4
1 Comiu apuno ata, kahioomo kami mongkote ronga adili hai atamiu. Kahioomo kami mpeehawa'o hi daa Apumiu hai suruga.2 Kahioomo kami ngkonianto'u amala ronga medagai, ronga mpontarimakasi hai Apu Alla. 3 Kimi me'amala, mimpo'itaakami kai palalesakami Apu Alla kako leleako rahasiano Kristus. Kana'umpe tendenomo die haratia, kaku tinorungku. 4 Mi'amalaakuo kaku to'ori leleako koie haratia kai mentoda, kana'umpe koiemo dahangku tinena.
5 Kahioomo kami mpepekiri motu'a, kimi perongaakondo miano da sai da'apo parasaea. Osie pokosia-sia'o wotumiu, sawali kai koguna. 6 Kimi mpogau, kahioomo kai moico podedeahano, kai sanaa larono miano da modeaho, kami nto'orio kana'umpe nta polawanimiu, ki petukanaicomiu miano.
Pe'abaki ronga salamu
7 Luwuo daa-daangku dahosi i Tikhikus nta tuluraakokomiu'o. Iaamo petilato da telou, ronga atano Apu da konianto'u, naamo simbau mpohedongku. 8 Patudungku kaku tena'o kai lako awakomiu, kami nto'orio daa-daamami, ronga kai morodo laromiu. 9 I Onesimus, miano sangkampomiu, petilamami da konianto'u ronga telou, dahoo nta merongaa i Tikhikus. Dahiramo nta mo'awaakomiu luwu da kadadia na'ai.
10 I Aristarkhus, simbauku tetorungku, ronga i Markus, topisano i Barnabas, dahira mesalamu hai comiu. Aricomiumo pino'awaako mekona i Markus: Ki lako dungkukomiu, kami ntarima moicoo. 11 I Yesus da meneehako Yustus dahoo na'ana mesalamu hai comiu. Te'iaasi ko'ira miano Yahudi da parasaeamo yahomo da pe'asa mpohedongku moleleako pomparentaano Apu Alla. Iramo da tewali polilimboino larongku. 12 I Epafras, petila asa ngkampomiu ronga atano Yesus Kristus, dahoo mesalamu hai comiu. Mokuaho amalaakokomiu kai moroso parasaeamiu kana miano nto'ori da me'ungkaa morodo hai po'eheno Apu Alla. 13 I'akumo da saksii'o hi to'u-to'u ari mekora mohedo tendenomo comiu, ronga ko'ira miano hai Laodikia, naamo hai Hierapolis. 14 I Lukas, dotoro da telou, ronga i Demas, dahoo salamundo hai comiu.
15 Pokodungku'akami'o salamumami hai ira petila da meda'a hai Laodikia, ronga i Nimfa, kai tii miano da mesambahea hai laicano.
16 Sa'arino nibasa die sura kami mpodeaho, pokatuakondo'o na'anda jema'a hai Laodikia kando basaa. Ronga koie surangku da hai jema'a Laodikia, kahioomo kami basaa na'amiu.
17 Pokodungku'akuo die oliwincu hai Arkhipus kanahi, « Peehawa'o tugasiu da ari tinarimau mebinta hai Apu, kai laronto'uu padala'o. »
18 Die salamungku i'aku Paulus, salamu niburino limangku.a Mimpeehawa'aku hicu daa terante hai bolo ntorungku. Pompeehawano Apu Alla merongakomiu.