I Paulus hai Malta
28
1 Sasalamamami sabe hai wita, yahopo kako to'orio hicuamo koie pulo Malta. 2 Ko'ira mianono koie pulo taperando kolaro hai cami. Koie tempo namontampu'umo usa ronga mokoseo, pompekaa'iramo api kando boboicami. 3 Koie i Paulus poruru'omo na'ana rangka kai daa montunui hai api, kai tibo saba koie ule tutu'o limano hina mokulanoo api. 4 Sando ontoomo ko'ira miano ihino pulo hi daa bobaea koie ule hai limano i Paulus, pada ngkanahi'iramo, « Matantuomo die miano yo miano mpompepate, kana'umpe mau hi salamamo mebinta hai tahi, koie sangia ntina da mongkote nai poturusio kai tora. » 5 Sawali koie i Paulus napipitako koie ule hai bolo langano api, ronga nai mohapa. 6 Sawali ndona ngkanahi, dahoo nta kambanio, atawa nta teleha mate. Sawali samengkaundomo o'ontoo hi sahinasi hapa-hapa da kadadia hai wotoluno, nanteboli'io ponto'orindo ronga kanahi hicuamo deena iaa yo sangia.7 Nai da'a mentala mebinta na'ico, dahoo witano ponggawano koie pulo da meneehako i Publius. Moicoo pontarimano icami, ronga metokakami otolu oleo hai laicano. 8 Koie tempo, tamano koie i Publius moo'ia leleha, moreo ronga mopoe tiano pipisaa. Koie i Paulus pewiso'omo hai poturiano, kai dampasako peleno ronga amalaakono, kai tido nde'e. 9 Sa'arino koie kadadia, ko'ira miano suere da memorungku koie hai pulo meleuhiramo hai Paulus kai pokontidohira. 10 Ntaperando pa'anggakami, ronga tempomami nta mpebangka mbule, kando pompasadia'akami hapa-hapa danta paraluumami.
I Paulus dungku hai Roma
11 Tekabuno tolu wotiti, kako pe'ulea hai bangka da mebinta hai Aleksandria da labu hai pulo Malta tendenomo wula mokoseoha. Peto'ono koie bangka yahoo gambarano Dioskuri (ana enduano sangia Zeus). 12 Kako tealo hai Sirakusa ronga moo'ia na'ico otolu oleo. 13 Mebinta na'ico kako pebangka penda nunu'o wiwi ntahi, yahopo kako dungku hai Regium. Meantano kai wawakami ngalu mebinta hai salata ronga oleo ko'orua yahopo kako dungku hai Putioli. 14 Na'icomo mentepo'awaamami petila asa imani, ronga kando mpo'ita kako mpoo'ia opitu oleo hai ira. Arinopo koie, kako lako hai Roma. 15 Petila asa imani hai Roma ndopodeahomo dadaamami, nangkuamo kando leu lawakami dungku hai Forum Apius ronga hai Tres Taberne. Sa'ontohiramo koie i Paulus, nilakono montarimakasi hai Apu Alla, ronga morosoo pelaroano.
16 Sadungkumamimo hai Roma, kando wukahio i Paulus kai poo'ia pantano hai laica, ronga koie me'asa sorodadu da daga'o.
I Paulus mogau'akondo miano Yahudi hai Roma
17 Sa'arino otolu oleo, koie i Paulus naboboihira ko'ira kamotu'ano miano Yahudi, ronga samentekongkondo nangkanahio, « Raro mpetilaku, mau ki sahina niweweu ntesalaku hai ira raro mpetilato atawa hai adatino mbue-mbueto, nirako'akusi hai Yerusalem ronga sinoro hai miano Roma. 18 Sa'arindo paresaaku ko'ira miano Roma, kando pepatudu bintaaku, nasando po'awa te'asapo koma sinalakincu da pantasi kaku pinopate. 19 Sawali ko'ira miano Yahudi kokeena nasando ehe, yahomo kaku tepakisaa sabe mo'ita mekara-kara hai mokole'eano Roma, sawali na'iaa patudungku nta tuntuhira ko'ira miano asa sukuku. 20 Koiemo sababuno kaku po'ita kato mentepo'awa ronga mpogau. I'aku die inula'ako rante te'iaasi kuna mparasaeaho dahano momperahi-rahi miano Israil. »a
21 Kando kanahi, « Nako paisa cami montarima sura da montulura dadaau da mebinta hai Yudea, ronga nahina te'asa miano petila da ari leu montulura ki daa bangu'u da mosa'o. 22 Sawali mokeakami modeaho po'awau, kana'umpe koto'oriomo die golonga mau hai hapa nahina dahano sai nigau mosa'o. »
23 Yahopo kando pompatantu me'asa oleo dahando nta leu awaa i Paulus. Sadungku'o koie oleo, me'aluo miano da leu hai laica dahano moo'ia koie i Paulus. Ari dumondo dungku kiniwia hi tarangkaniakondo'o naamo tuluraakondo'o dadaano pomparentaano Apu Alla, ronga tendenomo hapa da teburi hai bokuno nabii Musa naamo pera nabii, mokea kando parasaeaho koie i Yesus. 24 Dahoo da parasaeaho da nigauno, dahoo da sai da'a. 25 Kando menteposinca nde'e koie, hina sando mentepokona mpinehawa. Sawali i Paulus dahopo mogau'akondo penda, « Menona to'uo haratiano Apu Alla da ari pinokodungkuno Sangkoleono Alata'ala hai mbue-mbueto, kana da kanahino nabii Yesaya:
26 ‹ Milakomo hai miano Israil mo'awaakondo kanahi,
Dakomiu nta nte mompodea ronga podeaho,
sawali nami da'a nta paha'o.
Dakomiu nta nte mo'onto ronga ontoo,
sawali nami da'a nta paisa onto to'uo.
27 Kana'umpe pelaroando ko'ira miano tabulu'omo mokora,
ronga birindo tedoki'omo,
matando tetutuwiomo,
nangkuamo kando osie mo'ontoako matando,
osie mompodeahako birindo,
osie mompaha'ako pelaroando,
kando osie tegili hai Aku kaku pokontidohira. ›b
28 Nangkuamo koie, kahioomo kami nto'orio, miano da leleako sala salama'a da mebinta hai Apu Alla tinena'iramo lako hai suere suku, ronga ko'ira suku dahiramo nta mempodeaho. » [ 29 Sa'arino mogau kana koie i Paulus, nampohule'ira ko'ira miano Yahudi, kando daa mpegagahi nasando mpekakona mpaha.]
I Paulus leleako pomparentaano Apu Alla hai Roma