Hai kota Ikonium
14
1 Kana da ari kadadia hai Antiokhia Pisidia, kanamo koie niweweundo i Paulus ronga i Barnabas hai Ikonium, yahoo mewiso hai laica sambahea'ando miano Yahudi ronga mompotisu. Tendenomo koie pompotisudo, kai me'alu to'u miano Yahudi ronga miano Yunani da parasaea. 2 Sawali miano Yahudi da sai ehe parasaea, namokomokula'o pelaroando miano suku suere dungku kando kokoleahira miano mparasaea. 3 Yahomo koie i Paulus ronga i Barnabas kando mengkau na'ico ronga moseka moleleako dadaano pompeehawano Apu. Kai pokomentoda'o Apu hi menona koie da nileleakondo, kana'umpe namoweehira kuasa kando poweweu peto'o da tinekangkaako. 4 Sawali ko'ira miano ihino kota ndona ntetila oruamo, dahoo da meduluhira miano Yahudi, dahoo penda da meduluhira ko'ira rasulu.5 Kando mpekosi ko'ira miano Yahudi ronga suku suere naamo ponggawando nta pakaseahira ronga nta watuihira ko'ira orua rasulu. 6 Sando to'oriomo, kando polai hai wonua Likaonia, kando dungku hai kota Listra ronga Derbe naamo kampo da lilicu'o, 7 kando daa leleako Lele Mohende.
Hai kota Listra ronga Derbe
8 Hai Listra dahoo me'asa tama da te'iaasi totoro niweweuno, kana'umpe namolu'o karuno ronga lungkuho mebinta sa'isono hina, nai to'ori lolako. 9 Koie miano modedeaho da nigauno i Paulus. Koie i Paulus petotangka'o koie miano hi parasaeamo, nangkuamo koie, kai daa nta to'ori pinokontido. 10 Nangkuamo kai pekora kanahi, « Pentadeakomo karu'u! » Kai lumoso mentade koie miano, kai petampu'u kolako-lako.
11 Sando ontoomo ko'ira miano me'alu hapa da niweweuno i Paulus, kando mpogora'ako gau Likaonia, « Raro sangia mentiihiramo mpesarungga hai miano! » 12 I Barnabas ndoneehakono'omo i Zeus ronga i Paulus poneendo i Hermes hinangkua iaa da mandara mogau.a 13 Dahano laica mpesombaano sangia Zeus hai wiri ngkota, na'icomo pebintaano pua'ima pontompa pesomba hai sangia Zeus leu mowawa opia tama sapi ronga bunga-bunga nta montompa pesombano merongahira miano me'alu hai Barnabas ronga hai Paulus.
14 Sando podeaho koie i Barnabas ronga i Paulus hapa danta niweweundo ko'ira miano, nilakodo hihia'o pakeado tende mopoeno larondo, kando pekalulu hai tongado miano me'alu kando pekora mehohou kanahi, 15 « Yo hapa kami ngkana koie? Cami na'amami mianosi kana comiu. Kako daa na'ai te'iaasi nta mowawaakomiu Lele Mohende, yahoo kami bintaa ko'ira sangia da pine'apuimiu da sai hina gunano, kami ntegili nunu'o Apu Alla da tora, da ari weweuho langi, wita, tahi, ronga pera ihino. 16 Iponoha Apu Alla moturusihira pera suku kando nunu'o po'ehe mpantado. 17 Sawali nai paisa ari-ari mokomentoda'o hi daa wotoluno. Dahoo moweekomiu pera da moico, usa mebinta hai langi, ronga wua mpinombula koa wotuno. Moweekomiu kinaa ntinoraako, ronga mokosanaa'o laromiu. » 18 Mau hindo daa mogau kana koie ko'ira rasulu, dahosi mohali tetabe'ando mompoweehi pesombando, sawali lako-lako'irasi tetabe.
19 Sawali ko'ira miano Yahudi da mebinta hai Antiokhia Pisidia ronga hai Ikonium ndona leu pongaruhi'ira ko'ira miano me'alu kando watuiho koie i Paulus, yahopo kando sisinta'o wawaa hai bungkuno kota, kana'umpe ponto'orindo mateemo. 20 Sawali tempondo ko'ira miano mparasaea meleu mpentade lilicu'o, namewanguo kai pewiso hai kota. Meantanopo kai lako hai Derbe ronga i Barnabas.
Mohule hai Antiokhia wonua Siria
21 Tempondo i Paulus ronga i Barnabas moleleako Lele Mohende hai Derbe, me'aluo miano da memparasaea. Sa'arindo koie, kando pohule hai Listra, Ikonium, ronga hai Antiokhia Pisidia, 22 kando pokomorosoakondo'o pelaroando miano Ngkarasitee ronga oliwihira kando konianto'u parasaea ronga kanahi, « Dakita nta mo'awa karasai me'alu, yahopo kato pewiso hai pomparentaano Apu Alla. » 23 Koa-koa'o jema'a ariando tealo arihira montisu miano tewali kamotu'a. Kando sorohira hai Apu Alla dahando memparasaea kando daa amala ronga mempoasa.
24 Na'icomo pebintaando i Paulus ronga i Barnabas kando tealohio wonua Pisidia dungku hai wonua Pamfilia. 25 Sa'arindo moleleako haratia hai Perga, kando tii hai Atalia. 26 Mebinta hai Atalia kando mpompole mebangka mohule hai Antiokhia wonua Siria. Koiemo kota ariano jema'a soroakondo'o ko'ira rasulu hai Apu Alla kando nibarakati hai laro mpohedoa da pinoko'arindo diekana.
27 Sadungkudo koie i Paulus ronga i Barnabas hai Antiokhia, kando kongkosakohira anggota jema'a, kando tuluraakondo'o pera da ari niweweundo hi ari Apu Alla tulumihira, ronga kana'umpe hi poweehira sala miano da sa'iaa miano Yahudi kando mparasaea. 28 Na'icomo dahando mengkau i Paulus ronga Barnabas moo'ia hai ira anggota jema'a.