Surano i Paulus da meri'ou hai jema'a
Tesalonika
Pobetekino Gau
Koie kota Tesalonika iponoha yahoo kota owoseno wonua Makedonia, me'asa propinsi da kinuasaino mokole'eano Roma. Asa ntilarano ko'ira miano yahoo miano Yahudi, sawali asa ntilarano na'iaa, ronga mpesombaando hai ka'apu-apu. Iramo i Paulus, i Timotius, ronga i Silas da mowawa haratiano Apu Alla hai Tesalonika, kai da'a miano da parasaeaho Apu Yesus na'ico (Tulurando Rasulu 17:1-4).
Sawali da'a mengkau koie i Paulus ronga simbauno kando polaisio koie Tesalonika kando lako hai Berea tendenomo ko'ira miano da sai parasaeaho Apu da mokea pakaseahira (Tulurando Rasulu 17:5-10). Da'a mengkau kai mokea koie i Paulus tepo'awaakondo simbau sa'imanindo hai Tesalonika. Yahomo kai tena'o i Timotius lako awahira ki daasi moroso imanindo atawa nai da'amo (1 Tesalonika 3:1-2). Sapohulenomo koie i Timotius mebinta hai Tesalonika, (Tulurando Rasulu 18:5) yahopo i Paulus kai burio die sura.
Patuduno i Paulus kai poburi die sura, yahoo: pokompehawa'ira kana'umpe banguno iponoha daandopo mperonga (2:1-2). Kai pontarimakasi tendenomo lele dadaano imanindo ronga pololarondo. Kai lilimboihira da pinakasea tendenomo parasaeando (3:3-5). Kai paguru'ira sipano miano Ngkarasitee da moico (4:1-12). Yahopo kai po'awaakondo da pinetukanaakondo mekona hapa da inawando miano mate ronga miano Ngkarasitee da mentorapo dungku kai leu mpendua Apu Yesus (4:13-17). Ki daa miano Ngkarasitee da mate hi sai da'apo leu mpendua Apu Yesus, tewali bara koie miano awaa tora ngkaidaaha mebinta hai Iaa? Impia kai daa nta leu mpendua Apu Yesus? I Paulus oliwihira kando osie mongare mpohedo kando daa totarimaa leuhano Apu Yesus ronga momperahi-rahi to'u.
Ihino sura
1. Pobetekino gau (1:1).
3. Oliwi ki kana'umpe bangu-banguno miano Ngkarasitee (4:1-12).
5. Salamu kompura-puraano (5:23-28).