Kongkosa hai Yerusalem
15
1 Kando meleu hai Antiokhia opia miano da mebinta hai Yudea motisu'ira miano mparasaea kanahi, « Ki sami mpesuna kana da ari parentano i Musa, nami da'a nta to'ori pinokosalama. » 2 Sawali i Paulus ronga i Barnabas ndona mokora gagahi'ira ko'ira miano. Nangkuamo kai inotuhi hindo daa nta lako i Paulus ronga i Barnabas ronga te'opia miano Antiokhia hai Yerusalem, nta gau'o koie kara-kara mperonga ko'ira rasulu ronga kamotu'ano jema'a da meda'a kokeena.3 Ko'ira anggota jema'a pokolako'ira miano danta lako hai Yerusalem. Kando tealo hai Fenisia ronga Samaria, na'icomo daahando tulurahira kana'umpe kando mentoba ko'ira miano da sa'iaa suku Yahudi. Koie tulura ntaperano pokomohende'o pelaroando luwuo miano mparasaea na'ico.
4 Sadungkudo hai Yerusalem, kando lawatihira koie jema'a, raro rasulu, ronga kamotu'ano jema'a. Yahopo koie i Paulus ronga i Barnabas kando tuluraakondo'o pera da ari niweweundo hi ari Apu Alla tulumihira. 5 Sawali ko'ira opia miano golonga Farisi da parasaeahomo Yesus pentadehiramo kando kanahi, « Miano mparasaea da sa'iaa to Yahudi nai tewali sai mesuna ronga tinena nunu'o Boku Parentano nabii Musa. »
6 Kando kongkosa ko'ira rasulu ronga raro ngkamotu'ano jema'a megau'o koie kara-kara. 7 Samengkaundomo mpogau, namentadee koie i Petrus kai kanahi, « O raro mpetilaku, dakomiumo to'orio hi mengkaumo Apu Alla ari tisu'aku mebinta hai comiu nta leleako haratiano, kando parasaea suku suere da sa'iaa miano Yahudi da modeaho koie Lele Mohende. 8 Ronga Apu Alla da to'orio ihi mpelaroano to manusia, ariomo pokomentoda'o hi tarimahirasi ko'ira suku suere, hina moweehirasi Sangkoleono Alata'ala kana cita. 9 Icita miano Yahudi ronga ira da sa'iaa, nahina teposengka'ano hai ra'ino Apu Alla. Kana'umpe Apu Alla pokomowuahakondo'o pelaroando hindona mparasaea. 10 Kicana koie, hapa sababuno kami mokea soba-soba'o Apu Alla mokomperongo'akondo'o da mobea ko'ira miano mparasaea, yahoo parentano i Musa, da sai pinokorongodo mbue-mbueto ronga die cita? 11 Sawali tona mparasaea hicua kato salama tende pompeehawano Apu Yesus, kanamo ko'ira na'anda da sa'iaa miano Yahudi. »
12 Mpengiohiramo nde'e luwuo ko'ira miano da tekongko na'ico, kando mpodedeaho koie i Barnabas ronga i Paulus hi tuluraakondo'o pera peto'o tekangka da ari niweweundo hai tongano suku suere da sa'iaa to Yahudi, hi ari Apu Alla moweehira kuasa. 13 Sate'o'arindo metulura, nangkanahio koie i Yakobus, « O raro mpetilaku, mimpodedeahaku. 14 Yahopo kai ari koie i Simona tuluraa, hi sa'isono iponoha, Apu Alla meehawa'ira suku suere, yahomo kai poruruki danta tewali umatino pantano. 15 Koiemo kai nunu'o haratia da ari pinokodungkudo raro nabii, kana da teburi:
16 ‹ Perumbuino dahakumo nta leu mbule,
ronga wangu penduaho rahano i Daud da terowamo.b
Naamo pokosangkano dahaku nta po'engka penduaho,
ronga pule'o kai morodo,
17 kando me'u'ungkee Apu pera miano suere,
ronga pera giuno suku da sa'iaa Yahudi,
da ari niboboincu tewali mianongku.
Kanamo koie haratiano Apu Alla
da ari pokodadio luwu.
