I Paulus mebangka lako hai Roma
27
1 Sa'arino inotuhi hicoa daa nta mpebangka lako hai wonua Italia, koie i Paulus ronga opia miano ntetaha meha sinoromo hai komondaa ngkompi da meneehako i Yulius, mebinta hai bataliono Kaisar. 2 Kako mpe'ulea hai bangka da mebinta hai Adramitium, danta tealo hai opi-opia polabuha hai wiwi ntahi propinsi Asia. Yahopo kako mpeluarako. I Aristarkhus, miano Tesalonika wonua Makedonia, dakamimo mperonga.3 Meantano kako todo hai Sidon. I Yulius moicoo poweweuno i Paulus, yahomo kai wukahio kai tealo awahira simbauno, kando pompasipoleakono hapa da paraluuno. 4 Pebintaamamimo na'ico, kai awakami ngalu mebintai ra'i, yahomo kako pebangka nunu'o wiwi ntahino pulo Siprus daahano sai mokora ngalu. 5 Sa'arimami na'ico, kako petonga ntahi rora'io wonua Kilikia ronga Pamfilia kako dungku hai kota Mira wonua Likia. 6 Na'ico po'awaanomo koie komondaa Yulius me'asa bangka da mebinta hai Aleksandria nta lako hai Italia, kai lincakami kokeena.
7 Opi-opia oleo kopebangka mokeakamimo sai tesukaako, taperamamimo marasai kako masa okudahio Knidus. Nangkua ngalui ra'i, yahomo kako tegili me'o'alahio tanjung Salmone hai pulo Kreta dahano sai mokora ngalu. 8 Taperamamimo marasai kako nunu'o pampa tahino pulo Kreta, yahopo kako dungku'o koie polabuha da meneehako Labu'a Moico, okudahio kota Lasea.
9 Me'aluomo wotu da pura hai laro lakoahamami, kana'umpe oleo owose poasaa ariomo tealo,b nangkuamo kai daa nta rora'io abalaa ki lako mebangka.c Yahomo koie i Paulus kai pokompehawa'ira simbauno kanahi, 10 « Raro mpetilaku, kudaa ontoo kito mpebangka die, dahoo nta owose susa ronga karugia da nirora'into, na'iaa nta te'iaa uleano bangka, sawali ronga itai wotoluno bangka, kontu'uma penaanto. » 11 Sawali koie komondaa Yulius namparasaeaho koie anakoda ronga apuno bangka ka'iaa i Paulus. 12 Nasai moico moo'ia koie hai polabuha ki wula mokoseoha, yahomo kai me'alu da ehe kando melako to'umo, ronga tandaiho ki tewali dungku hai kota Feniks, kando mpoo'ia na'ico mokompuraa wula mokoseoha. Kota Feniks yahoo me'asa labu'a Pulo Kreta da rora'io pada oleo.d
13 Koie tempo ngalu ngkawii-wii mebinta hai salata. Nangkuamo ponto'orindo dahomo nta tenunu da patudundo. Nangkuamo kando tompa'o matakaino bangka,e kando melako nunu to'uo wiwi ntahino Pulo Kreta.
Bangka telangga
14 Sawali nai da'a lembahi kai leu ngalu'ea mebinta hai pulo da meneehako ngalu ntimbu.f 15 Koie bangka konaamo ngalu'ea ronga nai tule'i taha'o koie ngalui ra'i. Nangkuamo koie, kako tara'usamo moturusio bangka kai paerako ngalu. 16 Kai wawakami ngalu dungku hai wiwi ntahino pulo'ote da meneehako Kauda, ronga na'icomo dahamami mpekora kako masa mokowuatako ronga takirako koie koli-kolino bangka. 17 Satewuatakono koie koli-koli hai wawono bangka, kando palitiakono'o ula koie bangka'ea kai morodo. Sawali hindona momee tebasiako hai wawo watu mpasi Sirtis, yahomo kando tiihako koie pangauwano bangka kai pelontoi nde'e koie bangka. 18 Tende mokorano hembo da gasakami, meantano nametampu'uhira mpohawiako uleano bangka hai tahi. 19 Ronga oleo ko'otolu pantadomo da mebobasiako koie pokosangkano bangka. 20 Mengkauhomo nde'e koie nai paisamo inonto matano oleo kanapo olimpopo, ronga hembo'ea nai ehemo ari-ari gasakami. Yahomo nde'e kai mo'otu pomperahi-rahimami hi sako da'amo nta salama.
