I Paulus hai Tirus ronga hai Kaisarea
21
1 Sa'arimami me'abaki, kako pebangka sai-saimami me'o'alahio pulo Kos. Meantanopo kako dungku hai pulo Rodos, ronga mebinta na'ico, kako lako hai Patara. 2 Hai Patara po'awaamami bangka danta mompole hai distere Fenisia wonua Siria, kako pe'ulea lako. 3 Dakamimo mebangka, kako ontoo pulo Siprus hai suwamami, sawali kona ntealo liaho, kako pe'o'alahio wonua Siria. Kako dungku hai Tirus, kana'umpe dahoo uleano bangka danta tiniihako na'ico. 4 Kako u'ungkehira miano mparasaea kokeena ronga moo'ia hai ira opitu oleo. Pompotisunomo Sangkoleono Apu ko'ira miano mparasaea, kando po'awaakono koie i Paulus kai osie lako hai Yerusalem. 5 Sawali sadungkuno wotu nta lako'amami, nalako to'ukamimo. Ko'ira luwuo miano mparasaea ronga samotu'ando mpe'o'ana melako'iramo soloakokami mentalahio kota dungku hai wiwi ntahi dahamamimo mengkokolontuu ronga me'amala. 6 Sa'arimami mpe'abaki, kako mpe'ulea hai bangka, nampohule'iramo hai laicando.7 Mebinta hai Tirus peranomo pebangka'amami hai Ptolemais. Kako lako awahira ronga mongkeni limaakondo petila pe'asa imani kokeena, ronga moo'ia asa oleo hai ira. 8 Sameantanomo kako pebinta na'ico, kako lako dungku hai Kaisarea. Kako lako hai laicano i Filipus, miano da leleako Lele Mohende, ronga moo'ia kokeena. Koie i Filipus yahoo me'asa simbaudo da opitu miano da ari tinisu hai Yerusalem.a 9 I Filipus dahoo opaa ana waipodeno da tule'i mogau kana nabii.
10 Sakoano opia oleo poo'iamami na'ico, naleuho me'asa nabii da meneehako i Agabus mebinta hai Yudea. 11 Sadungkuno i Agabus hai cami, na'alaa sulepeno i Paulus, kai kokorio karuno ronga limano pantano kai kanahi, « Diemo da kanahino Sangkoleono Alata'ala: Kanamo die nta daano apuno die sulepe, dahira nta kokorio miano Yahudi hai Yerusalem, ronga soroakondo'o suku suere. »
12 Sako podeaho koie, nilakomami mperonga ko'ira miano na'icokeena kompo'ita hai Paulus kai osie lako hai Yerusalem. 13 Sawali koie i Paulus namolawani, « Yo hapa kami daa mpewowo pokomopoe'o larongku? Kana'umpe i'aku die sadia'akumo, na'iaa te'iaa nta pinungo, sawali ronga nta mate hai Yerusalem, tendenomo neeno Apu Yesus. »
14 Hina sai ehe mompodedea oliwimami, kopoturusiomo kako kanahi, « Po'ehenomo Apu danta dadi. »
Tepo'awaando i Paulus ronga i Yakobus hai Yerusalem
15 Sakoano opia oleo poo'iamami hai Kaisarea, sadiakamimo kako lako hai Yerusalem. 16 Dahoo opia miano mparasaea da mebinta hai Kaisarea da perongamami wawakami hai laicano i Manason nta poo'iahamami, miano Siprus da mengkaumo parasaea.
17 Tempomami dungku hai Yerusalem, luwu petila asa imanimami taperandomo sanaa lawakami. 18 Sameantano lakokamimo mperonga i Paulus awaa i Yakobus,b ronga luwu kamotu'ano jema'a medahiramo na'ico. 19 Sa'arino mongkeni limaakondo, yahopo i Paulus kai tuluraakondo'o kuu-kuu'o hapa da ari niweweuno Apu Alla hai suere suku mentete hai pohedoano.
