Pidatono i Paulus hai miano Yahudi
22
1 « Raro mpetilaku ronga miano motu'angku, mimpodedeaho isala hapa nta kanahincu lawanio kara-karaku. » 2 Sando podeaho koie i Paulus hi daa mogau'ako gau Ibrani, nilakodomo tetiani mpengio. Kai kanahi, 3 « Aku die miano Yahudi, hinaangku hai Tarsus wonua Kilikia, sawali owose'angku die hai kota. Koie i Gamaliel da ari potisu to'uakuo luwu ihino Boku Parentano nabii Musa ari tinarimando mbueto. Nangkuamo kaku tewali me'asa miano da mokua mohedo hai Apu Alla kana comiu diekana-kana. 4 Ariakumo pakaseahira miano da nunu'o pompotisuno Sala Salama'a dungku kando mate, tama naamo tina kurako'iramo ronga kuwiso'ira hai bolo ngkatorungku. 5 Mekona ko'ira luwu da ari kadadia, mau pua'ima'ea ronga ko'ira luwu pongadila'eano agamano Yahudi, iramo danta saksii'aku. Iramo da ari moweehaku sura kuasa lako hai petilado Yahudi da hai Damsik, kaku to'ori rorako'ira miano da nunu'o koie pompotisu, kaku wawahira kando nihukuma hai Yerusalem.6 Sawali laro lakoahangku, okudaakumo hai Damsik, kira-kira tonga oleo, kai tibo panariaku niwinca da molinyaa'ea mebinta hai langi lilicu'aku. 7 Kaku tehoka hai wita, yahopo kaku podeaho suara da kanahi, ‹ Saulus, Saulus! Yo hapa kau daa pakaseahaku? ›
8 Polawaniakumo, ‹ Inai Comiu Apua? ›
Kanahiomo, ‹ I'aku Yesus miano Nazaret da pinakaseau. › 9 Ko'ira da perongangku ndo'ontoo na'anda koie niwinca da molinyaa, sawali suarano koie miano da mogau'akuo nando da'a modeaho.
10 Kaku petukana, ‹ Hapa danta niweweungku, Apua? ›
Kanahiomo hai aku, ‹ Pewangumo kau lako hai Damsik. Na'icomo dahau nta pino'awaako pera hapa dahau nta tinena. › 11 Nasaku ko'ontomo tendenomo koie niwinca da mokoko'ilo, ko'iramo salakoku da ungkaario limangku kando wawaaku lako hai Damsik.
12 Na'ico dahoo me'asa miano da meneehako i Ananias da pangkuku nunu'o Boku Parentano nabii Musa, da telele moico hai pera miano Yahudi da meda'a na'ico. 13 Kai leu koie i Ananias mentade hai pampangku kai kanahi, ‹ O Saulus petilaku, ko'ontomo mbule! › Koiesi kana kaku ko'onto mbule ronga ku'ontoomo i Ananias.
14 Yahopo kai kanahi i Ananias, ‹ Apu Alla Apuno mbueto da arimo patantuko kau to'orio po'eheno, ronga ontoo Atano da tekona,a naamo modeaho hapa da kanahino. 15 Kana'umpe dakomo nta tewali saksiino hai luwu pera miano hapa da ari inontou, ronga da ari pinodeau. 16 Diekana, yo hapapo da tinotarimau? Pewangumo kau nibaho, ronga me'e'eta hai Apu kai te'uwohi dosau. ›
17 Sapohulekumo hai Yerusalem, ronga dahaku konainoo amala hai raha mpesombaa, kai tongoo sangkoleongku kuasa, 18 kaku ontoo Apu Yesus hi daa tena'aku kanahi, ‹ Merare bintanio Yerusalem, kana'umpe nando da'a nta podedeako hiu daa nta tewali saksiicu. ›
19 Polawaniakumo kanahi, ‹ Apua, dahirasi to'orio hicuamo i'aku da ari mewiso kuu-kuu'o laica sambahea'a rorako'ira miano da parasaeakomiu wiso'ira hai bolo ngkatorungku ronga langkuihira. 20 Ronga tempono tesolo reano i Stefanus saksiimiu, dahaku na'ico ronga itaihaku mo'eheako kai pinopate. Deenapo akumo da daga'akondo'o pakeado miano da pepatee. ›
21 Sawali nangkanahi Apu, ‹ Lakomo, kana'umpe mentalaa dahangku nta tenako lako hai suere suku. › »
22 Dahirapo konainoo mpompodedea ko'ira miano ino'awano i Paulus, sawali sando podeaho hi daa tinena lako hai suere suku, nampogora'ira kanahi, « Osie modidio koie miano diei wita'ea! Da'a pantasi kai tora! »
I Paulus hai bolo asarama
23 Dahiramo mpogora kando daa hawiako babundo ronga mongkamburako bubu wita hai laamoa peto'ono hindo daa masusa. 24 Nangkuamo kai tena'ira koie komondaa batalio kando wawaa koie i Paulus hai asarama, kando paresaa ronga rorasaiho, kando to'orio hapa sababuno kando daa mpogora kana koie. 25 Sawali tempono i Paulus pinungo nta nirorasai, kai petukana koie hai komondaa ngkompi da mentade kokeena kanahi, « Tewaliosi bara mororasai me'asa miano wargaa Roma, ki sai paisapo ni'adili? »b
26 Sapodeaho koie komondaa ngkompi, nalako'o mo'awaakono koie komondaa batalio, « Hapa nta poweweumiu? Koie miano yahoo miano wargaa Roma. »
27 Yahopo nde'e koie komondaa batalio kai leu metukana hai Paulus kanahi, « Poo'awamo kiu daa menona miano wargaa Roma. »
Kanahiomo i Paulus, « Menonaa. »
28 Kanahiomo koie komondaa batalio, « I'aku kaku tewali miano wargaa Roma, mohali to'uo powadaku. »
Kai polawani i Paulus kanahi, « Sawali i'aku dahoo hakuku, kana'umpe nangkua hinaangku. » 29 Nilakodo ko'ira miano danta merasaiho mpesukaako, ronga koie na'ana komondaa batalio momee'omo, kana'umpe hina mokopehawa'omo hinangkua iaa da ari metena pungoo koie i Paulus, miano wargaa Roma.
I Paulus mera'iako hai pongadila'eano agama
30 Sawali koie komondaa batalio namokea to'orio kai mentoda ki hapa ko'ira miano Yahudi hindo daa tuntuo koie i Paulus. Nangkuamo koie, meantano kai petena bintaa koie i Paulus, ronga metena kando mentekongko ko'ira kapala pua'ima naamo luwu anggota pongadila'eano agama. Yahopo kai wawaa i Paulus kando mentepora'i.