Oliwi kai tora nunu'o po'eheno Apu Alla
4
1 Kompura-puraano, raro mpetilamami, aricamimo potisukomiu moiconoo Apu Alla nta daa-daamiu kimi mentora. Menonaamo toramiu dakomiumo nunu'o kana koie. Sawali diekana, meronga kuasano Apu Yesus, kopo'ita ronga oliwicomiu kami mpoweweu da moi-moicopo. 2 Kana'umpe minto'oriomo koie petena hico ari motisukomiu meronga kuasano Apu Yesus. 3 Kanamo die da po'eheno Apu Alla, kai molinyaa pelaroamiu, kami osie endeo. 4 Luwu comiu tama, kahioomo kami ntora mepelaroa molinyaa meronga samotu'amiua ronga tereree hai matano miano. 5 Osie momponunu'ako da pinokeahakono wotolu ngkodosamiu, kana niweweundo miano da sai to'orio Apu Alla. 6 Osie da'a te'asa miano da salakio petilano kana koie, atawa o'akala'o. Iponoha aricamimo mokompehawakomiu hi daa Apu Alla nta hukumaa miano ki lako moweweuhako da tesala kana koie. 7 Apu Alla boboicita kato osie tora endeo, sawali kato tora mepelaroa molinyaa. 8 Miano da sai ehe monunu die pompotisu, na'iaa pompotisuno manusia da sai ineheno, sawali da sai ineheno yahoo Apu Alla, da moweekomiu Sangkoleono.9 Nai da'amo paraluu kako buriakomiu'o dadaano nta pololaromiu raro mpetila da mpe'asa imanimiu. Ariomo potisukomiu Apu Alla kami mpekalola-lolaro. 10 Ronga santo'u-to'uahano, dakomiumo lolarohira luwu petila mpe'asa imanimiu hai upuo Makedonia. Sawali dakamipo mo'ita kai kolalopo moico niweweumiu hai ra'i danta leu. 11 Kahioomo kami mokea kai montundu toramiu ronga osie mosampuru urusano suere miano. Kahioomo kami hedoo pohedoamiu pantamiu, kana ko'ari tenakomiu iponoha. 12 Kimi mpohedo kana koie, nami da'amo nta momperahi-rahi hai simbaumiu, ronga miano da sai parasaeaho Apu Yesus dahira nta anggakomiu.
Dadaano miano mate ki leu Apu Yesus
13 Raro mpetilamami, mokeakami kami nto'orio dadaando miano da memate, kai osie mopoe laromiu kana miano suere da sai hina pinerahi-rahindo. 14 Toparasaeahomo hi arimo koie i Yesus tawe ronga mewangu mbule. Nangkuamo kato parasaeaho Apu Alla hi daa nta kompuluhira pera miano mate da parasaeaho Apu Yesus, kando mentora merongaakono.
15 Die kodaa mo'awaakomiu, yahoo haratiano Apu, ki leu mpendua Apu Yesus, icita da mentorapo nato da'a nta meri'ouhakondo da memate mperi'ou. 16 Dahoo nta pinodea parenta, ronga dahoo nta mehou ponggawando mala'ekati, ronga nta pinuuri torompeno Apu Alla, kai daa nta metiihako Apu Yesus pantano mebinta hai suruga, yahopo pera miano mparasaea da mematemo nta pinokompewangu meri'ou. 17 Sa'arino koie, yahopo na'anta da mentorapo koie wotu nta tinaarako mperongahira hai bolo seru tepo'awaakono Apu hai laamoa. Yahopo kato mperonga Apu dungku samengka-mengkauno. 18 Nangkuamo koie, kahioomo kami mpeka'oli-oliwiako die pompotisu.