23
1 Kai totakai matahira koie i Paulus ko'ira anggota pongadila'eano agama ronga kanahi, « O raro mpetilaku, ariakumo po'oruiho pelaroangku hi sahina tesalaku hai ra'ino Apu Alla dungku die oleo dahakupo tora. » 2 Sawali koie pua'ima'ea i Ananias namontena ko'ira miano da mentade hai pampano i Paulus, kando tapa'o ngangano. 3 Kai kanahi i Paulus hai Ananias, « Apu Alla dahoo nta tapako na'au, co'o torici da mopila ari nigampuako ngapi.a Kana'umpe kau daa totoro nta adili'akuo Boku Parentano nabii Musa, sawali co'o nalimpakio koie ihino boku, kau pontena miano tapa'aku. »4 Kando kanahi ko'ira miano da mpentade okudahio i Paulus, « Yo hapa kau daa moko'anu-anuo pua'ima'eano Apu Alla? »
5 Kai polawani i Paulus kanahi, « O raro mpetila, naku da'a ka'asi to'orio hicua iaa pua'ima'ea. Menonaa dahoo teburi, ‹ Osie gau ngkabaria'o miano da parentaa wonuau. › »b
6 Naamo hina nto'orio ko'ira miano asa ntilara yahoo miano golonga Saduki, ronga asa ntilarano miano golonga Farisi, yahomo kai pogau'eahakondo ko'ira anggota pongadila'eano agama kanahi, « O raro mpetilaku, i'aku die miano Farisi, ronga miano motu'angku miano Farisi. Kaku ni'adili na'ai, tendenomo da pinerahi-rahincu, hindo mpewangu miano mate. » 7 Sakanahinomo koie, kando pekakahi ko'ira miano golonga Farisi ronga miano golonga Saduki, nangkuamo kai tetila orua ko'ira anggota pongadila'eano agama. 8 Kana'umpe miano golonga Saduki yahomo da kanahi, nai pewangu miano mate, nahina mala'ekati atawa sangkoleo; sawali miano golonga Farisi akui'o luwu.
9 Kai tewali nde'e hitu owose. Dahoo opia guru agamano miano golonga Farisi da saba mentade mogau mekikilowu kanahi, « Nako po'awa te'asa tesalano die miano! Dahoo ntada'a sangkoleo atawa mala'ekati da ari pogauno. »
10 Owose'omo nde'e koie pekakahindo, yahomo kai momee koie komondaa batalio, te'iaamo kindo tibo mehihia'o koie i Paulus. Nangkuamo koie, kai pontena ko'ira anabuano sorodadu, kando tii alaa koie i Paulus mebinta hai tongano miano me'alu, kando wawaa hai asarama.
11 Koie malono, naleuho Apu mentade hai pampano i Paulus kai kanahi, « Pokomosekaa larou, aricomo saksii'aku hai Yerusalem, paraluu'o kau saksii'aku kana koie na'ana hai Roma. »
Sincolo-ngkolondo nta popatee i Paulus
12 Sameantanomo ko'ira miano Yahudi kando mpe'asa gau ronga mpetunda, hi sando da'a nta mpongkaa ronga mpondo'u, ki sando ari pepatee koie i Paulus. 13 Me'alundo ko'ira miano da mesincolo-ngkolo kolaloo pato pulu miano. 14 Kando melako mo'awaakondo raro ngkapala pua'ima ronga kamotu'ano miano Yahudi kanahi, « Aricamimo mpetunda hi sako da'a nta mpongkaa ronga mpondo'u, ki sako ari popatee i Paulus. 15 Nangkuamo koie, mimperongamo ko'ira pongadila'eano agama, kami mpo'ita hai komondaa batalio kai wawaakomiu'o koie i Paulus, kami mparesaa kara-karano moi-moico, ronga dakamimo nta sadia pepatee hai laa sala, hi sai da'apo dungkukomiu. »
16 Sawali koie laki'anano i Paulus, ana ntamano petilano tina, namodeaho da sincolo-ngkolondo, yahomo kai lako mewiso hai asarama mo'awaakono i Paulus.
