Piaraa lunu mpinakanino Apu Alla
5
1 Diekana ku'oliwicomiu, raro ngkamotu'ano jema'a. I'aku na'angku kanasi comiu kamotu'ano jema'a, da ari ontoakono'o matangku luwu karasaino Kristus, ronga danta itai mo'awa tilari laro pina'owose'ano Kristus danta mentoda oleo mperumbui. 2 Kahioomo kami mpiaraakono'o lunu mpinakanino Apu Alla hi ari soroakokomiu'o. Osie tendenomo tepakisaa, sawali kahioo kai molino laromiu, nunu'o da po'eheno Apu Alla. Osie mo'u'ungke laba, sawali kahioomo kai laronto'umiu mohedo. 3 Osie momparenta kana mokole da kuasanio miano da niwawaino, sawali kahioomo kami ntewali pe'ontoano jema'a. 4 Ronga ki leumo koie tumpu mpakani ngkontu'uma, dakomiumo nta pinoweehi tilari mpeponangi da sai nta lono.5 Kanapo comiu na'amiu tora mongura, minturu hai miano motu'a. Ronga luwumiu, kahioo kai patimbali owawa pelaroamiu, kana'umpe dahoo teburi hai Boku Haratia kanahi,
« Apu Alla daluo miano mentaba,
sawali miano da owawa larono nabarakati'o. »a
6 Nangkuamo koie, mimpoko'owawa'o pelaroamiu hai tonto limano Apu Alla da kuasa, kai taarakokomiu ki dungkumo wotuno. 7 Soroakono'o Apu Alla luwu tinewereakono laromiu, kana'umpe Iaamo da padulio toramiu.
8 Kahioomo kami mpedagai ronga sadia! Kana'umpe ponggawano bilisi musumiu kana to'u singa da sisimbu me'aoli mo'u'ungke miano danta inudoono. 9 Minta'oakono'o imani da motende, kana'umpe minto'oriomo hi upu-upuo wita'ea, ko'ira petilamiu arihiramo awaa karasai daakana. 10 Sawali kimi arimo marasai te'asantonia, Apu Alla pu'uno pompeehawa, dahoo nta pupulekomiu, pokomotendekomiu, pokomokorakomiu, ronga pokomorodokomiu. Kana'umpe Iaamo da ari boboicomiu kami mperongaa hai laro mpinoko'owose'ano dungku samengka-mengkauno himi boboto'akono Kristus. 11 Iaamo Apu Alla Apuno kuasa da sai hina upuano. Amin.
Salamu nteposinca
12 Die surangku da ongkunda i Silwanus da ari buriakuo, da inanggaku petila Ngkarasitee da konianto'u. Mokeahaku pokomorosoo pelaroamiu kami mpaha'o, die da niburincu yahoo lele da menona dadaano pompeehawano Apu Alla. Mi'ungkaario kai morodo.
13 Salamundo petilamiu da hai Babel da ari nirurukino Apu Alla,b ronga salamuno anaku i Markus. 14 Mimpekasosampatae pada comiu peto'ono himi mpekalolaro.
Kahioomo kai momapu laromiu himi daa angku'o Kristus.