Metokiahakono wita'ea
4
1 Hai hapa pebintaano koie da mokonteposalakomiu ronga da mokompekakahicomiu? Na'iaa bara mebinta hai kea-keamiu da me'o'anu hai pelaroamiu? 2 Taperamiu mokea, sawali nami ntule'i nta awaa, dungku kami mpompepate. Kami singgira, sawali nami ehesi awaa, kami mpekakahi ronga menteposala. Kasami mpo'awa, hina sami mpo'ita hai Apu Alla. 3 Kami mpo'ita, sawali nami mpo'awa, kana'umpe da pino'itamiu nai tekona, hina nte'iaasi nta pokosanaa'o wotolu mpantamiu dungku kai pura. 4 Hoo comiu da sai ko'ampadea hai Apu Alla, nami da'a bara to'orio miano da metokiahakono wita'ea hicuamo pedaluno Apu Alla? Dadi, inai da mokea metokiahakono wita'ea, koiemo pedaluno Apu Alla. 5 Mi'osie kanahi hai laromiu hi sahina patuduno koie haratiano Apu Alla da teburi hai bokuno kanahi, « Sangkoleo da nidiono Apu Alla hai cita me'aluo pinokeahakono. » 6 Sawali taperano owose pompeehawano Apu Alla icita, yahomo kai teburi koie hai Boku Haratia kanahi,« Da nidaluno Apu Alla koiemo miano da mentaba,
sawali nameehawa'o miano da owawa larono. »a
7 Nangkuamo koie, kami nturu hai Apu Alla, ronga kami nta'oo ponggawano bilisi, dahomo nta molai bintanicomiu. 8 Mi'okudahio Apu Alla, kai okudahicomiu na'ana. Pokomowuaho limamiu da kodosa. Pokomolinoo pelaroamiu da ko'oru-orua. 9 Mimpesosoorimo, mimperurumatemo, ronga mepoe-poe laro. Kahioomo kasiomiu teboli'i kai tewali rurumate, ronga mohendemiu kai tewali poe laro. 10 Kahioomo kai owawa laromiu hai ra'ino Apu Alla, kai taarakokomiu.
Osie momposala'i miano
11 Hoo raro mpetilaku, mi'osie mpekaposa-posala'i. Inai da montumbu'akono petilano atawa posala'io, da pinontumbu'akono ronga da pinosala'ino yahoo Boku Parentano nabii Musa. Ronga kiu posala'io Boku Parentano nabii Musa, nau da'amo nunu'o koie parenta, sawali co'omo da adili'o koie parenta. 12 Mainakaa te'iaasi me'asa da ari moweweu Boku Parenta, ronga danta mo'otuhi kara-kara, yahoo Apu Alla da kuasa mompokosalama ronga mompokobinasa. Kana'umpe co'o, kau moseka posala'io simbau'u?
Osie kolumpee Apu Alla himi daa mongkaria
13 Mimpeehawa'o oliwincu, comiu da kanahi, « Die oleo atawa i'ile, dakami nta molinca hai kampo anu, ronga nta moo'ia na'ico mobalu-balu mo'u'ungke doi te'asa ta'u. » 14 Mainakaa nami da'a to'orio danta kadadia ki meanta. Hapa batuano koie toramiu? Toramiu koie kana to'u seru da inonto asantonia kai isa. 15 Santo'u-to'uahano nta kanahimiu, « Ki po'eheno Apu kico daapo tora, dakami nta weweuho die atawa koie. » 16 Sawali diekana, mentabakomiumo ronga mpereree mpanta. Luwu da mentaba kana koie tesala'o. 17 Dadi, ki da'a miano da to'orio nta niweweuno da moico, kasai da'asi weweuho, koie miano madosaa.