I Paulus hai Efesus
19
1 Dahopo koie tempo i Apolos hai Korintus, leuhomo i Paulus hai Efesus ari tadehio upu-upuo sosono wonua. Kokeenamo dahano awahira opia miano mparasaea. 2 Kai petukanaihira, « Aricomiumo bara tarimaa Sangkoleono Apu Alla tempomiu parasaea? »Sawali ndona lawanio, « Koda'apo, deenapo yahopo kako podeaho hi daa koie Sangkoleono Apu Alla. »
3 Yahopo koie i Paulus kai kanahi, « Kicana koie, hapa patudumiu kami nibaho? »
Kando polawani, « Kako nibaho nunu'o pompotisuno i Yahya. »
4 Kanahiomo i Paulus, « Patuduno Yahya kai pobaho yahoo mobaho miano da tobamo hai dosano. Sawali namo'awaakondosi penda miano me'alu, kando memparasaeaho danta leu merumbui, yahoo i Yesus. »
5 Sando podeaho koie, nilakodomo nibaho'ako neeno Apu Yesus. 6 Tempono koie i Paulus dampasako peleno hai rapando, nantuduo Sangkoleono Apu Alla hai tarondo, kando mpetampu'u mpogau'ako gau da mebinta hai Sangkoleono Apu, ronga mpogau kana nabii. 7 Me'alundo koie kira-kira hopulu orua miano.
8 Larono otolu wotiti koie i Paulus lako ngkaida'a hai laica sambahea'a na'ico ronga moseka mompotisu. Mokoraa motisu'akondo'o dadaano pomparentaano Apu Alla, kando memparasaea. 9 Sawali dahoo opi-opia miano da mokora larondo, sai ehe parasaea, deenapo sosa'oo koie Sala Salama'a hai ra'indo miano me'alu. Nangkuamo koie i Paulus kai bintanihira ronga tindahako'ira ana guruno, naamo tapio oleo pogau'ano hai bolo sicola'ano Tiranus. 10 Larono orua ta'u kanamo koie niweweuno i Paulus, dungku luwu miano propinsi Asia modeaho haratiano Apu, kanapo miano Yahudi ronga miano Yunani.a
11 Apu Alla mompokoda'a peto'o tekangka da owose mentete hai niweweuno i Paulus. 12 Deenapo ko'ira miano mpowawa pongkikihi hondo atawa sawu da ari pinakeno i Paulus, kindo dampoakondo'o ko'ira miano da morungku, nilakodo mentido, ronga setani peluarakohiramo bintanihira.
Ko'ira anano i Skewa
13 Dahoo opia miano Yahudi da monto'ori da sisimbu totandaiho montilaako setani koie neeno Apu Yesus kanahi, « Neeno i Yesus da nileleakono i Paulus, kutenakomiu meluarako. » 14 Ko'ira da mpoweweuhako yahoo da opitu anano me'asa kapala pua'ima Yahudi da meneehako i Skewa.
15 Sawali koie setani nangkanahi, « Koie i Yesus kuto'orio, ronga koie i Paulus kunte modeaho, sawali comiu, inai comiu? »
16 Koie miano da nilawuino setani topaihiramo ronga babakihira, kando memonangi ronga mentelulusako mpolai bintaa koie laica, mpeluahiramo ronga sabela-bela. 17 Luwuo miano Yahudi kanapo miano Yunani da mpoo'ia hai Efesus ndopodeahomo koie da kadadia, kando memomee, ronga neeno Apu Yesus sateti-tetianinomo pinoko'owose. 18 Miano me'alu da parasaeamo hai Apu Yesus leuhiramo akui'o ronga tuluraa ari niweweundo da mosa'o. 19 Miano da ari memponto'ori ndokompuluomo boku ntino'orindo, kando tunuo hai ra'indo miano me'alu. Anggano ko'ira boku kira-kira dahoo lima pulu rewu doi pera.b 20 Kanamo koie kai e'elengua tetiani molue teleleakoano haratiano Apu ronga kuasano.
I Demetrius moweweu hitu hai Efesus
21 Sa'arino luwu koie kadadia, pepatuduomo i Paulus nta tealo hai Makedonia ronga Akhaya, kai lako hai Yerusalem. Kai kanahi, « Aripo na'ico, yahopo kaku lako hai Roma. » 22 Yahomo kai pontena orua miano ntinenano, yahoo i Timotius ronga Erastus, kando lako meri'ou hai Makedonia, sawali pantano poo'iahopo penda hai propinsi Asia.