17 Nangkuamo koie i Paulus kai poboboi me'asa komondaa ngkompi ronga mo'awaakono, « Wawaamo die anadalo hai komondaa batalio, kana'umpe dahoo hi daa nta mo'awaakono. »
18 Koie komondaa ngkompi wawaamo koie anadalo hai komondaa batalio kai kanahi, « I Paulus, koie miano tinorungku, boboihaku ronga mo'ita kaku wawaakomiu'o die anadalo, kana'umpe dahoo hi daa nta mo'awaakomiu. »
19 Yahopo koie komondaa batalio kai ungkaario limano koie anadalo kando peseheako ronga metukanaiho, « Yo hapa hiu daa nta mo'awaakuo? »
20 Polawaniomo, « Ko'ira miano Yahudi boboto'omo gaudo hindo daa nta mpo'ita hai comiu kami boboihakondo'o koie i Paulus i'ile, kando mentepora'i penda hai pongadila'eano agama, kana-kana koie pongadila hi daa nta paresaa kai mentodanoo. 21 Sawali mi'osie monunu da kanahindo, kana'umpe kolalohira pato pulu miano da mesadia poporaa. Arihiramo mpetunda hi sando da'a nta mpongkaa ronga mpondo'u, ki sando ari pepatee. Diekana-kana dahiramo mesadia, te'iaamo tarimaa po'ehe mebinta hai comiu. »
22 Kai tena'o koie anadalo mohule ronga tabe'o kanahi, « Osie montulura, mau hai nai, hiu ari mo'awaakuo. »
I Paulus pinolinca hai Kaisarea
23 Kai poboboi koie komondaa batalio orua komondaa ngkompi kai kanahi, « Pasadia'o rua etu tantara ronga pitu pulu miano mpedara, naamo rua etu miano ngkopadanga, danta lako hai Kaisarea tete osio die malo. 24 Pasadia'o te'opia dara nta pe'uleahano i Paulus, miwawaa moi-moico kai dungku hai gubernur Feliks. »
25 Yahopo koie komondaa batalio kai poburi sura, kana die ihino:
26 Salamu mebinta hai Klaudius Lisias tudu hai ra'imiu gubernur Feliks da te'angga.
27 Ko'ira miano Yahudi ndorako'omo die miano, dahiramo nta pepatee, kaku leu mowawa sorodadu totonga'o, kana'umpe kuna modeaho hicua yo miano wargaa Roma. 28 Kaku pokompera'io hai pongadila'eano agamando, patudungku yahoo kaku to'orio yo hapa sinalakino kando tuntuo. 29 Sawali mentoda'ano, kando tuntuo, yahoo mekona ihi Boku Parentano nabii Musa, sawali nahina sinalakino da pantasi kai pinopate atawa tinorungku. 30 Dahoo miano da mo'awaakuo hi daa sincolo-ngkolondo miano Yahudi da mokea pepatee. Nangkuamo koie, kai tade-tadengku montena wawaakomiu'o. Kanapo ko'ira da tuntuo, kutena'iramo kando mpo'ita mekara-kara hai ra'imiu.
31 Ko'ira tantara da tinena lako'iramo wawaa koie i Paulus tuntu alo dungku hai Antipatris. 32 Sameantanomo i Paulus ronga ko'ira tantara da mpedara sai-saindomo melako mperonga, sawali ko'ira tantara da melolako ngkaru nampohule'iramo hai asarama. 33 Sadungkudo ko'ira tantara da mpedara hai Kaisarea, nilakodo lako wawaakono'o sura koie gubernur meronga i Paulus. 34 Sa'arino basaa koie sura, nametukanaa koie gubernur hai Paulus ki wonua hapa pebintaano. Sapodeaho hicua hai Kilikia pebintaano, 35 kai kanahi, « Dahaku nta paresaa kara-kara'u, kindo meleu na'ai ko'ira da pasalako. » Yahopo kai tena'ira kando taha'o koie i Paulus hai rahano mokole Herodes.