I Paulus hai Korintus
18
1 Sa'arinomo koie, lako'omo i Paulus mebinta hai Atena kai dungku hai Korintus. 2 Kokeenamo tepo'awaando me'asa miano Yahudi da meneehako i Akwila, da tehina hai wonua Pontus. Toniahirapo leu mebinta hai wonua Italia ronga samotu'ano da meneehako i Priskila, hinangkua petenano mokole'ea Klaudius kando mpeluarako luwu miano Yahudi mebinta hai kota Roma. Koie i Paulus lako awahira, 3 ronga moo'ia hai laicando mperongahiramo mpohedo, kana'umpe hina mengkena pohedoando, yahoo moweweu kema. 4 Tapio oleo mpekolia, i Paulus lako'omo hai laica sambahea'a gau'o ki kana'umpe ko'ira miano Yahudi ronga miano Yunani kando parasaeaho i Yesus.5 Saleundo i Silas ronga i Timotius mebinta hai Makedonia, nai da'amo i Paulus mohedo da suere, te'iaamo leleako haratiano Apu Alla, pokomentoda'akondo'o miano Yahudi hicua Mokole Pompokosalama da ari nidandino Apu Alla koiemo i Yesus. 6 Sawali ko'ira miano Yahudi ndona nta'oo ronga moko'anu-anuo, yahomo kai tapisio awu hai babuno kai kanahi, « Pantamiu nta tanggoiho mateahamiu! Aku nahina salaku. Metampu'u diekana, nta lako'akumo hai suku suere. »
7 Pebintaanomo na'ico kai lako hai laicano me'asa miano da meneehako i Titius Yustus, miano suku suere da parasaeaho Apu Alla, laicano merapa'akono laica sambahea'a. 8 Koie i Krispus, ponggawano laica sambahea'a, parasaeahomo Apu ronga luwuo ihi laicano. Dahopo me'alu miano Korintus da modeaho Lele Mohende kando parasaea ronga menibaho.
9 Dahoo me'asa malo, kai pepopo'ontoako Apu hai Paulus ronga koharatia, « Osie momee! Sai-saiu leleako, osie mengio. 10 Kana'umpe dahakusi merongako, ronga nai te'asapo miano danta to'ori hapaico ronga pakaseako, kana'umpe me'aluo umaticu die bolo ngkota. » 11 Poo'iahomo na'ico i Paulus asa ta'u onoo wotiti, kai daa potisu'akondo'o haratiano Apu Alla.
12 Sawali satewalinomo gubernur i Galio hai Akhaya, kando mpekosi ko'ira miano Yahudi ta'oo i Paulus ronga wawaa hai pongadila. 13 Kanahindo, « Die miano dahoo pongaruhi'ira miano me'alu, kando pesomba hai Apu Alla nunu'o cara da sai pengkenano parentano i Musa. »
14 Yahopo kai daa nta metampu'u i Paulus mogau, nangkanahio koie i Galio hai miano Yahudi, « O comiu miano Yahudi, ki menona koie da kanahimiu yahoo me'asa niweweu mosa'o, pantasiomo kaku tarimaa kara-karamiu, 15 sawali adie da tineposala'ako yahoo gau, ronga nee, kai tii atora mpantamiu, kahioomo kami mpokomoicoo pantamiu. Naku ehe mo'otuhi kara-kara da kana koie! » 16 Yahopo kai tena'ira meluarako hai bolo mpongadila. 17 Sai-saindo ko'ira miano me'alu merako'o i Sostenes, ponggawano laica sambahea'a, ronga melangkuiho hai ra'ino pongadila; sawali i Galio nasai pompe'o'oo mompaduli.
I Paulus mohule hai Antiokhia
18 Dahoo moo'ia koie i Paulus hai Korintus, kai peparamisi hai raro mpetila kokeena. Kai pebangka me'o'ala hai Siria, hi arimo sicuru'o wuuno hai Kengkrea nangkua ari tebokano.a Da perongano ko'iramo i Priskila ronga i Akwila. 19 Sadungkudomo hai Efesus, yahopo i Paulus kai bintanihira kokeena i Priskila ronga i Akwila, kai pewiso hai laica sambahea'a ronga mogau'akondo miano Yahudi. 20 Kando mpo'ita hai Paulus ki daapo nta ehe moo'ia mengkau na'ico, sawali nasai ehemo. 21 Nangkuamo kai peparamisi ronga kanahi, « Kicua po'eheno Apu Alla, dahakusi nta leu penda awakomiu. » Yahopo kai lako bintanio Efesus.
22 Sadungkuno hai Kaisarea, sabe'omo hai Yerusalem mongkeni limaakondo anggota jema'a na'ico, yahopo kai lako hai Antiokhia. 23 Mengkau'ute'o da'a na'ico, kai lako penda tadehio upu-upuo wonua Galatia ronga Frigia pokomorodoakondo'o larondo miano mparasaea.
I Apolos hai Efesus
24 Koie tempo leuhomo hai Efesus me'asa miano Yahudi da meneehako i Apolos, hinaano hai Aleksandria. Mandaraa mogau ronga to'ori to'uo ihino Boku Haratiano Apu Alla. 25 Ario mepopotisu'ako dadaano sala salama'a hai Apu, ronga laronto'uno hi pogau naamo tekona hi pompotisu'ako daa-daano Yesus, sawali da tino'orino ki pobaho miano te'iaasi kana da niweweuno i Yahya pompobaho. 26 Petampu'uomo moseka mompotisu hai laica sambahea'a, sawali sando podeaho koie i Priskila ronga i Akwila, nilakodo wawaa hai laicando, kando potisu'akono'o sala salama'a hai Apu Alla da kolalo tekona.
27 Hina mokea koie i Apolos mompole hai Akhaya, nangkuamo raro mpetila hai Efesus kando pompokatuakondo sura ko'ira miano mparasaea na'ico, kando tarimaa moicoo koie i Apolos. Sadungkuno i Apolos hai Akhaya, tewaliomo miano da koguna'ea hai ira miano da parasaea tendenomo pompeehawano Apu Alla. 28 Kana'umpe nasai isea megagahiakondo miano Yahudi hindo daa mpekapetukanai mpo'awa hai ra'indo miano me'alu, ronga mo'ala ihino Boku Haratiano Apu Alla mokomentoda'akondo'o hicuamo koie i Yesus Mokole Pompokosalama.