Lele moico da niwawano i Timotius hai Paulus
3
1 Perumbuino nako pokotaha'omo ko'aumami. Kuamo kako pepekiri, dadimo kako poo'ia pantamami hai Atena, 2 kako tena'akomiu'o petilamami i Timotius da pe'asa mpohedomami hai Apu Alla mokodungku'o Lele Mohende mebinta hai Kristus, kai oliwicomiu ronga korahiakomiu'o parasaeamiu hai Apu Yesus. 3 Kanamo koie kai osie da'a te'asa miano da molelu imanino tendenomo karasai. Minto'oriomo hi matantumo hito daa nta awaa koie karasai. 4 Daantopo mperonga, aricamimo mo'awaakokomiu meri'ou hito daa nta memarasai. Ronga minto'oriomo kanahi, diekana menonaamo kadadia. 5 Nasaku pokotaha'omo ko'aungku, kaku tena'akomiu'o i Timotius, kuna mokea to'orio parasaeamiu, te'iaamo ki daamo ari mokogau-gaukomiu ponggawano bilisi, dungku kasai hina gunano hico ari mokokau tendenomo comiu.6 Sawali diekana leuhomo mbule i Timotius mo'awaakami lele moico dadaano parasaeamiu ronga pekalolaromiu. Kanahino dakomiusi sadia mehawa moicokami hai bolo mpinehawamiu. Ronga dakomiusi mokea kato mentepo'awa, kanasi na'amami mokeakami kato mentepo'awa. 7 Koiemo sababuno, raro mpetilamami, hai larono luwu susa maupo karasaimami, lele dadaano parasaeamiu mokomorosoo laromami. 8 Yahomo kako penasaa diekana, kana miano da tora mbule, podo kai daasi modoro pentademiu meboboto hai Apu Yesus. 9 Ntaperano owose pontarimakasimami hai Apu Alla tendenomo luwu dadaamiu da pokomohende'o laromami hai ra'ino Apu Alla. 10 Malo meanta kopekora me'e'eta kato to'ori mentepo'awa kako pokongkoa'akomiu'o hapa da kakuranga hai parasaeamiu.
11 Ehepo Apu Alla Tamanto ronga Apunto Yesus kai po'ungkahiakami sala kato mentepo'awa. 12 Kahioomo Apu Alla e'elengua moweekomiu pololaro kami sateti-tetianimiu mekalola-lolaro ronga lolarohira luwu miano, kana pololaromami comiu. 13 Ehepo Apu kai pokomorosoakomiu'o pelaroamiu, kai molinyaa ronga sai tekebaako hai ra'ino Apu Alla Tamanto, kai leu tempono leuhano Apunto Yesus merongahira pera da tinindahakono.