Tora nunu'o po'eheno Apu Alla
4
1 Hina arimo koie wotoluno Kristus marasai, kahioomo na'amiu kami mpasadia'o pelaroamiu nta marasai, kana'umpe miano da arimo marasai wotoluno, ari-arimo moweweu dosa. 2 Nangkuamo koie, kahioomo kami nunu'o po'eheno Apu Alla himi daapo tora die hai wita'ea, osie nunu'o po'eheno manusia. 3 Oleo da ari tealo koa'omo mengkauno mi'ari moweweu kana da po'ehendo miano da sai to'orio Apu Alla. Aricomiu nunu'o napsuumiu ronga pinokeahako da mosa'o, melodoko, mondo'u kami memolangu, lia mohende'a, ronga mosomba ka'apu-apu da upali. 4 Diekana kando mentekangka ko'ira miano da sai to'orio Apu Alla, nasami ehe meduluhira moweweu da mosa'o ronga da sa'ia-iaa da sai ehe te'o'ari, nangkuamo kando poko'anu-anukomiu. 5 Sawali perumbuino dahira nta dudunduo koie niweweundo hai Apu Alla, da sadiamo nta adili'o miano ntora ronga miano mate. 6 Koiemo sababuno kai nileleako haratiano Apu Alla hai ira miano da matemo, da ari ni'adili kai mate wotolundo, kana luwu miano nta mate. Patuduno, kai tora sangkoleondo nunu'o po'eheno Apu Alla.Torano miano Ngkarasitee
7 Puraano luwuo da da'a hai wita'ea okudaamo. Nangkuamo koie, kami ngkuasanio wotolumiu, ronga mepekiri molinyaa kami nto'ori amala. 8 Da kontu'uma, misadia mpekalola-lolaro santo'u-to'u, kana'umpe miano da mololaro e'elengua nta ampunio dosano simbauno. 9 Kahioomo kai te'ungkahi wambamiu mompetoka ronga osie mengungu. 10 Ariomo Apu Alla moweekomiu kuasa ronga sipa da sai mengkena. Nangkuamo koie, kahioomo kami mpake'o koie kuasa ronga sipa kai moico hai larono pekatulu-tulumiamiu. 11 Ki daa miano da mogau, kahioomo kai kana da moleleako haratiano Apu Alla. Ki daa miano da montulumi, kahioomo kai pontulumiako kora hi ari moweeho Apu Alla. Kicanamo koie, luwuo da niweweundo nta tereree'anomo Apu Alla mentete hai Yesus Kristus. Apu Alla da pina'owose ronga da makuasa samengka-mengkauno. Amin.
Marasai kana miano Ngkarasitee
12 Raro mpetilaku da telou, osie tekangkaako pera karasai da awakomiu himi daa ni'udi, kana me'asa kadadia da sai paisapo awakomiu. 13 Deenapo kahioomo kami memohende himina itaimo marasai meronga Kristus. Yahopo kami daa nta lalo'ea mohende, ki leu mpendua kai mentoda hi owose tereree'ano. 14 Konantuarakomiu ki poko'anu-anukomiu miano, himi daa nunu'o Kristus. Koie batuano, Sangkoleono Apu Alla da tereree dahoo merongakomiu. 15 Osie da'a mau te'asa miano hai comiu da marasai tendenomo hi pompepate, hi pononako, hi poweweu da mosa'o, atawa hi pompewiso'i urusano suere miano. 16 Sawali kimi marasai tendenomo himi mpongkarasitee, osie mokoko'anu. Deenapo poko'owose'o Apu Alla tendenomo neeno Kristus.
17 Kana'umpe diekana temponomo nta inotuhiano kara-karano pera miano, ronga danta meri'ou ni'adili yahoo icita ihi rahano Apu Alla. Kito peri'ou ni'adili, kana'umpemo nta dadaando ko'ira miano da sai nunu'o Lele Mohende da mebinta hai Apu Alla? 18 Dahoo teburi hai Boku Haratiano Apu Alla kana die,
« Ki mohali nta pinokosalama'ano miano ntekona,
kana'umpemo nta daano miano ngkodosa ronga da bubungkuiho Apu Alla! »a
19 Nangkuamo koie, kimi marasai tendenomo po'eheno Apu Alla, kahioomo kami mpoweweu ngkaida'a da moico, ronga soroo wotolumiu hai Apu Alla da ari padadicomiu, da konianto'u hi pedandi.