Paulus hai ra'ino gubernur Feliks
24
1 Sa'arino tealo olima oleo, naleuho pua'ima'ea Ananias ronga opia kamotu'a, naamo me'asa miano da to'ori mogau kara-kara da meneehako i Tertulus. Kando pokodungku'akono'o gubernur koie kara-karano i Paulus. 2 Kai niboboi koie i Paulus kai leu, nilakono koie i Tertulus laporoo kara-karano i Paulus kanahi, « O gubernur Feliks da kuasa, yo po'atoromiu kai daa e'elengua momapu toramami, ronga kai tepule die wonua tendenomo mandaramiu. 3 Luwu ko'ira, taperamami montarimakasi ronga pa'anggakomiu, mau hai hapa. 4 Sawali kai osie mompokomentaa gau, dakami nta mo'ita kai moico laromiu modedeanicami te'asantonia kico mpogau die itea.5 Menteehomo die miano yahoo me'asa rungku lumele, iaamo da pokomohitu'o miano Yahudi upu-upuo wita'ea ronga yahoo me'asa ponggawano miano golonga Nasarani. 6 Deenapo ario totandaiho wuwuseiho raha mpesombaa. Nangkuamo kako rako'o, [nta adili'o nunu'o Boku Parentano nabii Musa. 7 Sawali koie komondaa batalio i Lisias naleu rukusicami kai alaa wawaa, 8 yahopo kai tena'ira ko'ira da pasala'o kando leu mpekara-kara hai comiu.]a Kimi mparesaamo, yahopo dahamiu nta to'orio luwu da ari niweweuno kako daa tuntuo. » 9 Naamo ko'ira miano Yahudi itaihira na'anda tuntuo ronga kanahi hi menona koie kara-kara.
10 Yahopo koie gubernur kai kode'o koie i Paulus kai pogau. Pogau'omo nde'e i Paulus kanahi, « Kuto'oriomo himi tepota'u-ta'umo tewali po'otuhi kara-kara die wonua. Nangkuamo kasaku pontangkoro lawanio die kara-karaku hai ra'imiu. 11 Mobunaa dahamiu nta to'orio kimi mpetukana, hi sai da'a kolalo hopulu orua oleo da ari tealo, kaku leu hai Yerusalem nta sambahea. 12 Ronga nahina te'asa miano da ari awaaku hicu daa mekakahi atawa moweweu hitu, mau hai raha mpesombaa, atawa hai laica sambahea'a, atawa hai bolo ngkota. 13 Ronga nando da'a nta to'ori mokomenteehakuo tesalaku hindo daa momperahi-rahiakuo. 14 Menonaa mangaku'aku hai comiu, hicu pesomba hai Apu Alla Apuno mbue-mbuemami nunu'o koie da nineehako Sala Salama'a, da kanahindo pompotisu ntesala. Kuparasaea to'uo pera da niburi hai bolo bokuno nabii Musa ronga bokudo raro nabii. 15 Da pinerahi-rahincu, kanasi da pinerahi-rahindo di'ira miano na'anda, yahoo Apu Alla danta wanguo miano mate, mengkena miano da tekona ronga miano da tesala. 16 Nangkuamo koie, kaku sadia mo'oruiho pelaroangku kaku tora sai tekebaako hai ra'ino Apu Alla ronga to manusia.
17 Sawali sa'arino tealo opia ta'u kaku leu mbule hai Yerusalem mowawa doi nta tulumihira pe'asa sukuku, ronga nta montompa pesomba. 18 Daangku konainoo weweuho koie luwu, hicu ari nunu'o atora pepokomowuahano wotolu, kando awaaku hai uluano raha mpesombaa opi-opia miano Yahudi da mpebinta hai propinsi Asia. Koie tempo nai me'alu miano da perongangku ronga nahina hitu. 19 Santo'u-to'uahano, ko'iramo miano Asia da paraluu mera'iako hai comiu mo'ita mekara-kara, kicanano da'a tesalaku hai ira. 20 Sawali kahioomo di'ira miano da meda'a na'ai diekana-kana, kando mpo'awa ki sa'o hapa da inawando tempongku pinora'i hai pongadila'eano agama, 21 tabeano kicuamo koie gauku da mokora tempongku mentade hai ra'indo kanahi: ‹ Tendenomo da pinerahi-rahincu, hindo mpewangu miano mate, koiemo kaku daa sinida die oleo hai ra'imiu. › »
22 Sawali koie gubernur Feliks da to'ori to'uo dadaano Sala Salama'a, nantadoopo koie kara-karado kai kanahi, « Kai leupo koie komondaa batalio i Lisias, kaku otuhio kara-karamiu. » 23 Yahopo kai tena'o koie komondaa ngkompi kai daga'o i Paulus, sawali na'iaa tahana mobea, ronga tewaliosi ko'ira simbauno mewiso pasipolee hapa da paraluuno.
24 Sakoano opia oleo, naleuho koie i Feliks ronga samotu'ano i Drusila miano Yahudi, metena boboiho i Paulus, kai podeaho gauno mekona parasaea hai Yesus Kristus. 25 Sawali tempono koie i Paulus gau'o niweweu da tekona, montaha pelaroa, ronga nta inotuhiano danta inawando miano oleo perumbui, kai momee nde'e koie i Feliks kai kanahi, « Koa'omo isala, pohulemo diekana-kana. Kai da'apo tempongku, dahakusi nta boboico. » 26 Pomperahi-rahino i Feliks dahoo i Paulus nta moweeho doi. Nangkuamo koie, kai manturu boboiho i Paulus kando pogau.
27 Sa'arino tealo orua ta'u, koie gubernur Feliks pinopo'euhakoomo i Perkius Festus, sawali i Feliks namongkokona pelaroando miano Yahudi, yahomo kai poturusio koie i Paulus kai poo'ia hai bolo ntorungku.