18 Mengkauhomo tino'ori mebinta iponoha. ›c
19 Dadi ponto'orincu, to'osie pokomasusa'ira miano da sa'iaa to Yahudi da tegilimo nunu'o Apu Alla. 20 Sawali topoburiakondo sura, kando osie mpongkaa kinaa mpesomba da ari niwuwuseino ka'apu-apu, osie me'endeo, osie mpongkaa kadadi mate ntetohed ronga rea. 21 Kana'umpe mebinta iponoha, parentano i Musa nileleako kuu-kuu'o kota, ronga dungku diekana-kana koie parenta nibasa koa-koa'o oleo mpekolia hai laica sambahea'a. »
Sura hai miano mparasaea da sa'iaa miano Yahudi
22 Boboto'iramo ko'ira rasulu, kamotu'ano jema'a ronga luwundo anggota jema'a, kando mporuruki danta lako nunu'ira i Barnabas ronga i Paulus hai Antiokhia. Da tinenado lako yahoo i Yudas da nineehako i Barsabas ronga i Silas, miano nte'angga hai jema'a. 23 Dahoo sura da niwawando, ihino koie sura yahoo:
« Salamumami rasulu ronga kamotu'ano jema'a petilamiu, hai comiu petilamami suere suku hai Antiokhia, Siria, ronga Kilikia.
24 Kopodeahomo hi daa opia miano hai cami da awakomiu, sawali na'iaa petenamami kando lako hitui'o ronga pokomoleluo pelaroamiu, tendenomo pompotisudo. 25 Nangkuamo kai boboto laromami kako poruruki opia miano, kako tena'ira lako awakomiu merongahira i Barnabas ronga i Paulus da niloumami, 26 da ari soroo penaando tendenomo neeno Apunto Yesus Kristus. 27 Ko'iramo i Yudas ronga i Silas da tinenamami pokodungku'akokomiu'o ihino die suramami.
28 Kana'umpe pengkenaamo po'eheno Sangkoleono Alata'ala ronga po'ehemami yahoo kai osie mobe-mobea petena danta nirongomiu ka'iaa die da paraluu: 29 Mi'osie mpongkaa kinaa da ari tinompa tewali pesomba hai ka'apu-apu, osie mpongkaa rea, osie mpongkaa kadadi da mate ntetohe, ronga osie me'endeo. Kimi mentalahio ko'ira luwu, moicoomo niweweumiu. Salamumami, peranopo na'ai isala. »
30 Sa'arindo me'abaki, kando melako ko'ira miano hai Antiokhia. Sadungkudo kokeena kando boboihira luwu jema'a mentekongko, yahopo kando weehakondo'o koie sura. 31 Taperando mohende hindo ari basaa, tendenomo ihino koie sura yahoo polilimboi. 32 I Yudas ronga i Silas nangkuasi na'anda nabii, me'aluo hi oliwihira ronga pokomokoraa imanindo. 33 Samengkau'utedomo moo'ia na'ico, kando mpe'abaki hai ira miano mparasaea, kando mpohule ronga momapu larondo hai ira miano da ari tena'ira lako. [ 34 Sawali i Silas nampatantuo hi daapo nta moo'ia hai Antiokhia.]
Teposincaando i Paulus ronga i Barnabas
35 Dahira moo'ia i Paulus ronga i Barnabas koie hai Antiokhia, kai me'alu simbaudo da perongando mompotisu'ako ronga leleako haratiano Apu. 36 Perumbuino kai kanahi koie i Paulus hai Barnabas, « Moicoomo kato pohule, kato tealo awahira raro mpetilato, kuu-kuu'o kota arianto leleako haratiano Apu, ki kana'umpe dadaando. » 37 I Barnabas mokeaho kando peronga i Yohanes da meneehako Markus, 38 sawali i Paulus nasai ehemo kando mperonga i Markus, kana'umpe na'ari bintanihira hai Pamfilia ronga nai ehe merongahira mohedo. 39 Nangkuamo kando pegagahi koie i Paulus ronga i Barnabas, dungku kando teposinca. I Barnabas wawaamo i Markus kando pebangka lako hai Siprus. 40 Sawali i Paulus narurukio i Silas. Ko'ira miano mparasaea hai Antiokhia soroakondo'omo hai pompeehawano Apu, 41 yahopo kando lako tealo hai wonua Siria naamo Kilikia ronga pokomorodoakondo'o parasaeando ko'ira jema'a kokeena.