Hitu hai Tesalonika
17
1 Koie i Paulus ronga i Silas mesala tealo hai Amfipolis naamo Apolonia dungku hai Tesalonika. Na'ico dahoo me'asa laica sambahea'ando miano Yahudi. 2 Kana biasano koie i Paulus mewiso hai laica sambahea'a, ronga teposusu otolu oleo mpekolia hi gau'akondo'o ihino Boku Haratiano Apu Alla, 3 kai pokomentoda'akondo'o ronga tisu'akondo'o hi daa nta marasai koie Mokole Pompokosalama, kai pewangu mbule mebinta hai raro miano mate, kanahino, « Koie Mokole Pompokosalama yahoo i Yesus, die da tinulurangku. » 4 Asa ntilara ko'ira miano Yahudi parasaeahiramo da pompotisudo i Paulus ronga i Silas, kando nunu'ira, kanasi penda me'aluo miano Yunani da momeetako Apu Alla, ronga me'aluo tina da te'angga.5 Sawali ko'ira miano Yahudi ndona mesinggira, nangkuamo kando mpongkebai miano mosa'o mebinta hai tadoha, kando mpoweweu hitu hai bolo ngkota, kando lako rumpatio laicano i Yason, patudundo nta wawaa i Paulus ronga i Silas hai ra'indo miano me'alu. 6 Sawali nasando awahira na'ico, yahomo kando sisinta'o i Yason ronga opia miano mparasaea, mokompera'ihira hai pamarenta kota, kando daa mpogora kanahi, « Di'iramo miano da pokomohitu'o upu-upuo wonua dungku'iramo na'ai, 7 ronga koie i Yason da mokompoo'iahira hai laicano. Nando ponunu parentano mokole'eano Roma ndona kanahi, ‹ Dahoo mokole suere, yahoo i Yesus. › » 8 Sando podeaho ko'ira miano me'alu ronga pamarentano kota, namohitu'omo larondo. 9 Sawali sa'arindo i Yason ronga ko'ira miano mparasaea mowada doi kai osiemo da'a hitu,a nilakodomo bintanihira.
I Paulus ronga i Silas hai Berea
10 Koiesi malo, ko'ira miano mparasaea kando tena'ira i Paulus ronga i Silas kando lako hai Berea. Sadungkudo na'ico, nalako'iramo hai laica sambahea'ando miano Yahudi. 11 Miano Yahudi na'ico molinoo larondo ka'iaa miano Yahudi hai Tesalonika, kana'umpe ehe'ira tarimaa koie haratia, ronga tapio oleo mepopotisu'ako Boku Haratiano Apu Alla, kando to'orio ki daasi menona hapa da kanahino i Paulus. 12 Nangkuamo kai me'alu da parasaea, kanapo ko'ira tina Yunani da te'angga, suerepo tama.
13 Sawali ko'ira miano Yahudi da mpebinta hai Tesalonika, ndona mpodeahomo hi daamo i Paulus moleleako haratiano Apu Alla hai Berea, lako'iramo na'ico hitupihira miano me'alu. 14 Nangkuamo nde'e, ko'ira miano mparasaea tena'o i Paulus kai lako hai wiwi ntahi, sawali i Silas ronga i Timotius dahirapo moo'ia hai Berea. 15 Ko'ira miano salakono i Paulus lako'iramo wawaa dungku hai Atena. Yahopo kando pohule hai Berea mowawa oliwi hai Silas ronga Timotius, kando oru leu awaa i Paulus hai Atena.
