Polawanino i Paulus hai ra'ino i Agripa
26
1 Kanahiomo koie mokole Agripa hai Paulus, « Dakomo pinoweehi tempo kau pogau mekona wotoluu. »Koie i Paulus taarako limano, yahopo kai pogau nde'e lawanio kara-karano, 2 « O mokole Agripa, konantuaraaku, kana'umpe die oleo tewaliaku molawani hai ra'imiu luwu hapa da pinekara-kara'akongku tendenomo ko'ira miano Yahudi. 3 Kontu'uma mina nto'ori to'uo adatino miano Yahudi ronga da biasa tineposala'akondo. Nangkuamo kaku po'ita kami sabara modedeahaku.
4 Luwu miano Yahudi to'orio tora-toraangku sa'isoku okidi, metampu'u hai wonuangku kanapo hai Yerusalem.a 5 Mengkauhiramo to'oriaku, ronga kindo daa ehe, dahiramo nta saksii'aku, hicua i'aku die tora kana miano Farisi da monunu golonga agamanto da taperano mobea atorano. 6 Kaku daa mera'iako die hai pongadila tendenomo hicu daa momperahi-rahi nta mentoda'ano dandino Apu Alla hai ira mbue-mbueto, 7 da pinerahi-rahindo na'anda da hopulu orua sukuto, kando daa konianto'u mesambahea malo meanta. Tendenomo koie pomperahi-rahi, O comiu mokole Agripa, kando pokompekara-kara'aku ko'ira miano Yahudi. 8 O comiu miano Yahudi, yo hapa kai haliticomiu parasaeaho hi kuasa Apu Alla mokontoraa miano mate?
9 Iponoha ariaku mepekiri nta mekora daluo koie neeno Yesus miano Nazaret. 10 Ronga koie hai Yerusalem ariakumo moweweuhako. Sapo'awangkumo kuasa mebinta hai ira kapala pua'ima, kaku powiso miano mparasaea da me'alu hai torungku, ronga tempondo mempinopate, itaihaku ehe. 11 Kuu-kuu'o laica sambahea'a, manturu'aku pakaseahira ronga pakisaa'ira kando pehapuiho da pinarasaeando. Deenapo hi dompa mosa'o larongku, kaku nte lako melampuhira dungku hai kota suere wonua. »
I Paulus tuluraa toba'ano ronga niboboihano
12 « Kanamo koie patudungku kaku lako hai Damsik, ndona moweehaku kuasa ronga tena'aku ko'ira kapala pua'ima. 13 Sawali, comiu mokole Agripa, kai tibo-tibo koie tonga oleo hai tongano sala, kaku ontoo me'asa niwinca da kolalo molinyaa ka'iaa matano oleo tudu mebinta hai langi tii tongoaku ronga ko'ira simbauku mpe'asa lolakoku. 14 Luwumami menteleha hai wawo wita, kaku podeaho suara gau Ibrani da kanahi, ‹ Saulus, Saulus, yo hapa kau daa pakaseahaku? Panta'usi danta mopoe'uo kiu posepa da mongkaso. ›
15 Kaku petukanaiho kanahi, ‹ Inaicomiu, Apua? ›
Kai polawani Apu, ‹ I'akumo i Yesus da pinakaseau. 16 Sawali diekana, pewangumo mentade. Kaku daa popo'ontoniakoko'o wotolungku, yahoo nta mokontewalico tinenaku ronga saksiicu mekona luwu ari inontou hai Aku, ronga hapa hicu daa nta popo'ontonico perumbuino. 17 Dahaku nta pokosalamako mebinta die hai suku ronga hai suku suere. Naamo dahaku nta tenako lako hai ira, 18 kau bonga'akondo'o matando, kando tegili mebinta hai rondomaano mewiso dahano molinyaa, mebinta hai kuasano bilisi lako dahano Apu Alla, kai inampuni dosando tendenomo hindo parasaeahaku, ronga mo'awa tilari tarondo miano da tinindahakono Apu Alla. ›
19 Nangkuamo koie, O mokole Agripa, naku paisa sai nunu'o hapa da pinodeangku hi ari panariaku koie niwinca mebinta hai suruga. 20 Miano iso'angku mo'awaakondo yahoo da meda'a hai Damsik, yahopo hai Yerusalem ronga hai upuo wita Yudea, kanapo hai suku suere. Kupo'awaakondo kando mpoboli'i, ronga tegili nunu'o Apu Alla, naamo weweuho kai mentoda hindo mentobamo. 21 Nangkuamo koie, kando merako'aku miano Yahudi hai uluano raha mpesombaa ronga mokea pepateaku. 22 Sawali nantulumiaku Apu Alla dungku die oleo, yahomo kaku daa mentade na'ai metuluraakondo miano biasa ronga miano owose. Ronga da ari pinokodungkuku koie, nai da'a sisala da ari pinokodungkudo meri'ou raro nabii ronga i Musa hapa danta kadadia, 23 yahoo Mokole Pompokosalama danta marasai ronga Iaamo danta iso mewangu mebinta hai raro miano mate, yahopo kai leleako da molinyaa hai suku die ronga hai suku suere. »
Mokeaho i Paulus kai parasaea i Agripa
24 Dahomo koie i Paulus konainoo mogau, kai pogora i Festus kanahi, « Namolawukomo koie Paulus! Tendenomo tino'oriu da me'alu kau molawu! »
25 Sawali i Paulus namolawani, « Naku da'a molawu, O Festus da kuasa! Da nigauku menonaa, ronga pekirincu dahosi molinyaa! 26 Ronga koie mokole Agripa to'ori to'uo luwuo die da nigauku, nangkuamo kaku moseka gau'o mongkoteano. Matantungkuomo, luwuo die nahinamo da sai tino'orino, kana'umpe kadadiahano nai da'a tewuniako. 27 Dakomiusi bara, apungku mokole Agripa, parasaeahira pera nabii? Kuto'orio dakomiusi parasaeahira. »
28 Kai polawani mokole Agripa, « Ponto'oriu bara Paulus, daako nta oru pokontewaliaku miano Ngkarasitee? »
29 Kai kanahi koie i Paulus, « Oru atawa lembahi, dahaku nta amala hai Apu Alla, na'iaa te'iaasi comiu, sawali ronga luwu miano da modedeahaku die oleo, kami ntewali kana i'aku, sawali comiu, osie pinungori kana i'aku. »
30 Nangkuamo kando pentade koie mokole Agripa, naamo gubernur Festus ronga i Bernike, kai tii pera miano da perongando mentotoro na'ico. 31 Dahiramo mpeluarako kando daa mpogau pada-pada ira kanahi, « Koie miano nahina te'asa niweweuno da pantasi kai pinopate atawa tinorungku. »
32 Kai kanahi mokole Agripa hai Festus, « Santo'u-to'uahano, koie miano tewaliomo kai nibintani, ki sai da'amo sabe mo'ita mekara-kara hai mokole'ea. »