I Paulus ni'adili hai ra'ino i Festus
25
1 Otolumo oleo dungkuno koie gubernur Festus hai propinsi Yudea, nalako'o mebinta hai Kaisarea kai sabe hai Yerusalem. 2 Sadungkuno i Festus na'ico, kando leu ko'ira kapala pua'ima ronga kamotu'ano miano Yahudi mpera'iako hai iaa, kando pokodungku'o kara-karano i Paulus. 3 Pino'itando yahoo ki ehe lolarohira i Festus kai pontena miano wawaa i Paulus hai Yerusalem. Kana'umpe dahiramo mpepatudu nta pepatee hai tonga sala. 4 Sawali namolawani i Festus kanahi, « Dahano tetaha i Paulus hai Kaisarea, ronga dahakusi nta oru mohule mbule kokeena. 5 Nangkuamo dahano nta moico, ko'ira da motu'aakokomiu kami mperongaakumo, airuanepo kami ntisu'o ki daa sinalakino himi daa tuntuo. »6 Kira-kira hoalu atawa hopulu oleo poo'iano i Festus hai Yerusalem, kai pohule hai Kaisarea. Meantanomo kai pompokoda'a kongkosa pongadila, kai tena'o miano kando pokompera'io koie i Paulus. 7 Sadungkuno koie i Paulus na'ico, nameleuhira luwundo miano Yahudi da mpebinta hai Yerusalem mempentade libuo, kando tuntuo kara-kara mobea da me'alu, sawali nando tule'i montisu buktiino.
8 Yahopo koie i Paulus kai lawanio kara-karano kanahi, « Mau te'ete nahina tesalaku, kana hai Boku Parentano nabii Musa, kana hai raha mpesombaa, kanapo hai mokole'eano Roma. »
9 Sawali koie i Festus na'ehe mongkokona pelaroando miano Yahudi, yahomo kai petukanaiho i Paulus kanahi, « Daako bara mokea lako kotaha hai Yerusalem, kai ni'adili die kara-kara'u hai ra'incu? »
10 Sawali nangkanahi i Paulus, « Diekana-kana dahangku mentade hai ra'ino pongadila da pinotorono mokole'eano Roma, na'aimo kami otuhio kara-karaku. Kana'umpe dakomiusi to'orio hi sai hina te'ete tesalaku hai ira miano Yahudi. 11 Dadi, ki menona da'a kasalaahangku atawa niweweungku da mosa'o, da pantasiako kaku pinopate, naku da'amo sai ehe mate. Sawali ki sai menona hindo daa tuntuaku, nahina te'asa miano da tewali soroaku hai ira miano Yahudi. Yahomo kaku sabe mo'ita hai mokole'eano Roma kai otuhio die kara-karaku! »
12 Sa'arino i Festus mogau'akondo ko'ira kamotu'a mpa'oliwino, nangkanahio, « Hiuna arimo mo'ita mekara-kara hai mokole'ea, dakomo nta lako hai Roma mera'iako hai iaa. »
Paulus hai ra'ino Agripa ronga Bernike
13 Dahomo moo'ia koie gubernur Festus kando leu koie mokole Agripa ronga i Bernike hai Kaisarea tepo'awaakono ronga pa'angga'o.a 14 Hina opia oleo poo'iando na'ico, koie i Festus tuluraa kara-karano i Paulus hai mokole kanahi, « Na'ai dahoo me'asa miano tahana da sai da'apo inotuhi kara-karano kai polinca i Feliks. 15 Dahaku konainoo hai Yerusalem, kando leu ko'ira kapala pua'ima ronga kamotu'ano miano Yahudi mokodungku'akuo kara-karano koie miano, kando mpo'ita kai nihukuma. 16 Sawali kuna lawanihira, nai biasano miano Roma lau-launo mosoro miano kai nihukuma, ki sai ari tepora'iakondo balino, ronga pinoweehi tempo kai lawanio kara-karano. 17 Saleundo na'ai merongaaku, naku da'a lembahi metarima. Sameantano nilakoku mompokoda'a kongkosa pongadila ronga montena koie miano kai pinokompera'i. 18 Sawali tempondo mpentade libuo ronga tuntuo, nahina te'asa da mosa'o da nigaudo kana da ponto'orincu hai larongku. 19 Te'iaasi koma hi sai pengkena po'awando mekona hai agamando, ronga koie me'asa miano da meneehako i Yesus da matemo, sawali i Paulus namekora kanahi toraamo. 20 Nasaku to'orio ki kana'umpe nta pomparesangku koie dakana kara-kara, yahomo kaku petukanaiho ki daa nta ehe lako hai Yerusalem, kai inotuhi kara-karano na'ico. 21 Sawali i Paulus namo'ita kai poo'iamo tetaha dungku kai otuhio kara-karano koie mokole'ea. Nangkuamo koie, kaku petena kando taha'o, dungku kaku pokatuakono'o mokole'ea. »
22 Kanahiomo koie i Agripa hai Festus, « I'aku na'angku mokeahaku modeaho koie miano kai pogau. »
Kai polawani koie i Festus, « Ilepo dahau nta modeaho. »
23 Sameantano naleuhira koie mokole Agripa ronga i Bernike kana to'u dadaando ka'owose. Sapewisodomo hai laica ngkongkosaa mperonga ko'ira komondaa batalio ronga kamotu'ano kota, nametena'o koie gubernur Festus kai niwawa i Paulus mera'iako. 24 Kanahiomo koie i Festus, « O apua Agripa, ronga luwunto da meda'a na'ai: Mi'ontoomo die miano da nineendo luwu miano Yahudi, mau da meda'a hai Yerusalem kanapo da meda'a na'ai. Meleuhiramo hai aku kando daa mpogora kanahi, ‹ Koie miano nai tewalimo tora. › 25 Sawali namenteengkuomo hi sahina niweweuno da pantasi kai pinopate, ronga hina mo'ita mekara-kara hai mokole'eano Roma, yahomo kaku otuhio nta pokatuakono'o mokole'ea. 26 Sawali nasaku da'apo mo'awa hapa da matantu hicu daa nta moburiakono mokole'ea mekona hai kara-karano. Koiemo sababuno kaku boboiho kai pera'iako hai comiu na'ai, kontu'uma comiu mokole Agripa, kana'umpe ki arimo pinaresa, dahakumo nta to'ori moburi. 27 Kana'umpe ponto'orincu, nai pewiso akala ki pompokatu me'asa miano ntetaha, ki sai niburi hapa da pinekara-kara'akono. »