I Timotius itai nunu'o i Paulus
16
1 Kai dungku i Paulus hai Derbe ronga hai Listra. Na'ico dahoo me'asa miano mparasaea da meneehako i Timotius; tinano yahoo miano Yahudi da parasaeamo, sawali tamano miano Yunani. 2 Luwu miano mparasaea hai Listra ronga hai Ikonium reree'o i Timotius, 3 ronga i Paulus mokeahako i Timotius kai nunu'o. Nangkuamo kai petena suna'o, tendenomo miano Yahudi na'ico, kana'umpe ndona pada mento'orio tamano hicua miano Yunani.aI Paulus mompole hai Makedonia
4 Laro lakoahando koie i Paulus ronga i Silas, pera kampo tealoando sadiahira mokodungku'akondo'o pera da ari inotuhindo rasulu ronga kamotu'a hai Yerusalem kando nunu'o. 5 Kanamo koie kai moroso parasaeando jema'a-jema'a na'ico, ronga tetiani me'alundo tapio oleo.
6 Nasai wukahi'ira Sangkoleono Alata'ala leleako haratiano hai propinsi Asia,b yahomo kando pesala tealo hai wonua Frigia ronga Galatia. 7 Sadungkudo hai tidano wonua Misia, mokeahira lako hai wonua Bitinia, sawali Sangkoleono Yesus nai wukahi'ira. 8 Sa'arindo tealohio wonua Misia, nadungku'iramo hai kota Troas. 9 Koie malo daahanomo koie Paulus ontoo niamata hi daa me'asa miano Makedonia da mentade me'e'eta kanahi, « Pompolemo na'ai kami ntulumicami! » 10 Satekabuno da inontono, nilakomami mo'u'ungke pe'uleahamami nta mompole hai Makedonia,c kana'umpe pompahamami, yahoo Apu Alla da boboicami leleakoakondo'o Lele Mohende hai ira miano na'ico.
11 Kako pebangka bintanio Troas sai-saimami mompole hai Pulo Samotrake, meantanopo kako dungku hai Neapolis. 12 Mebinta na'ico kako lako hai Filipi, me'asa kota maroa hai wonua Makedonia da pino'iahino miano Roma. Kokeena opi-opiapo oleo poo'iamami.
I Paulus hai Filipi
13 Konaa oleo mpekolia, kako mpeluarako mebinta hai pinewambano kota lako hai wiwi laa e'e, nangkua da ponto'orimami, na'ico dahoo nte sambahea'ando miano Yahudi. Mentotorokamimo kako mpetuluraakondo ko'ira tina da mentekongko kokeena. 14 Me'asa tina da meneehako i Lidia dahoo itai mompodedea. Iaa padangga kae momea olondoro mebinta hai kota Tiatira, da mesomba hai Apu Alla. Apu ungkahiakono'o pelaroano kai tarimaa hapa da nigauno i Paulus. 15 Sa'arino nibaho ronga asa bolo laicano, kai titiakami kanahi, « Kimi ngkanahi parasaeahakumo hai Apu, mileumo moo'ia isala hai laicangku. » Kanamo koie pontitiano cami, dungku kako ehe.
16 Dahoo me'asa oleo dakami hai bolo sala lako koie hai sambahea'a, kako tepo'awaakono me'asa ata ntina da kinuasaino setani, da tule'i tuluraa tora-torando miano oleo mperumbui, da mokongkawasahira ponggawano tendenomo koie tino'orino. 17 Dahomo merumbuihakono i Paulus ronga icami kai daa mogora kanahi, « Di'ira miano yo atano Apu Alla da kuasa'ea. Da nileleakondo hai comiu yahoo sala salama'a. »
18 Opia oleo, kanamo koie da niweweuno. Sawali nampuramo sabarano i Paulus, kai pebulili kanahi hai setani, « Ronga neeno Yesus Kristus, kutenako kau bintanio koie tina. » Koiesi tempo kai peluarako koie setani.
