinamo danta halangio amalamiu.
Pololaro ronga tepokonaa
8 Kompura-puraano: kahioomo luwumiu kami mpe'asa mpekiri ronga me'asa mpinehawa. Mpekalola-lolaro kana miano mpetitila. Mimpekapee-peehawa, ronga owawa mpelaroa. 9 Osie da mosa'o wolohiakono'o da mosa'o, atawa pontota'isala wolohiakono'o pontota'isala; sawali pe'e'eta kai barakati'ira Apu Alla. Kana'umpe kai boboicomiu Apu Alla, kami mpo'awa barakatino. 10 Kana'umpe hai Boku Haratia dahoo teburi kana die,
« Miano da mokeahako toraaha,
ronga oleo da moico,
kahioo kai dagai'o elono kai osie mogau da mosa'o,
ronga wiwino kai osie mogau kule.
11 Kahioomo kai mentalahio da mosa'o, ronga moweweu da moico;
kahioomo kai pekora u'ungkee tepokonaa dungku kai awaa.
12 Kana'umpe tuduano matano Apu yahoo hai miano da mpoweweu da tekona,
ronga birino modedeaho amalando.
Sawali Apu nasai peduluhira miano da mpoweweu mosa'o. »a
13 Inai ona danta weweu mosa'okomiu, kimi mokua moweweu da moico? 14 Sawali mau kimi marasai tendenomo moweweu da moico, dakomiu nta konantuara. Mi'osie momeetako hapa da pinomeetakondo suere miano, ronga osie tewere. 15 Nangkuamo hai pelaroamiu, kahioomo kami mpa'angga ntesincaa Kristus hicua Apu. Kahioomo kami sadia lawanio ki daa miano da metukanaako ihi mpinerahi-rahimiu, sawali kai moluu laromiu, ronga miharagai'o koie da metukana. 16 Kahioomo kai molino pelaroamiu kami osie tekebaako. Kicanamo koie, mau kindo anu ngkabariakomiu tendenomo hi moico niweweumiu nunu'o Kristus, dahiramo nta mekoko'anui mpanta. 17 Kolaloo moico kito marasai tendenomo moweweu da moico, kicuamo koie da po'eheno Apu Alla, ka'iaa marasai tendenomo moweweu ngkabaria.
18 Kana'umpe wotoluno Kristus ariomo mate asamponoha tanggoiho pera dosanto. Nahina dosano, sawali Iaamo da mate tendenomo pera miano ngkodosa. Kai weweuho kana koie, nta wawakita mbule hai Apu Alla. Wotoluno ariomo pinopate, sawali Sangkoleono Apu namokompewanguo. 19 Kai kuasaiho Sangkoleono Apu Alla, kai lako leleako haratiano Apu Alla hai ira sangkoleono miano da mentetorungku. 20 Ko'ira sangkoleondo miano da sai ehe nunu'o po'eheno Apu Alla tempono nabii Nuh. Koie wotu, Apu Alla sabara metotarima kando mentoba, hi daa konainoo i Nuh moweweu bangka'ea. Sawali nante'ete miano da me'ulea hai bangka, te'iaasi hoalu miano, da pinokosalamanomo Apu Alla tempono koie e'e waa'ea. 21 Koie e'e waa yahoo gambarano pebaho da mokosalamakomiu diekana, na'iaa nta mokomowuaho rakino wotolu, sawali yahoo mo'ita hai Apu Alla kai poweekomiu pelaroa da molinyaa, kai to'orio maina da tesala ronga da tekona. Koie pebaho mokosalamakomiu mentete pewanguano mbule i Yesus Kristus mebinta hai matea. 22 Kai moleka sabe hai suruga totoro hai muanano Apu Alla. Iaamo da parentahira luwuo mala'ekati, luwuo da kuasa, ronga da mokora.