Misadiamo nta leuhomo Apu
5
1 Raro mpetila, nai da'amo paraluu kako buriakomiu'o impia tempono atawa wotuno nta leuhano Apu. 2 Kana'umpe minto'ori to'uomo oleo nta leuhano Apu nta kana miano mpononako da leu mengkau malo. 3 Ki daa miano da kanahi, « Luwuo ama'o ronga moicoo, » koiemo wotuno nta tibo'ano awahira abalaa, ronga nahina te'asa miano danta salama. Koie kadadia nta tibo-tibono dadi, kana tina da dedea ntia nta mompokohina.4 Sawali icomiu na'iaa miano da tora hai bolo rondomaano, kami ntibo nta tebibinco kana miano da nileunino miano mpononako. 5 Luwumiu yahoo miano da mentora hai molinyaahano ronga da lako meanta; icita na'iaa miano da tora hai rondomaano atawa da lako malo. 6 Kuamo koie, to'osie moturi kana suere miano, sawali kahioomo kato mpedagai, ronga pekirinto kai molinyaa. 7 Miano da moturi, malosi kando mpoturi, ronga miano da molangu, malosi kando molangu. 8 Sawali cita die tona ntewiso hai tonga oleo da molinyaa: kuamo koie pekirinto kai molinyaa na'ana. Tosadia mebabu ngkabala'ako parasaea ronga pololaro, ronga metopi utiako pomperahi-rahinto hicua Apu Alla danta pokosalamakita. 9 Kana'umpe Apu Alla nai da'a rurukicita kai hukumakita, sawali nta mokosalamakita mentete hai Apunto Yesus Kristus, 10 da ari mate tendenomo icita, dungku kai leu mpendua, mau kito daapo tora, kanapo kito matemo, dakitasi nta tora mperongaakono. 11 Nangkuamo koie, kahioomo kami sadia mpeka'oli-oliwi pokomokoraakono'o parasaeano tee-tee'asa miano, kana da niweweumiu diekana.
Upuano oliwi
12 Raro mpetila, dakami mo'ita hai comiu kami haragai'ira miano da mpohedo mokora hai comiu ronga wawaicomiu nunu'o Apu ronga mokompehawakomiu, 13 kami angga'akondo'o pololaro tendenomo pohedoando. Kahioomo kami ntora mentepokona.
14 Kopo'ita penda hai raro mpetila, kami oliwihira da memongare, lilimboihira miano da motewe pelaroando, tulumihira miano da paraluu tinulumi, ronga misabarakihira pera miano. 15 Midagai'o kami osie mpekawolohiako sa'o. Mimpeehawa'o kami sadia moweweu da moico hai petilamiu ronga hai luwu miano.
16 Kahioomo kami sadia memohende 17 ronga sadia amala. 18 Larono luwuo dadaamiu, kahioomo kami sadia montarimakasi, kana'umpe koiemo da po'eheno Apu Alla hai comiu kana miano da tora pono-ponohaakono Yesus Kristus.
19 Mi'osie halangio pohedoano Sangkoleono Apu. 20 Mi'osie paruruo haratia da mebinta hai Sangkoleono Apu. 21 Paresaa luwu da pinodeamiu, da moico kami nunu'o. 22 Mimentalahio luwu da mosa'o.
Salamu
23 Kahioomo kai pantano Apu Alla danta mapuhio pelaroanto, kami ntora santo'u-to'u tinindahakono Apu Alla. Kahioomo Apu Alla kai dagakomiu luwumiu, sangkoleomiu, penaamiu, ronga wotolumiu, kai osie da'a tekebaakoamiu ki leu mpendua Apunto Yesus Kristus. 24 Apu Alla da ari boboicomiu, yahomo danta konianto'u weweuho koie luwu.
25 Raro mpetila, mi'amalaakami na'amami! 26 Pada mpekasalamu luwu petila Karasitee ronga mongkeni lima peto'ono himi mpe'asa imani.a
27 Meronga kuasano Apu Alla kupo'ita kami osie sai basaakondo'o die surangku hai luwuo petila da pe'asa imaninto.
28 Pompeehawano Apunto Yesus Kristus yahomo da merongakomiu.