Kapala katorungku hai Filipi
19 Sando to'orio ko'ira ponggawano koie ata ntina, hi sahinamo dahando nta mpo'awa doi, nilakodomo rako'o koie i Paulus ronga i Silas, kando sinta'ira hai tadoha hai tongano kota nta wawahira hai pamarenta. 20 Sa'arindo wawahira mera'iako hai pamarenta kota, kanahi'iramo, « Di'ira miano Yahudi dahira pokomohitu'o die kota, 21 mompotisu'ako adatido da sai to'ori tinarimanto ronga ninunutinto cita miano Roma. »
22 Kando pewangu ko'ira miano me'alu libuhira i Paulus ronga i Silas. Yahopo ko'ira pamarenta kota kando pontena kai niluuhi babundo ronga langkuihira. 23 Salowu'iramo nilangkui, kando wiso'ira nde'e hai bolo ngkatorungku. Kando tena'o koie kapala katorungku kai dagai to'uhira. 24 Nangkuamo koie, kai petena kapala katorungku kando niwawa hai sel tongano katorungku, ronga nilangke karudo.
25 Kira-kira mentonga alo, koie i Paulus naamo i Silas kando amala ronga melagu reree'o Apu Alla, naamo ko'ira miano mpetorungku ndopodeahiramo. 26 Sawali nantibo kadadia lelu da mokora to'u, dungku koa siuno koie laica ngkatorungku moleluo, naamo koie tempo kai te'ungkahi luwuo wamba ronga rante mentewuwuhiomo. 27 Tempono tepombula koie kapala katorungku, kai ontoo hi te'ungkahimo luwuo wamba, tade-tadeno rabu'o taano nta mepopate mpanta, kana'umpe ponto'orino, mempolaihiramo luwu miano da mentetorungku. 28 Sawali koie i Paulus namehou'ea kanahi, « Osie menono'o, kana'umpe dakamisi meda'a na'ai luwumami! »
29 Yahopo koie kapala katorungku kai petena mowawa hulu, kai tekara-karai mewiso ronga bibi'omo kai pedangkawako hai ra'ino koie i Paulus ronga i Silas. 30 Kai wawahira meluarako ronga kanahi, « O tua owose, hapa danta niweweungku kaku salama? »
31 Kando polawani kanahi, « Parasaeamo hai Apu Yesus, dakomo nta salama, ronga luwu ihi laicau. » 32 Kando leleako haratiano Apu hai iaa ronga hai luwu ihi laicano. 33 Koiesi malo, kai wawahira koie kapala katorungku kai uwohio belando. Sa'arino koie sai-sainomo na'ana koie kapala katorungku mepebaho ronga ihino laicano. 34 Yahopo kai wawahira kando lako hai laicano, ronga moweehira kando mpongkaa. Taperando mohende, kana'umpe iaa ronga ihi laicano parasaeahiramo hai Apu Alla.
35 Sameantanosi ko'ira pamarentano kota kando pontena polisi lako mo'awaakono kapala katorungku kanahi, « Bintanihiramo ko'ira miano. »
36 Koie kapala katorungku mo'awaakono i Paulus kanahi, « Petenado pamarenta kota kaku luarakokomiu. Milakomo ronga momapu laromiu. »
37 Sawali i Paulus nangkanahi hai ira polisi, « Masa cami die miano wargaa Roma, nako inadili kako nilangku hai ra'indo miano me'alu, kako niwiso hai torungku. Diekana nta mengiohiramo kando bintanicami. Nai tewali kana koie. Kahioomo kando leu pantado luarakokami. »d
38 Ko'ira polisi mokodungku'akondo'o koie da kanahino i Paulus hai pamarenta kota. Sando podeaho koie hicua miano wargaa Roma koie i Paulus ronga i Silas, nilakodo momee. 39 Kando meleu hai katorungku mo'ita ma'apu, yahopo kando luarakohira ronga mpo'ita kando bintanio koie kota. 40 Sapeluarakondo mebinta hai torungku, lako'iramo hai laicano i Lidia, kando mentepo'awaakondo miano mparasaea kando oliwihira, yahopo kando lako.