Pompokompehawa hai miano ngkawasa
5
1 Dadi diekana, comiu miano da kawasa, mimpewowomo ronga mperurumatemo tendenomo karasai danta awakomiu. 2 Kawasamiu morane'omo, pakeamiu kokonde'omo! 3 Wulaa ronga doi peramiu kalama'omo, ronga koiemo kalamano danta tepora'imiu tewali saksii, ronga danta tunuo wotolumiu kana api. Comiumo da e'elengua pumpusako kawasa die hai wita'ea da rora'io kompura-puraano. 4 Santo'u-to'uahano pinodeahomo pe'e'etando miano mpo'oleo hai umamiu, da tinahamiu gadindo, ronga Apu Alla da kuasa'ea podeahomo dedeando miano mpesangkimiu. 5 Laro ntoraamiu die hai wita'ea, aricomiumo tora ngkawasa ronga mesana-sanaa. Aricomiu mepokomolombi kana me'asa pinotuwu danta sinumbele. 6 Aricomiumo hukuma'ira, deenapo mepatehira miano da sai hina salado, ronga da sai moseka ta'okomiu.Sabara tineiho karasai
7 Nangkuamo koie, raro mpetilaku, moicoomo kami mesabara ronga totarimaa nta leuhano Apu. Ontoomo ko'ira miano mpegalu da sabara totarimaa hasili witado da ko'oli, dungku kai leu usa wula bara ronga wula ntimbu. 8 Kanasi na'amiu paraluu'o sabara ronga pokomotende'o pelaroamiu, kana'umpe okudaamo nta leuhano Apu.
9 Raro mpetilaku, mi'osie mpengungu ronga mpekamposa-posala'i, kami osie saru nihukuma. Santo'u-to'uahano, koie Apu Alla danta otuhio kara-karamiu dahomo hai mata wamba.
10 Raro mpetilaku, kahioomo kami nunu'o karasaindo ronga sabarando raro nabii da ari leleako haratiano Apu. 11 Santo'u-to'uahano, i'iramo da ari sabara tineiho karasai, yahomo kando nineehako konantuara. Mimpodeahomo sabarano nabii Ayub ronga minto'oriomo hi barakati'o Apu perumbuino, kana'umpe Apu hina ngkawasa mpololaro ronga kopompeehawa.
Mesumpa ronga amalaakono da morungku
12 Sawali da kontu'uma, raro mpetilaku, mi'osie mpesumpa'ako langi kanapo wita'ea, atawa suereno. Ki menona, polomo kanahi, « Umbee. » Ki sai da'a, kanahimo, « Na'iaa. » Kai osie saru konakomiu hukuma.
13 Ki daa miano hai comiu da marasai, moicoano kai amala. Ki da'a da mohende, kahioomo kai pelagu mporeree. 14 Ki da'a miano hai comiu da morungku, moicoano kai poboboi ko'ira kamotu'ano jema'a, kando amalaakono, ronga upahiakono'o mina da merongaako neeno Apu. 15 Ronga amalano miano da parasaea pokontidoo miano da morungku, ronga Apu dahoo nta mokompewanguo, ronga ki daa ari moweweu dosa, koie dosano dahoo nta inampuni. 16 Nangkuamo koie, moicoano kami mpada me'akui'o dosamiu, ronga mpeka'ama-amalaako, dakomiu nta mentido. Amalano miano da pinokontekonano Apu Alla owose'o kuasano ronga barakatino. 17 Nabii Elia kanasi icita manusia biasa, kai pekora amala kai osie tii usa. Menonaa, tolu ta'u mentonga sai tuduno koie usa hai wita'ea. 18 Sa'arinopo amala penda, yahopo koie langi kai pontiihako usa, ronga koie wita'ea kowua'ako pinombula.
19 Raro mpetilaku, ki daa miano hai comiu da sai ehe mompodedea pompotisu da menona, moicoo ki da'a petilano da oliwio kai poboli'i. 20 Mimpeehawa'opo, miano da oliwio simbauno kai boli'io niweweuno da tesala, pokosalama'o penaano koie simbauno mebinta hai matea, kai ampunio Apu Alla dosano da me'alu.