I Paulus hai Makedonia ronga Troas
20
1 Sate'o'arino koie hitu, boboihiramo koie i Paulus miano mparasaea kai pokomorosoakondo'o larondo, kai pe'abaki lako hai Makedonia. 2 Kai lako upu-upuo wonua koie, me'aluo oliwino da pokomorosoakondo'o larondo. Yahopo kai dungku hai wonua Yunani. 3 Sakoano otolu wotiti na'ico, kai pepasadia nta mebangka lako hai Siria. Sawali koie tempo namodeaho hindo daa mpekosi miano Yahudi nta pepatee. Nangkuamo kai pepekiri, nta mohule tealo hai Makedonia. 4 Ronga da perongano, ko'iramo i Sopater anano i Pirus mebinta hai Berea, i Aristarkhus naamo i Sekundus, orua'ira mebinta hai Tesalonika, ronga i Gayus mebinta hai Derbe, naamo i Timotius ronga orua miano mebinta hai Asia, yahoo i Tikhikus naamo i Trofimus. 5 Lolako'iramo mperi'ou kando tarimakami hai Troas.a 6 Sa'arino ndo'ua Tewawea Roti Sai Kotulu, yahopo kako mpebangka bintanio Filipi ronga ilimakami kako dungku hai Troas awahira. Na'ico opitu oleo poo'iamami.7 Koie malono Mincu, mentepo'awakamimo nta mentewawe roti. Kai pogau'akondo i Paulus miano da meda'a na'ico dungku mentonga alo, tendenomo nadaa mepatudu ki meanta, dahomo nta lako. 8 Suo hai wawo dahamami mentekongko me'aluo hulu da lolanga. 9 Dahoo me'asa anadalo da meneehako Eutikhus da totoro hai kaumba. Namengkau i Paulus mogau, koie anadalo nai pokotaha'o kotunduno. Yahomo kai tekoturi endo ronga tuuna mebinta hai tengka ko'otoluno laica. Tempondo bintio koie anadalo, mateemo. 10 Sawali i Paulus nameruruo tii o'owikio ronga rako'o kai kanahi, « Osie tewereako, dahosi tora! » 11 Yahopo i Paulus kai pewuatako mbule kai titila'ira roti kando mpongkaa mperonga. Arindopo mpongkaa, mengkauhopo mogau'akondo dungku kai molinyaa, yahopo kai lako. 12 Ntaperando mesanaa ko'ira miano da mewawaa koie anadalo hai laicano hina daasi tora.
Mebinta hai Troas lako hai Miletus
13 Lakokaimo mperi'ou mpe'ulea hai bangka dungku hai Asos, patudumami nta lawa'o i Paulus na'ico, nangkua petenano, kana'umpe iaa namesala wita. 14 Mentepo'awamamimo hai Asos, kako uleaho hai bangka, kako melako hai Metilene. 15 Mebinta na'ico kako lako, kai meanta dakamimo rora'io pulo Khios. Ko'ipuamami kako dungku hai pulo Samos, ronga ko'itolumami kako dungku hai kota Miletus. 16 I Paulus ario pekirio kai osiemo tealo hai Efesus, te'iaamo kai pura wotuno hai propinsi Asia. Kana'umpe dahoo mokea, ki tewali, kai oru dungku hai Yerusalem konaa oleo owose Pentakosta.
Pe'abakino i Paulus hai kamotu'ano jema'a Efesus
17 Nangkuamo koie, kai pontena i Paulus miano lako hai Efesus, me'oliwihira ko'ira kamotu'ano jema'a kando meleu me'awaa hai Miletus.b 18 Sameleundomo kai kanahi i Paulus, « Minto'oriomo kana'umpe dadaano tora-torangku hai comiu isoku leu die hai Asia, 19 meronga pelaroa da moluu kutepo'ata hai Apu. Larono koie pohedoa, manturu'aku monturupako luu, ronga manturu'aku sinoba-sobano miano Yahudi da mokea pepateaku. 20 Sawali mau kicana koie, naku paisa sai moweweu hapa da koguna hai taromiu. Luwuo kuleleako ronga kupotisu'akomiu'o, kana hai tongano miano me'alu, kanapo maina dahamiu mentekongko hai laicamiu. 21 Sadiahakusi pokompehawa'ira ko'ira miano Yahudi ronga miano Yunani, kando poboli'i hai sinalakindo, ronga leu hai Apu Alla, naamo parasaeaho Apunto Yesus.
22 Sawali diekana, kana miano da nirakono Sangkoleono Apu, nta lako'akumo hai Yerusalem, ronga naku da'amo to'orio hapa danta awaa wotolungku na'ico. 23 Te'iaasi da tino'orincu, hai koa-koa'o kampo da ari tinealohincu, Sangkoleono Alata'ala mo'awaakuo kanahi, katorungku ronga karasai dahomo totarimaaku. 24 Sawali mau te'etepo naku pompe'o'oloi die penaa, da kontu'uma kaku dungku'osi garisi puraano petandia ronga moko'ario pohedoa dahano tena'aku Apu Yesus, yahoo nta leleako Lele Mohende dadaano pompeehawano Apu Alla.
25 Ariakumo lako awakomiu leleakoakokomiu'o pomparentaano Apu Alla, ronga diekana kuto'oriomo, nami da'amo nta paisa ontoo ra'incu. 26 Nangkuamo koie, die oleo kupo'awaakokomiu, ki lako da'a miano danta mateako sinalakino, i'aku lapasiakumo, naku da'amo tesala. 27 Kana'umpe naku da'amo sai mokodungku'akomiu'o luwuo da patuduno Apu Alla. 28 Nangkuamo koie, midagai'omo wotolumiu ronga luwu jema'a, kana'umpe comiumo da ari tinisuno Sangkoleono Apu Alla tewali podagai danta piaraa jema'ano Apu Alla, da ari inoliako rea Ana mpantano. 29 Kuto'orio, kicu tebungku lako, dahira nta mewiso'icomiu dahu lampu mosoko, nahina danta pine'o'oloindo. 30 Deenapo dahoo nta saba mebinta hai comiu opia miano da suere pompotisuno, nta pongaruhicomiu, kami bintaa sala da tekona, kami nunu'ira. 31 Nangkuamo koie, mimpedagai, ronga mimpehawa'o hi otolu ta'u ku'ari pokompehawakomiu mengkena malo meanta sai mekoli ronga monturupako luu.
32 Diekana kusorokomiu hai Apu, ronga hai haratiano da owose pompeehawano. Koie haratia da kuasa engkatakokomiu, ronga danta moweekomiu tilamiu da pinatantuno hai pera miano da ari tinindahakono. 33 Pera, wulaa, atawa pakea, naku paisa mokeahako, mau hai nai. 34 Dakomiumo to'orio hicua wua limangku da pohedongku kaku daa balandangio wotolungku ronga da paraluudo ko'ira simbauku. 35 Luwu da niweweungku kupopo'ontonicomiu kami nunu'o, kito mpohedo mobea kana koie, dakita nta to'ori tulumihira miano modengke, ronga osie kolumpee da ari kanahino Apu Yesus, hi kolalo owose barakatino miano da mompoweehi ka'iaa da pinoweehi. »