23 Koie tempo, dahoo hitu owose mekona pompotisu dadaano Sala Salama'a. 24 Da tewali pu'uno hitu yahoo me'asa tuka mpera da meneehako i Demetrius, pohedoano moweweu kalai-laica pera da mengkena modeleno laica pesombaano sangia ntina Artemis. Koie pohedoa me'aluo hasilino da tinarimando tukano. 25 Saliwano ko'ira anabuano, nangkongkosakohira ko'ira tuka mehano da mengkena pohedoando, kai kanahi, « Raro mpetilaku, minto'oriomo, kai moico tora-toranto tendenomo hasilino die pohedoa. 26 Diekana dakomiumo modeaho ronga ontoo pantamiu da niweweuno i Paulus, na'iaa te'iaa hai Efesus, sawali mokeaho upu-upuo propinsi Asia, me'aluo miano da tepongaruhiako pompotisuno da tesala kanahi, koie apu da ari niweweuno limano to manusia na'iaa apu santo'u-to'uno. 27 Kicana koie dahoo abalaa danta konakami, na'iaa te'iaa usahanto danta mosa'o neeno, sawali ronga laica pesombaano sangia ntina Artemis nasahinamo neeno. Ronga i Artemis pantano da sinombando luwu miano propinsi Asia ronga luwu ihino wita'ea, nai da'amo nta pinoko'owose. »
28 Sando podeaho koie da kanahino i Demetrius, nasabe'o sa'o larondo, kando daa mpogora kanahi, « Poko'owose'o Artemis, pe'apuando miano Efesus! » 29 Upu-upuo kota mohitu'omo kando mesosolo miano me'alu poponotio stadion, kando sisinta'o i Gayus ronga i Aristarkhus miano Makedonia salakono i Paulus. 30 Mokeaho koie i Paulus mewiso hai tongado miano me'alu, sawali ko'ira ana guruno nasando wukahio. 31 Deenapo ko'ira pamarenta propinsi Asia simbauno i Paulus mompokatuakono oliwi, kai osie mewiso hai stadion.
32 Koie tempo miano da meda'a na'ico hai stadion, dahoo da mogora kanahi kana die, dahoo da mogora kanahi kana koie, ndona memohitumo, ndona me'a-me'alu da sai mento'orio ki hapa kando daa mentekongko. 33 Dahoo koie me'asa miano da meneehako i Aleksander, da sinuudo miano Yahudi lako hai ra'i, kando po'awaakono miano me'alu hapa nta kanahino. Nangkuamo kai taarako limano mo'ita mogau hai ra'indo, hi sando da'a tesala miano Yahudi. 34 Sawali sando podeahomo hicua na'ana miano Yahudi, nampogora'ira kira-kira orua damu mengkauno, kanahindo, « Poko'owose'o Artemis, pe'apuando miano Efesus! »
35 Perumbuino kai pokompengiohira koie wakilino walikota kanahi, « O miano Efesus, inaiho die hai wita'ea da sai to'orio hi te'iaasi kota Efesus da mompiara moi-moico laica pesombaano sangia ntina Artemis da dompa owose, kai tii gambarano hai watu da tii mebinta hai langi? 36 Koie arumai nahina danta to'ori gagahio, nangkuamo moicoomo kami mpengio, mi'osie merare moweweu hitu. 37 Kana'umpe di'ira miano, comiusi da ari wawahira leu na'ai, eheemo nando da'asi rampo'o koie laica pesombaa, ronga nando da'a sosa'oo neeno koie apu ntinanto. 38 Dadi koie i Demetrius ronga miano mpohedono, ki daa da kabarata hai nai, nahina bara pongadila, ronga dahosi gubernur; kahioomo kando mpekara-kara na'ico. 39 Naamo ki daapo da mokea nigaumiu, moicoomo kai inotuhi hai larono koie kongkosaa da nunu'o atora. 40 Kana'umpe diekana-kana, mobunaa dahanto nta pinomperahi-rahiako kanahi, hicuamo cita da moweweu hitu die oleo, nasai hina nta alasanto danta to'ori mokontekonaa di'ira miano da mohitu. » 41 Kanamo koie pogauno kai tena'ira kando mpohule.