Dosa tendenomo elo
3
1 Raro mpetilaku, osie me'alu miano hai comiu da mokea tewali guru, kana'umpe dakitamo to'orio koie guru hi daa nta mobe-mobea hukumano ka'iaa suere miano. 2 Kana'umpe luwunto, me'aluo niweweunto da tesala. Inai da sai tesala hai pogau'ano, koiemo miano da sai tekebaako, ronga da to'ori kuasaiho upuo wotoluno.3 Kato gala'o dara hai ngangano, kai nunu'o po'ehento. Kanamo koie kato to'ori parentaa upuo wotoluno. 4 Ontoomo koie bangka, mau ki owose ronga polaisako ngalu'ea, sawali da potulo'o koiemo ulino da okidi nunu'o po'eheno jurumudi. 5 Kanasi na'ana koie elo, mau kicua pokosangkano wotolu da okidi, sawali nanto'ori mompokolewera gau, mompokolumele ino'awa.
Ontoopo koie api, mau ki okidi, dahosi tunuo inalahi da owose. 6 Koie elo kanamo dadaano api. Die hai wotolunto, koie elo yahoo pepu'uano sa'o, da pokomowusee upuo wotolu. Luwuo toraahanto koiemo elo da tunuihakono'o api naraka. 7 Luwu ra'ino kadadi da mo'ila, manu-manu, kadadi da lumele, kadadi da hai tahi, to'orio pokomoneaho miano. 8 Sawali elono miano, nahina da to'ori pokomoneaho. Koie elo mosa'oo, pono'ako udu nimateako, ronga nahina miano da tule'i parentaa. 9 Koie elo porereeto Apu Alla Tamanto, sawali yahosi penda pontundarinto miano da ari pinokoda'ano Apu Alla nunu'o ra'ino. 10 Koiesi da me'asa nganga sabaano barakati ronga pontundari. O raro mpetilaku, koie da kana nai tewali. 11 Dahoo bara me'asa mata e'e, sabaano e'e motewe ronga e'e mopa'i? 12 O raro mpetilaku, dahoo bara koie keu ara da kowua'ako zaitun, ronga angguru da kowua'ako ara? Kanamo na'ana mata e'e da mo'ahi nai to'ori moluarako e'e motewe.
Pinehawa motu'a mebinta hai Apu Alla
13 Ki da'a hai comiu miano da motu'a mpinehawa ronga koa ponto'orino, kahioomo kai inonto hai toraahano da moico, koiemo pohedoano miano da moluu larono ronga motu'a mpelaroa. 14 Sawali kimi singgira, mopoe laro, ronga mokea tora mpanta, osie mentaba'ako hiu mandara ronga osie mekulepi balia'o pompotisu da menona. 15 Pinehawa motu'a da kana koie, na'iaa hai Apu Alla pebintaano, sawali diesi hai wita'ea, ronga hai pekirino miano, kai tii mebinta hai setani. 16 Maina dahano miano da singgira ronga da me'urusi mpanta, koiemo dahano hitu ronga pera niweweu da mosa'o. 17 Sawali pinehawa motu'a da mebinta hai Apu Alla kana die: lamoro me'asa molino mpelaroa, ko'orua ehe tepokona, te'ungkahi pelaroa, ehe metontoi, kawasa mpololaro, ronga sadia moweweu moico. Nai pompedulu miano ronga nai pongkona-ngkona. 18 Miano da mompokote simbauno, dahoo mohawu gau da mompokontepokona danta kowua'ako niweweu da mongkote.