20 Sando podeaho koie, nilakodo poko'owose'o Apu Alla. Kando kanahi hai Paulus, « O petilaku, ontoopo, teporewu-rewumo ko'ira miano Yahudi da memparasaea, ronga luwundo konianto'u nunu'o ihi Boku Parentano nabii Musa. 21 Ndona mpodeahomo leleu, hiu daa potisu'ira ko'ira miano Yahudi da mpoo'ia mpehela'iakondo suere suku kanahi, kando osiemo mponunu ihi bokuno nabii Musa, ronga hiuna tena'ira kando osiemo suna'o anado naamo osiemo mponunu saranto. 22 Dadi diekana-kana, kana'umpemo? Matantuomo dahiramo nta modeako hiu leumo diceena. 23 Nangkuamo koie, nunu'omo die da kanahimami: Die hai cami dahoo opaa miano da ari teboka hai Apu Alla. 24 Lakomo wawahiramo ko'ira miano, kami mperonga nunu'o atora pepokomowuahano wotolu, ronga balandangihira, kando to'ori sicuru'o wuudo,c dahandomo nta to'orio luwu miano hi sai menona koie lele da pinodeando, deenapo dakosi ungkaari to'uo Boku Parentano nabii Musa. 25 Sawali ko'ira suere suku da parasaeamo, aricamimo buriakondo'o koie da ari inotuhimami: osie mongkaa kinaa da ari pesomba hai ka'apu-apu, osie mongkaa rea, kadadi da mate ntetohe, ronga osie endeo. »
26 Sameantano, koie i Paulus wawahiramo ko'ira miano kando mperonga pokomowuaho wotolundo. Sa'arino koie, kai lako hai raha mpesombaa moo'awa kanahi impia nta ariano koie atora pepokomowuahano wotolu ronga nta tinompa'ano pesomba sinumbeledo tee-tee'asa miano.
I Paulus nirako
27 Okudaamo nta puraano koie da opitu oleo atora pepokomowuahano wotolu, nameleuhira miano Yahudi da mpebinta hai propinsi Asia, kando ontoo koie i Paulus hai uluano raha mpesombaa. Yahopo kando hitupihira miano me'alu ronga rako'o i Paulus, 28 kando daa mpogora kanahi, « O miano Israil, tulumicami! Diemo miano da potisu'ira luwu miano hai mai-maina dahano, pompotisu da posala'io sukuto ronga Boku Parentano nabii Musa, naamo raha mpesombaanto! Naamo diekana dahomo penda mowawa ko'ira miano Yunani die hai raha mpesombaa da tinindahakono Apu Alla kai pokomowusee. » 29 Kana'umpe ndona ontoo i Trofimus mebinta hai Efesus da ari perongano i Paulus hai kota, dadi da ponto'orindo hi arimo koie i Paulus mewiso wawaa hai uluano raha mpesombaa. 30 Kai teka'ungke nde'e miano upu-upuo kota, kando pada mpekalulu leu rako'o i Paulus, kando sisinta'o luarako mebinta hai uluano raha mpesombaa. Nilakono tinampo luwu pinewambano koie raha mpesombaa.
31 Dahiramo konainoo nta pepatee, kai dungku lele hai komondaa batalio, hi mohitumo upu-upuo kota Yerusalem. 32 Koie komondaa batalio nilakono alahira komondaa ngkompi ronga anabuado, kando tekara-karai tii awahira ko'ira miano me'alu. Sando ontoo koie komondaa ronga anabuano, nante'o'arihira langkuiho koie i Paulus. 33 Koie komondaa batalio okudahiomo i Paulus kai rako'o, yahopo kai pontena kando pungoakono'o orua rante. Kai petukana, inai neeno ronga hapa da ari niweweuno. 34 Dahoo koie da mogora hai tongano miano me'alu kanahi kana die, dahoo penda da kanahi kana koie. Sawali ndona lalo'eamo mpogora, masusa'o dahano koie komondaa nta to'orio maina da menona da ari kadadia. Nangkuamo kai petena kando wawaa koie i Paulus hai asarama. 35 Tempondo dungku koie hai pu'uno esa, ko'ira sorodadu ndopekokoe'omo koie i Paulus hindona mohitu to'umo miano me'alu 36 da mperumbuihakondo, kando daa mpogora kanahi, « Pepateemo! »
I Paulus me'abaki nta mogau
37 Dahiramo nta wawaa koie i Paulus wiso'o hai bolono asarama, kai pogau'akono koie komondaa batalio kanahi, « Tewaliosi bara kaku pogau'akokomiu? »
Kanahiomo koie komondaa, « To'oricosi bara gau Yunani? 38 Dadi, co'o koie na'iaa bara miano Mesir da ari madalo nimpia, ronga mowawa pato rewu gorombola ngkosandata hai lueno papawu? »
39 Polawaniomo koie i Paulus, « I'aku yahoo miano Yahudi da mebinta hai kota Tarsus, mianono kota da telele hai wonua Kilikia. Dahaku mo'ita, ki tewali kaku pogau'akondo ko'ira miano me'alu. »
40 Saniwukahino i Paulus mogau, nalako'o mentade hai laa esa, kai kode limahira miano me'alu kando mpengio. Sapengiondomo, kai pontampu'u nde'e mogau'ako gauno miano Ibrani.d