Pohedoano i Paulus hai Tesalonika
2
1 Raro mpetilamami, minto'oriomo hi sai da'a sia-sia hico ari leu awakomiu. 2 Minto'oriomo daamamipo sai paisa leu awakomiu hai Tesalonika, hico pinakasea ronga inanu-anu daamamipo hai Filipi. Sawali mau me'alu miano da mokea sosa'okami, Apu Alla mokomosekakami kako pokodungku'akokomiu'o Lele Mohende mebinta hai Apu Alla. 3 Kana'umpe oliwimami na'iaa nta pokomalimpukomiu, atawa mepatudu ntesala atawa me'akala mosa'o. 4 Deenapo dakami oliwicomiu kana miano da pantasinoo Apu Alla moleleako koie Lele Mohende. Nako da'a mogau kai sanaa larono miano, sawali kai moiconoo Apu Alla, da to'orio ihi mpelaroamami. 5 Minto'oriomo hi sako paisa reree mporekomiu atawa mowuniako patudumami da mosa'o hico daa nta kokabi'o doimiu, Apu Allamo da to'orio! 6 Ronga nako paisa mokea nirereeno miano, kanapo comiu ronga suere miano. Santo'u-to'uahano, cami miano ntinenano Apu Yesus Kristus tewalio kopo'itaicomiu hapa-hapa. 7 Sawali kona mesipa moluu mpelaroa daantopo mperonga, kana me'asa tina ana da dodonganihira anano. 8 Kanamo koie owoseno pololaromami comiu, na'iaa te'iaa Lele Mohende da mebinta hai Apu Alla da tinitilamami hai comiu, sawali ronga toraamami, kana'umpe taperamami lolarokomiu! 9 Kana'umpe nami da'apo kolumpee mokoramami mo'u'ungke tinoraakomami. Malo ronga meanta dakamisi mohedo, kako osie pokomasusakomiu ki konaa dahamami mokodungku'akomiu'o Lele Mohende mebinta hai Apu Alla.10 Comiumo da to'orio rongapo Apu Alla kana'umpe molinono pelaroamami ronga tekonano niweweumami, nahina peposala'iano hai comiu da parasaea. 11 Minto'oriomo poweweumami comiu tee-tee'asa miano, kana me'asa tama ana poweweuno anano, 12 yahoo oliwicomiu kai moroso laromiu, ronga pokompehawakomiu kami nunu'o toraaha da pantasinoo Apu Alla, da boboicomiu kami mpewiso hai laro mpomparentaano kami mperongaa hai laro mpinoko'owose'ano.
I Paulus mohende tendenomo miano mparasaea
13 Dahoo penda me'asa sababuno kako sadia montarimakasi hai Apu Alla. Yahoo isomami leleako haratiano Apu Alla hai comiu, nami da'a angga'o kana lele da mebinta hai miano, sawali hicua lele da to'u-to'u mebinta hai Apu Alla. Iaamo da mohedo hai pelaroamiu da parasaea. 14 Raro mpetila, hapa da ari me'inawamiu arihiramo na'anda awaa jema'a hai Yudea da tewalimo mianono Yesus Kristus. Koie karasai da awakomiu mebintasi hai sukumiu, kanasi na'anda mianono Apu Alla hai Yudea mebinta hai ira miano Yahudi. 15 Ko'iramo da ari popatee Apu Yesus ronga pera nabii, naamo pakaseakami. Ndodaluhira luwu miano ronga niweweundo nai moiconoo Apu Alla. 16 Deenapo nando wukahicami moleleako haratiano Apu Alla hai suere miano da sa'iaa Yahudi, lele danta mokosalama'ira. Kanamo koie miano Yahudi kai sadia tetiani dosando dungku kai koa me'aluno. Kompura-puraano awahiramo hukumano Apu Alla.
17 Raro mpetila, sa'isoto menteposinca asantonia, sai mentepo'onto, sawali hai pelaroa nai da'a, ntaperamami moko'auhakokomiu, ronga totandaiho tepo'awaakokomiu. 18 Mokeakami lako awakomiu, i'aku i Paulus, pempiahakumo totandaiho, sawali nantotampokami ponggawano bilisi. 19 To'u-to'u hai comiumo dahamami momperahi-rahi ronga mohende'amami. Kana'umpe ki leumo Apu Yesus, kato mpera'iako, icomiumo tilari mpeponangiamami dahamami mehawa! 20 Menonaa, comiumo kako te'angga ronga kako mohende!