21 Ko'ira miano mengkauhiramo sai mpongkaa, nangkuamo koie i Paulus kai lako mentade hai tongado kai kanahi, « Raro mpetilaku, kimi daa modedeaho oliwincu, kato osie bintanio Kreta, anu matantu nato da'a nta memarasai ronga marugi kana die. 22 Sawali hai laro die masusa'a, ku'oliwicomiu kami mpokomorosoo laromiu, kana'umpe nai te'asa comiu danta sala mohapa, saliwano die bangka. 23 Kana'umpe asa alo dahoo me'asa mala'ekatino Apu Alla, yahoo Apungku da sinombangku, leu mentade hai pampangku, 24 kai kanahi, ‹ O Paulus, osie momee! Kana'umpe dakosi nta tepora'iakono mokole'eano Roma, ronga santo'u-to'uahano, ko'ira luwu miano da perongau hai bangka ariomo Apu Alla soroakoko'o kando itai mesalama. › 25 Nangkuamo koie, pokomorosoo laromiu petilaku! Kana'umpe kuparasaeaho Apu Alla hi matantu koie luwu nta kadadia kana hi ari mo'awaakuo. 26 Sawali die bangka dahoo nta telangga hai wiwi ntahino te'asa pulo. »
27 Kohopulumo opaa malo, dakamipo melontoi hai tahi Adria. Sawali dahomo mentonga alo, kando penasaa ko'ira anabuano bangka hindo po'okudahimo wita. 28 Yahopo kando pontiihako watu da ari kinoo kando songka'o olarono e'e na'ico, dahoo rua pulu ropa. Nai da'a mengkau kando songka'o penda, hopulumo olima ropa. 29 Sawali kona momee telangga hai wawo watu mpasi, yahomo kando pontiihako opaa matakai mebinta hai puri bungkuno bangka, ronga mo'ita-ita kai oru meanta. 30 Sawali ko'ira anabuano bangka namokeahiramo molai bintaa koie bangka. Arihiramo tiihako koli-koli, kana to'u hindo daa nta montiihako matakai hai ra'ino bangka. 31 Nangkuamo koie i Paulus kai po'awaakono koie komondaa ngkompi ronga sorodaduno, « Kindo lako ko'ira anabuano bangka sai moo'ia hai bangka, nami da'amo nta salama. » 32 Yahomo ko'ira sorodadu kando otuo koie ulano koli-koli, kando poturusio kai wawaa tahi.
33 Dahomo komeanta, koie i Paulus tena'iramo luwundo kando mpongkaa. Kanahino, « Hopulumo opaa oleo mintotarimaa hapa danta kadadia ronga mpetaha sai mpongkaa. 34 Nangkuamo koie, kaku tenakomiu kami mpongkaa meri'ou. Kana'umpe kinaa koie tinoraako, paraluu'o. Mi'osie momee, mau wuumiu nahina danta isa te'asa lewe. » 35 Sa'arino kanahi kana koie, namo'alaa roti, kai amala montarimakasi hai Apu Alla hai ra'indo, kai sibio mongkaa. 36 Namorosomo larondo nde'e ko'ira miano ronga kando mpongkaa. 37 Me'alumami luwu koie da hai bangka dahoo rua etu pitu pulu onoo miano. 38 Samowohindo ari mpongkaa, nampohawiakohiramo koie inisa gandum uleano bangka hai tahi, kai mobata koie bangka.
39 Sadumondonomo kando ontoo koie wiwi ntahi morete da sai tino'orindo, kando pepatudu ki tewali nta mesoreako labu na'icokeena. 40 Yahopo kando wuwuhio ulano ko'ira matakai kando bintaa bolo ntahi. Kanamo na'ana wuwuhio pongkokono ko'ira ulino bangka.g Dahiramo pokonaa pangauwa hai ra'i kai puurio ngalu, kando tegili me'o'ala koie hai wiwi ntahi. 41 Sawali koie bangka narumpa'o koie tambo hahi dahano olende e'e, kai telangga nde'e. Koie ropeno bangka telamoomo hai tambo hahi nai komiu-miu, ronga purino tewiro'omo nirurumpano hembo.
42 Koie tempo pepatuduhiramo ko'ira sorodadu nta pepatehira ko'ira tahana, kai osie da'a te'asa miano da nonangi molai. 43 Sawali koie komondaa Yulius mokeaho pokosalama'o koie i Paulus, nangkuamo kai tabe'ira moweweuhako da patudundo. Kai parentahira ko'ira da to'ori nonangi kando peri'ou mpelosiako hai tahi nonangi sabe hai wita, 44 ronga ko'ira meha-mehano kahioomo kando mperumbui kando mpe'ungkaa hai dopi atawa pokosangkano bangka. Kanamo koie kando mesalama luwundo sabe hai wita.