I Paulus hai Atena
16 Dahomo koie i Paulus totarimahira hai Atena, kai mopoe to'u larono hi ontoo koie kota da pono'ako ka'apu-apu mpesombaa. 17 Nangkuamo koie, kai uluahako'ira miano Yahudi ronga suku suere da momeetako Apu Alla kando mpekatuka-tukanai mpo'awando hai laica sambahea'a, kanasi na'ana ronga pera miano da inawano tapio oleo hai tadoha. 18 Dahoo opia miano mandara da pegagahino, miano golonga Epikuros ronga Stoa. Dahoo da kanahi, « Hapa da kanahino die miano mangkegau? » Meha da kanahi, « Ntada'a dahoo moleleako pompotisuno ka'apu-apuno suere wonua. » Kana'umpe da nileleakono yahoo Lele Mohende dadaano i Yesus ronga dadaando miano mate hindo mpewangu.b
19 Yahomo kando wawaa hai kongkosaando wakilindo ra'iati hai Areopagus kanahi, « Mokeakami to'orio koie pompotisu'u da tonia. 20 Kana'umpe sueree pompodeamami koie hapa da nigau'u. Nangkuamo kako mokea to'orio hapa batuano ko'ira luwu. » 21 (Ko'ira miano Atena ronga miano leu da mpoo'ia kokeena, nahinamo wotudo meha, te'iaamo mogau ronga mompodedea perano tulura da tonia.)
22 Kai lako i Paulus mentade hai ra'ino kongkosaa hai Areopagus kai kanahi, « Hoo miano Atena, ku'ontokomiu, ntaperamiu mokua me'agama hai pera da niweweumiu. 23 Kana'umpe daangku tade-tade, dahaku ontoo hai bolo ngkotamiu hapa-hapa da sinombamiu, ronga penda dahaku mo'awa me'asa pesombaamiu dahano teburi: ‹ Hai Apu Alla da sai tino'ori. › Dadi, hapa da sinombamiu da sai tino'orimiu, koiemo da tinulurangku hai comiu.
24 Apu Alla da ari weweuho wita'ea ronga pera ihino, Iaamo Apuno langi ronga wita, da sai moo'ia hai pesombaa niweweu limano manusia. 25 Yahomo kasai hina miano danta tule'i tulumio, kana to'u hi daa kakurangano, kana'umpe Iaamo da mompoweehi toraaha ronga penaa, naamo pera hapa giuno hai to manusia. 26 Mebinta me'asa miano kai pokontewalio luwuo sukuno to manusia, danta ihianio upuo wita'ea, ronga da arimo patantuo wotu pomparentaando ronga tidano wonuando. 27 Patuduno kai weweuho Apu Alla kana koie, kando mpekakoi u'ungkee, ki tewali kando awaa, eheemo Apu Alla dahosi okudahicita tee-tee'asa. 28 ‹ Kana'umpe tendenomo Iaa kato tora, komiu-miu, ronga da'a. › Kana da ari niburindo mianomiu da mandara modidimba kanahi, ‹ Kana'umpe cita die na'anta leeno Apu Alla. ›
29 Hinangkua icita leeno Apu Alla, to'osie mepekiri hi pengkenasi Apu Alla ronga wulaa, pera, atawa watu da ari niweweuno limano miano da mandara kai tewali ka'apu-apu. 30 Apu Alla kolumpeemo iso-iso daantopo pore kana koie, nangkuamo diekana tena'omo pera miano hai upuo wita'ea kando mpoboli'i hai sinalakindo. 31 Kana'umpe ariomo mompatantu me'asa oleo, dahano nta adili'o ihino wita'ea kai mongkote. Danta adili'o yahoo koie me'asa miano da ari tinisuno, ronga mokomentoda'akondo'o luwu miano hi ari mokompewanguo koie miano mebinta hai raro miano mate. »
32 Sando podeaho hindo mpewangu miano mate, dahoo da la'u-la'uo, ronga mehano kanahi, « Suerenopo oleo, kako daa nta modedeaho koie da kanahiu. » 33 Nangkuamo i Paulus kai bintanihira. 34 Sawali dahoo opia miano da meduluo i Paulus ronga da parasaeamo, yahoo i Dionisius, me'asa anggotano kongkosaa hai Areopagus, ronga me'asa tina da meneehako i Damaris, naamo penda opia miano suere da perongando.