Osie meruruki hulano miano
2
1 Raro petilaku da parasaeaho Apunto Yesus Kristus da tereree, mi'osie mperuruki hulano miano. 2 Kana'umpe ki daa miano da mesisi wulaa ronga mebabu moico kai leu mewiso hai sambahea'amiu, kai leu penda na'ana miano ngkadee-dee da mepakea sadaka, 3 yahopo kami mpa'angga'o koie da mepakea moico kami ngkanahi, « Mintotoromo na'ai hai kadera da moico. » Sawali koie hai miano ngkadee-dee mina ngkanahi, « Pentademo pekeena, » atawa « Totoromo hai wawo horo soie hai ra'ino karuku. » 4 Kicanamo koie poweweumiu miano, nami da'a bara meruruki ra'ino miano, ronga tewali hakim da mosa'o pekirino?5 Hoo petilaku da telou, mimpeehawa'o, na'iaa bara kai tindahako'ira Apu Alla miano ngkadee-dee die hai wita'ea, kando mengkawasaako imani, kando mperapio pomparentaano Apu Alla hi ari dandi'ira miano da lou'o? 6 Sawali yahomo miano ngkadee-dee da pinarurumiu. Deenapo na'iaa bara ko'ira miano ngkawasa da nte pakaseakomiu, da nte sintakomiu hai pongadila? 7 Na'iaa bara ko'ira da sosa'oo koie nee nte'angga da ari tinarimamiu hai Apu Alla?
8 Kimi nunu'o parentano Mokoleto da teburi hai bolo Boku Haratiano Apu Alla kanahi, « Lolaroo simbau'u kana tongko wotoluu, »a koiemo niweweu da moico. 9 Sawali kimi mperuruki ra'ino miano, koiemo kami mpoweweu dosa, ronga koiemo mentoda'ano himi limpakio parentano Apu Alla. 10 Kana'umpe inai da nunu'o luwu parentano Apu Alla, sawali dahoo me'asa da nilimpakino, kanasi hina limpakio luwuo. 11 Kana'umpe da kanahi, « Osie meduluakono da sa'iaa samporau, » yahosi penda da kanahi, « Osie mompepate. »b Dadi, mau ki sami da'a meduluakono da sa'iaa samporau, sawali dakomiusi mompepate, yahosi molimpaki petabeno Apu Alla.
12 Gaumiu ronga niweweumiu kahioomo kai kana miano da to'orio hicua Apu Alla danta otuhio tesalado nunu'o parenta da mompokolalesa. 13 Kana'umpe Apu Alla nai pololaro miano da sai kopololaro hi otuhio tesalano. Sawali miano da kopololaro dahoo nta meponangi hi inotuhi kara-karano.
Imani ki sai peronga niweweu matee
14 Hoo raro mpetilaku, hapamo gunano miano hi kanahi, iaa koie miano mparasaea, sawali nahinasi niweweuno da moico? Dahoo bara parasaea da kana koie nta to'ori mokosalama'o? 15 Ki daa petilamiu tama atawa tina da sai mompodai ronga sai mo'awa mongkaa koie oleo, 16 kai da'a miano hai comiu da kanahi, « Milakomo ronga momapu laromiu, pebabu mokulamo, ronga pongkaamo kami mowohi, » sawali nasai da'asi moweehira da paraluudo hai wotolundo, hapamo gunano? 17 Kanamo na'ana koie imani, ki sai kowua'ako niweweu, koie neeno imani da mate.
18 Dahoo miano da kanahi, « Ico'o ko'imani, ronga i'aku dahoo niweweungku. » Kicana koie, tisu'akuo koie imaniu da sai hina niweweuno, ronga i'aku dahaku nta tisu'akono'o niweweungku hicu ko'imani. 19 Nami da'a bara parasaea hi me'asasi Apu Alla? Menonaa! Deenapo mau setani yahosi na'anda parasaea ronga mebibi momee. 20 Hoo co'o miano mpore, paraluu'o bara kaku tarangkaniakoko, imani da sai kowua'ako niweweu moico, nahina gunano? 21 Kai pokontekonaa Apu Alla i Ibrahim mbueto tendenomo niweweuno, tempono mesombaako i Ishak anano hai pontompa'a pesomba. 22 Koiemo dahamiu ontoo mondo'ano imani yahoo ki pedulumo parasaea ronga niweweu. 23 Kicanamo koie koa'anomo ayati da teburi hai bolo Boku Haratiano Apu Alla kanahi, « Ibrahim parasaeaho Apu Alla, nangkuamo Apu Alla kai angga'o hicua miano ntekona. »c Nangkuamo koie Ibrahim kai nineehako tokiano Apu Alla. 24 Diekana mi'ontoomo hi pokontekonaa Apu Alla miano tendenomo niweweuno, na'iaa parasaea mpena.
25 Ontoopo koie i Rahab, tina endeo, kai pokontekonaa Apu Alla tendenomo niweweuno, tempono wuniakohira ko'ira mata-matano miano Israil hai laicano ronga mokompolaihira nunu'o sala suere.
26 Dadi, kana wotolu da sai kopenaa matee, kanamo na'ana koie imani ki sai peronga niweweu matee.